"Изи тӱня, кугу тӱня" рубрик, 2015 ий, Пургыж тылзын 6-шо кечыже

Кум омо

Статьян авторжо Татьяна Айтова

Таче тыланда илышыштем чыныш лекше кум омо нерген каласкалем. Нуным кызытат пеш раш шарнем.

Икымшыже изи улмем годым кончен. Пуйто ачам дене ала-могай палыдыме олаште улына, урем дене ошкылына. Трук корно покшелне лавыран кугу лакым ужына. Ачамлан тудым эртен каяш темлем, а тудо изи йочала келын эрта. Ачамым шке декем ӱжам, а тудо пуйто огешат кол, кидем шуем — огешат ончал. Омем нерген авамлан каласенам. Тудо нимом ойлен огыл, шӱргыж мучко шинчавӱд гына йоген. Кок кече гыч ачам колен. Тудын шодо рак улмаш. Саде лавыра лач тудын нерген шижтарен дыр.

Кокымшо омем авам дене кылдалтын. Шуматкече. Мончаш олтымо, шонем. Авам мончаш каяш вургемым ямдылкала. Тудым кок ий ончыч колышо Рита кокам ӱжаш толын, шонем. Пуйто тудо авамлан мом тынар юватылат, чыла шокшыжо пыта манын ойла. Помыжалтмеке, авамлан йыҥгыртем, тудын йӱкшӧ койынак шӱлыкаҥеш. Кок кече гыч авам  колыш. Тудым Рита кокай чынжымак налаш толын улмаш мо?

Кумшо омем мӱшкыран улмем годым кончен. Пуйто ала-могай моткоч шыгыр кевытыште шогем, калык пеш шуко. Ужар олмам моткоч чот налнем. Ужалыше ӱдырамаш деч пуйто 25 килограммым висаш йодам. Тудыжо  олмам виса да пуйто иктыштыже шукш уло манеш. Олмам пакетыш оптем да кевыт гыч лектам. Трук продавец мылам пӧлек шотеш пӧръеҥ упшым пӧлекла. Кевыт гыч моткоч куаныше лектам.

Ты омем ондак шотыш налын омыл, жап эртымеке гына чыла раш лие. Мыйын эрге икшыве шочо. Василекем моткоч полмезе да поро чонан ыле. 25 ияш улмыж годым тудым уремыште кырен пуштыч. Кугу ужар олма-влак  шинчавӱдым ончыктат улмаш.

Теве тыге илышыште лийшаш кум шучко увер нерген омо ончылгоч шижтарен.

Ольга.

Морко поселко.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: