"Илыш йогын" рубрик, 2015 ий, Пургыж тылзын 26-шо кечыже

“Марий калык кочмыверыште марий-влак тыршышаш улыт…” — ойла “Сандал” кафем вуйлатыше Антон Сергеевич Волокитин.

Статьян авторжо Денис Очиев

Сандал4

Ӱярня пайрем годым чыланат тамле мелнам кочнешт. Но газ плиташте кӱэштме мелна, вес таман. Садланак ты кочкышым шарналтымеке, ял ушыш толын пура. Пытартыш жапыште рӱдолаштына тиде йодыш огеш лек. Молан манаш гын марий калык кочкышым сийлен ончынет гын, ава але кова деке ялыш кудалаш огеш кӱл, а Йошкар-Оласе “Сандал” кафешке миен толаш лиеш.

“Сандал” марий калык кафе 2011 ийыште почылтын. Мо оҥайже, тыгай кочмыверым почмо шотышто вес кундем гыч илаш толшо-влак йодышым луктыныт. Ирина Дмитриевна Волокитина шкеже Угарман гыч. Йошкар-Олашке шукертак ила. Уло илышыжым кочмывер-влак дене кылден. Повар да шеф-поварлан 40 ий наре ыштен. Шке вийлан ӱшанен, ондак кочмыверым почын, вара – пекарньым. “Сандал” кафе – еш бизнесыште кумшо предприятий.

- Авамлан эреак оҥай лийын, марий мландыште илена, а молан ты кундемысе калык кочмывер уке. Садлан еш бизнесым кумдаҥдыме шотышто йодышым нӧлталме годым, лач тидланак пижме. Жап ончыктен: тиде сай шонымаш лийын, — ойла кафем вуйлатыше А.Волокитин.

Кызыт Ирина Дмитриевналан икшывыже-влак полшат. “Сандалыште” пашам Антон эргыже эскера. Ирина Дмитриевна вуйлатыше огыл гынат, кухньысо пашам терга, южгунам шкеак плита ончыко шогалеш.

“Сандалын” менюжо поян. А марий кочкыш эреак икымше верыште. Тыште команмелнамат, подкогыльымат, соктамат да тулеч молымат кочкаш лиеш. Ирина Дмитриевна кафем почмо деч ончыч уло республикым кудалышт эртен. Кажне районышто рецептым поген коштын. Кажнын шке ойыртемже. Садлан повар-влаклан нунын кокла гыч икгайрак рецептым ойырен налаш логалеш. Ондак ялысе мӱй пӱрым подылаш лийын гын, пытартыш жапыште тудым пура дене вашталтеныт. Кочмыверын менюжо арнялан ик гана вашталтеш. Марий кочкыш нигунам огеш вашталт, вет тидыже кафен тӱҥ ассортиментше. Тылеч поснат меню поян. Шеф-повар-влак у тӱрлӧ кочкыш дене куандараш тыршат.

“Сандал” — еш проект. Садлан пашаеҥ-влакат ешыште гаяк ваш пагален пашам ыштат. Таче кечын тушто куд еҥ уло.

- Мемнан пашаеҥна-влак чыланат профессионал улыт. Еҥ-влак дене пашам ыштен моштат. Юмылан тау, тыгай коллективым поген кертынна. Тӱҥжӧ – марий кочмыверыште марий-влак тыршышаш улыт. Садлан пашаш налме деч ончыч мый нунын профессионализм улмыштым гына ончен омыл. Поварна-влак квалификацийым нӧлтымӧ курсышто тунемыт. Тидыжат мемнан менюн качествыже нерген ойла, — каласкала А.Волокитин.

Кочмыверыште кеч-могай кечын эр гыч кас марте шуко еҥ. Залыште 30 еҥ иканаште кочкын кертеш. Пӧлем пеш кугу огыл гынат, сӱан да корпоратив-влак чӱчкыдын лиедат. Тыгак телефон дене йыҥгыртен, мӧҥгӧ але предприятийлаш кондаш йодаш лиеш. Марий кочкышым рушат, марият тамлен кочкыт. Турист-влак чӱчкыдын толыт. Ынде йӱлаш пурен докан: Йошкар-Олашке вес регион але эл гыч толшо-влакым тушко пуртат.

- Кодшо кугарнян Китай гыч делегаций сийлалт кайыш. Менюнам палемдышт да таум ыштышт. Чӱчкыдын мемнан дизайным моктат. Кочмыверым почмо деч ончыч тидын шотышто кужун шонымо. Но ик тале дизайнерын пашаже мыланна келшен. Проект почеш, залыште чылажымат шке кид дене ыштыме. Шкеат ужыда, мемнан тыште марий калык илыш-йӱлалан келыштаралтын, — куанен ойла кафе вуйлатыше.

Кугурак пӧлем шотыштат вуйлатыше тургыжлана. Вет кафеште кечывал кочкыш годым яра верым от му. Чиновник-влак денат мутланен, вес пӧлемымат кычалын, но тӱрлӧ амаллан кӧра тиде йодыш вер гыч тарванен огыл. Лишыл жапыште тудым уэш нӧлталаш шона.

Туге гынат “Сандал” лӱман калык кафе нерген республикыштына гына огыл палат. Ты кочмывер Йошкар-Ола, Пролетарский урем, 46 №-ан пӧрт адрес дене верлана. Кажне кечын 10 гыч 22 шагат марте тендам вуча. Лекше йодышым (8362) 44-88-09 телефон номер дене рашемден кертыда.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: