"Ой, йӧратымаш..." рубрик, 2015 ий, Пургыж тылзын 13-шо кечыже

Канде пиалем

Статьян авторжо Ирина Ямбаршева

Илышыште мыняр шуко йоҥылышым ыштена, да тыге пиалдыме лийына.
Самырыкем годым мыйым кугу канде шинчан да тыгаяк канде тувырым чийыше мотор ӱдыр йӧратен шынден. Ӱмбакем эре шыргыж ончен. Но нужна еш гыч лийын. Шошо гыч шыже марте эре канде тувырым чиен коштын.
Ӱдыр-рвезе-влак гоч паленам: тудо мыйым вуча, келшаш шона, но мый весым йӧратенам. Лӱддымӧ, торжарак, ӧрын-вожыл шогыдымо койышаным. Тудо эре у да мотор вургемым чиен. Лена шкеж деке пӧръеҥ-влакым магнит семын шупшын.
Кужун шонен омыл, Лена дене вашке кид кучен кошташ тӱҥалынна. «Канде тувыр» мемнам чӱчкыдын уремыште вашлийын да эре порын шыргыжын. Икана уремыште мый декем лишеме. «Пиалан лий», — мане да куржо. Пел ий гыч йытыра Ленукем дене ушненна. Тудо ешыштат тептердыме лийын, эре тореш товар гай руэн. Мый тудлан тыге илаш огеш лий манын умылтараш тыршенам. Но арам.
Ик кастене ваштареш тӱрлӧ кӱлеш-оккӱлым ойлыштмыжым чытен кертде эҥден пуэнам. Вара — суд, ик ий поселений. Ватем пел ий гыч ойырлен. Чыла поген налын. Эсогыл нигуш пӧртылаш лийын.
Шинчем парк теҥгылыште, воктенем мыйын гаяк суртдымо пий кия. Тунам тудын деч нимо дене ойыртемалтын омыл. Уло илышем шарналтем да шонем, кузе умбакыже лияш? Трук ужам: парк дене «канде тувыр» иеш. Тудо мый декемак вашка. Икте-весына ӱмбак кужун онченна. Вара сумкамым нале, вес кидше дене кидем кучыш да «каена» мане.
Тудын дене латвич ий иленна, кажне кечылан Юмылан тауштенам. Пелашемым «канде пиал» манынам. Ватем вучыдымын колен — шӱмжӧ кенета кырымым чарнен. Кузе тунам ушым йомдарен омыл, тачат ом пале. Туддеч вара тазалыкем чот лунчырген, шӱмем коршташ тӱҥалын.
Икана тошто фотокартычке-влакым ончымем шуын колтен. Шкафыш альбомлан пуренам да полкышто канде тувырым муынам. Тудым эн шергакан арвер семын оҥем пелен ӧндалынам. «Канде пиалем» шарналтенам да шортын колтенам. Трук чонемлан тугай сайын чучын. Очыни, ватем воктенем уке гынат, ондакысе гаяк мыйым йӧрата да перега манын каласынеже улмаш.
Пӧръеҥ-влак, самырык годсо шижмашдам аралыза. Моторлык почеш ида куржтал. Ӱдырамашын шӱмжым аклаш кӱлеш, а моторын петырыме тӱжвал сынжым огыл. Йӧратыза да пиалан лийза.
МИКЛАЙ.
Волжский район.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: