"Рубрик деч посна", 2015 ий, Пургыж тылзын 13-шо кечыже

Ик гана вашлиймеке, тыйымак ӱмыреш йӧраташ шоненам

Статьян авторжо Ирина Кудряшова

Йӧратымаш тул кузе ылыжеш? Южо еҥ икымше шинчаончалтыш гычак шӱм пелашыжым вашлиймым умыла. Весылан ты яндар шижмашым палаш ятыр жап кӱлеш. Ончыч ваш ужын кутырат, йолташ лийыт, а вара умылат: икте-весе деч посна иленат огыт керт. Тыге шӱдыр-влак сӧреныт але Юмо пӱрен? Южо мужыр-влакын йӧратымаш историйышт ялт киносо гай.

Пелашда дене кузе палыме лийында? Икымше шинчаоналтыш гыч ваш йӧратенда мо? Мо дене шӱм пелашда тендам сымыстарен? Нине да моло йодышлан йодыш-влаклан республикыште илыше еҥ-влак вашештат.

Сергей Мамаев, актёр:

- 11 классым тунем пытарымеке, Йошкар-Олаш толынам. Такшым вес тунемме тӧнежыш пураш шоненам, но логалынам тӱвыра да сымыктыш колледжыш. 10 сентябрьыште тунемаш тӱҥальым. Моло-влак занятийыш коштыныт. Аудиторийыш пурен шогальым, тушто кумло утла ӱдыр-рвезе шинчат. Тунам кужу, ваче марте кечыше ӱпан лийынам. Кызыт Анджела тунамсым шарналта да “Тракторист гай койынат” манеш. Ял гыч толшо рвезе вожылшырак лийынам. Ӱдыр-влак нерген огыл, утларакшым тунеме нерген шоненам.

мамаевмыт

Анджела дене палыме лиймеке, “Эх, тиде ӱдыр дене келшышаш ыле” манын вигак шоналтен омыл. Но Юмо тыге пӱрен: тиде ӱдыр дене келшаш тӱҥалынам да ӱмырем шуем. Колледжыште куштымаш занятий годым, мужырым ойыраш кӱлеш гын, моло ӱдыр-шамыч дек огыл, Анджела деке шогалам ыле. Тыге коктын кутыраш тӱҥална. Тӱшкагудышто пошкудо пӧлемыште иленна, моло йолташна-влак дене пырля занятийлан ямдылалтынна, пырляк кочкынна. Анджела поро, тыматле, мотор. Келшаш тӱҥалаш икымше ошкылым рвезе семын мый ыштенам. Варажым тудо мыйым армийыш ужатен, вучен. Толмекем, сӱаным ыштышна. Пырля улмыланна вашке 18 ий лиеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: