"Рубрик деч посна", 2015 ий, Пургыж тылзын 26-шо кечыже

Президент деке вашлиймашыш

Статьян авторжо Эльвира Терентьева

Элнет4

18 февральыште Татарстанысе Алабога олаште “Идалыкын ӱдырамашыже, идалыкын пӧръеҥже, ӱдырамаш ончалтыш” республиканский фестивальын зональный этапше эртыш.

Тушко Татарстанысе куд район гыч участник-влак миеныт. Нуно шке мастарлыкыштым тӱрлӧ номинацийыште ончыктеныт. “Идалыкын пӧръеҥже” ден “Ӱдырамаш – ава” номинацийлаште сеҥышыш марий калыкын шочшыжо-влак лектыныт. Икымшыштыже Алабога районысо Кӱплык ял поселенийым вуйлатыше Аркадий Борисович Бахметов сеҥен.

Теве Менделеевск район гыч ныл конкурсантке толын. Элнет ялысе библиотекарь, вич шочшан ава Татьяна Семякова “Ӱдырамаш–ава” номинацийыште икымше верым сеҥен налын. Татьяна Николаевналан пелашыже, вич шочшыжо, ковашт, кочашт да Александра тукым шӱжарже полшеныт. А эн изи ӱдыржӧ Джастиналан 23 февральыште идалык теме, тудо эше “чапам налын” огылат, сценышке ходунки дене лектын.

Участник-влаклан шке мастарлыкыштым ончыкташ улыжат вич минут пуалтын ыле. Эн ончыч Татьяна Николаевнан кок изи эргыже, 2 классыш коштшо Кристиан ден Элнет ялысе йочасадын воспитаннникше Себастьян, ава нерген почеламутым марла лудыч, Александра – татарла. Алабога медучилищыште медсестралан тунемше Кристина ден Набережный Челна оласе кадет классыште тунемше Анжелика тыгак ава нерген почеламутым лудыч. Вара Татьяна пашаже да ешыж нерген каласкалыш. Мучашлан пелашыже, чыла шочшыжо пырля ош марий вургем дене марла кушталтен ончыктышт. Снимкыште эше Татьянан аваж ден ачажым, Елена Александровна ден Николай Александрович Ивановмытым ужыда.

Менделеевск район гыч мийыше ныл конкурсантке кокла гыч Татьяна сеҥымаш дене мӧҥгышкыжӧ пӧртыльӧ. Тудлан дипломым кучыктеныт да 5 мартыште Озаҥ олашке Татарстанын Президентше дене вашлиймашке мияш ӱжыныт.

Семяковмыт еш шке мастарлыкше дене, чынжымак, ойыртемалтеш. Суртоза Степан Анатольевич Элнет ялысе тӱвыра да каныме пӧртым вуйлата. Татьяна дене пырля коктын ятыр жап “Элнет” калык ансамбльыш коштыт.

Геннадий Мальгин,

Татарстан Республикысе культурын сулло пашаеҥже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: