"Рубрик деч посна", 2015 ий, Пургыж тылзын 6-шо кечыже

Пашаче еҥ шӱртня, но ок камвоч

Статьян авторжо Ирина Степанова

30 январьыште Марий Эл Республикысе Мер-политике рӱдерыште Марий национальный конгрессын отчет да сайлымаш конференцийже эртыш. Тушко республикнан чыла гаяк районжо гыч 70 наре еҥ толын ыле.
Конгрессым вуйлаташ уэш ик йӱк дене Эдуард Александровым сайлышт, а вуйлатышын алмаштышыжлан Наталья Пушкинам палемдышт.

Марий национальный конгрессын исполкомыштыжо тений изирак вашталтыш лие. Ӱмаште тушто 31 еҥ пашам ыштен гын, тений 22 еҥым веле кодышт. Самырык-влакым ушаш кӱлеш манын палемдышт.
Э.Александров эртыше идалыкысе паша дене палдарыш. Конгресс тӱрлӧ мероприятийым эртарымашке ушнен: Курыкмарий районышто “Акпрас” радион визымше идалыкшым палемдымаш, У Торъял кундемыште Онарлан стелым шогалтымаш, Оршанке районышто сонарзе биатлоным эртарымаш, Марий Талешке, Тиште кече-влакым палемдымаш, Пеледыш пайрем да молат.
Шке кундемыште могай мероприятий-влакым эртарыме нерген исполкомын еҥже-влак Любовь Михеева (Параньга район) ден Евгений Небогатиков (У Торъял район) каласкалышт. Конгресс исполкомын членже, амалкалче Виктор Наумов 2015 ийыште мер илышыште шкеныштым чолган ончыктышо кум еҥлан 5000 теҥге дене премийым пуаш шонымыжым палемдыш. Тидым чылан сайлан шотлышт.
Марий национальный конгрессын 2015 ийланат планже кугу. Тений Марий Эл Республикылан 95 ий темеш, районлаште ятыр писательын лӱмгечыже эрта, адак Пеледыш пайрем шуэш… Икманаш, конгрессын еҥже-влак кажнышкыже ушнаш шонат.
Пытартышлан Марий Эл Республикысе тӱвыра, печать да национальность паша шотышто министрын алмаштышыже Г.Ширяева Л.Михеева ден Е.Небогатиковлан министерствын Чап грамотшо-влакым кучыктыш.

Ирина Степанова.
Д.Речкинын фотожо.
Погын1

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: