"Сылнылык тӱня" рубрик, 2015 ий, Шорыкйол тылзын 30-шо кечыже

Оригами кидым лывырта

Статьян авторжо Анастасия Эманова

Параньга район Усола тӱҥ школын туныктышыжо Эльвира Михайловна Богданова кагаз дене тӱрлӧ кайыкым, пеледышым ышта. Теве ӱстембалне шӧртньӧ тӱсан самовар, чашка-влак шинчат, умбачынрак ончалаш гын, кагаз гыч ыштыме манын отат шоналте.

Кидмастар Эльвира Михайловна БогдановаШтрамарий почиҥга ялыште шочшо Эльвира Михайловна 1992 ий годсек Усола школышто математикым туныкта. Ынде ик ий технологий предметым вӱда. “Кидпашалан эре шӱман лийынам. Авам уста кидмастар. Тудак тӱрлаш да пидаш туныктен. Кагаз пеледыш-влакым ышта ыле. Йочалан тидыже поснак келшен. Кызыт тудлан – 78 ий. Шинчаже начарын ужеш гынат, носким, пижергым пидеш, йӧратыме пашажым ик кечат ыштыде ок сеҥе, - ойла туныктышо. — Ныл ий ончыч школышто “Юзо оригами тӱня” кружокым почынам. Йоча-влак мастар улыт. Канзаши технике дене пашам ыштен моштат. Кружокышто утларакше кагаз дене янлыкым, кайыкым, пеледышым ыштена. 1-8 класслаште тунемше-влак коштыт. Изирак класслаште оригами деке ӱдыр-влак веле огыл, рвезе-шамычат кумылан улыт. Нунын дене куштылгырак фигур-влакым ыштена, а кугурак класслаш коштшо ӱдыр-шамыч дене — неле композицияным.

ОКагаз фламингоригами кид лывыргылыкым вияҥда. Искусствын ты видше деке шукертак кумылаҥынам. Тӱрлӧ выставкыште оригами паша-влакым ужынам. Интернетыште кагаз гыч кайыкым ышташ туныктымо мастер-класс-влакым онченам. Тыге тунемынам. Паша нелыжак огыл, но тыршен ыштыман. Кугурак подделкым ямдылаш ятыр жап кая. Шуко модульым ыштыман, садлан эн ончыч модуль-влакым кагазеш сӱретлыман, вара нуным пӱчкын лукман да кӱлеш семын тодыштман. Ямде модуль-влак дене пашам тӱҥалаш лиеш. DSCN8685

Кугурак ӱдыр-шамыч дене тыгак тӱрлена, пидына, а шукерте огыл квилинглан кумылаҥынна. Кужу вичкыж кагазым спиральыш пӱтырен, тӱрлӧ аппликацийым ыштена. Йоча-влакын пашашт сылне улыт. Ончылий августышто туныктышо-влакын республикысе конференцийышт лийын. Тушто ме йоча-влакын ыштыме кидпашаштым ончыктенна. Чылалан келшен, грамот дене палемдалтынна”.

Уста ӱдырамашын кидпашаже-влак школын кажне лукшым сӧрастарат манаш лиеш. Пырдыжыште шкешотан пеледыш панно-влак кечат, кушкыл лоҥгаште мужыр йӱксӧ “иеш”, попугай “чоҥештылеш”. Тыгай моторлыкым ужын, кидпашалан кумылаҥде огешак лий. 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: