"Изи тӱня, кугу тӱня" рубрик, 2015 ий, Пургыж тылзын 6-шо кечыже

Лаванде ден герань поян лияш полшат

Статьян авторжо Татьяна Айтова

Кугезе кочана ден кована-влак тӱрлӧ кушкылым, шудым сайын паленыт. Нуным тӱрлӧ чер деч эмлалташ,  осал вий деч аралалташ кучылтыныт. Кушкыл-влак дене пайдаланен, илышым саемдаш лиеш маныныт.

Осал шонымашан але кӧраныше  еҥ-влак деч аралалташ лӱмегож полша. Тудын дене ыштыме арверым ӱстембак шындыман. Тудо йырваш улшо уда энергетикым пытара.

Пашаште сеҥы-машыш шуаш манын, пӧлемын йӱдвел могырышкыжо кугу мотор кум лавр лышташым пыштыза.

Окса перкем аралаш лаванде ден герань полшат. Нине коштымо пеледыш-влакым оксагалташкыда пыштеда гын, тудо нигунамат яра огеш лий.

Неле йодышлан кӱчык жапыште чын вашмутым муаш пӱнчӧ полша. Ты пушеҥгын ӱйжым вургемышкыда йыгыза але пӱнчӧ укшым ӱстембак конден шындыза.

Нойымо але стресс годым кедр пайдале. Тудо южым яндарешта, осал энергийым пытара, тазалыкым саемдаш полша. Суртыштыда черле еҥ уло гын, малыме вакшыш ӱмбакыже кож, кедр але пӱнчº фотом пижыктыза.

Пачерлан поро шӱлы-шым пурташ арымшудо полша. Тидлан пӧртыштӧ арымшудо вынькым йӱлалтыза але арымшудо вӱд дене кӱварым мушса.

Удам шонышо пошкудо деч аралалташ манын, омса ӱмбаке пелчан (чертополох) выньыкым сакыман. Тыгак тидлан шоганым кучылташ лиеш. Тичмаш тылзе годым шоганым пелыгыч пӱчса да омсан тӱжвал ден кӧргӧ могырышкыжо ик суткалан пыштыза. Тыге пӧрт гыч чыла осал шӱлыш йомеш.

Весела кумылым да вийым ешараш манын, куэ воктене шогыман, чот неле годым тудым ӧндалашат лиеш. Тыгодым тополь дене тӱткырак лийман, тудо ӱдырамаш пиалым поген налын кертеш, маныт.

Сай илыш пелашым муаш шонеда гын, вишне дене пайдаланыза. Тудо пиалан,  волгыдо йӧратымашым сӧра. Тидлан кушшо тылзыште вишне вареньым кочман, компотым йӱман, суртышто вишне фотосӱретым сакыман. Тыгак окнаш, кече логалме верыш, вишне укш-влакым пыштыман.

Моторлыкым аралаш манын, кушшо тылзе годым персикым кочса, а томжым сумкашкыда пыштыза да тудым талисман семын аралыза. Тыгак эре сылне да самырык лияш манын, пеледше олмапу воктене войзалташ кӱлеш. Ты снимкым пачерысе эн кугу пºлемын пурла могырышкыжо сакыман.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: