"Ой, йӧратымаш..." рубрик, 2015 ий, Пургыж тылзын 13-шо кечыже

Эртыше корным поран ӱштеш

Статьян авторжо Ирина Ямбаршева

Витя Йошкар-Олаште ынде ятыр ий ила, ик фирмыште пашам ышта. Тӱрлӧ олашке сатум шупшыкта. Тиде ганат, палемдыме верлаш миен савырнымеке, кодшо гана шогалме кафешке кочкаш пурыш. Тудо ола тӱрыштырак, шып уремыште верланен. Тыште ласка, йоҥгыдо.
Уремыште поран ӱштеш, ошын веле коеш, шинчамат почаш огеш лий. Мӧҥгӧ марте шуко кодын огыл гынат, тыгай игечыште кудалаш лӱдыкшӧ. Мардеж ала изиш лыплана манын, Витя огеш вашке. Окнаш ончен шинчылтеш, тӱрлым шонкала. Кафе ончыко машина кудал толмым ужо. Витя тудым шотышкат ыш нал, но чонлан ньыге-нюго чучын колтыш. Моланжым Витя шкежат огеш умыло.
Омсашке Люда пурен шогале. Тиде ӱдырамаш Витялан ала-кунам Юмынӱдыр гай чучын, а вара ужмышудымо лийын. Тудын деч ик гана веле огыл куржын, но адак да адак пӧртылын. Люда шкежат Витям шӱдӧ гана кудалтен каен да уэш пӧртылын. Люда — Витян икымше ватыже. Тудын дене вич ий иленыт. Но вара Витя кенета вигак чыла кӱрлын. Тыге илен ноен. Шкенжын ушкалымыже, Людан вес пӧръеҥ-влак дене пернылмыже да кажне гана тумам тарватымыже шерым теменыт.
Но вашке Витялан пиал шыргыжалын. Тудо чонлан келшыше ӱдырамашым вашлийын. Тылеч вара Витя Людам ужынат огыл, да теве тиде вашлиймаш. Эше йӧршеш вес олаште.
Людмила, яра верым кычалын, йырваш ончале. Кӱчык курткым кудашын, пошкудо ӱстелтӧрыш пурен шинче. Люда тугаяк мотор, пуйто пӧръеҥымак сымыстараш шонен, вичкыж кидше дене ваче ӱмбач ош ӱпшым лупшал колта. Витя мом ышташ огеш пале: тыгай лум тӱтаныште тарванен кудалме огеш шу. Но Люда кенета тудым ужо.
- Шинчамлан ом ӱшане! Витя? Тый? Тыште? Тиде, очыни, пӱрымаш. Поран тыйым тышке ӱштын кондыш мо? — пӧръеҥым сымыстарен шыргыжеш.
Витят вашеш шыргыжале.
- Ну мо, салам, — мане. — Тунамсе пылде-полдо койышет деч утлен отыл?
- Айда, ит ойлышт. Вашлийынна гын, икте-весым уждымыла кояш мо? Мый тыйын воктекет шинчам?
Поран лӱшка да лӱшка. Чарнаш огешат шоно. Витян чоныштат пуйто тыгай тӱтан тарваныш. Мом ышташ, кузе шкем кучаш, огеш пале. Лектынат ошкылнеже ыле, амалым ыш му.
Витя Люда дене палыме лиймыжым сайын шарна. Ик фирмыштак пырля пашам ыштеныт. Икте-весышт деке ик банкетыште лишемыныт да вашлияш тӱҥалыныт. Икмыняр жап гыч Витя пырля илаш темлен, вара возалтыныт. Ондак чыла сай лийын. Вес пӧръеҥ-влак йыҥгыртеныт, Люда нунын дене койышланен мутланен гынат, Витя тидым шотыш налын огыл. «Пашам мыйын тыгай», — умылтарен ӱдырамаш. Да Витя лыпланен, тыгак лийшаш манын шонен. Ондак Людан кажне пӧръеҥ дене койышланымыже оҥайын чучын, шыргыж ончен. Вара сыраш тӱҥалын. Мучашлан чонешыжак витен.
Икана Витя командировко гыч пӧртылын, а Люда – уке, пелйӱд деч вара веле толын пурен. Витям ужмеке, чот ӧрын:
- Тый? Молан таче? Кум кече гыч веле толшаш улат ыльыс… Окнаште тулым ужмеке, моткоч лӱдым…
- Ит лӱд, тиде мый. Ондакрак пашам пытараш тыршышым, тый декет вашкышым. Ынде вет шкетын омыл, воктенем улат да вашкерак ӧндалтышышкет пӧртылмем шуэш, палет тидым?
- Палем, йӧратымем.
«А кушто пелйӱд эртымеш коштынат?» манын йодмо деч Люда моткоч мастарын утлыш. Тидын нерген Витя вес гана, жап эртымеке веле шоналтен.
А кызыт пӧръеҥ шинчаш тура ончен ойла:
- Витя, айда мый декем каена. Кызыт тыште, Озаҥыште, улам, ик фирмыште пашам ыштем, тышеч тораштак огыл илем. Мый денем пурлына иктаж-мом.
- Уке, Люда. Унала ӱжметлан тау. Мый тый денет ӱмырем мучкылан кочкын темынам, — мане да омса декыла тарваныш. Тудлан йыҥгырташ кӱлын. Йӧратыме ватыжын йӱкшым колмыжо шуын. Марина кужун ыш вучыкто, вигак вашештыш:
- Колыштам, йӧратымем. Мыйын чыла сай. Тыйым моткоч ужмем шуэш. Кунамрак толын шуат?
- Иктаж кок шагат гыч, — вашештыш Витя да ӱстелтӧрышкӧ пӧртыльӧ.
- А кас кочкышым лучо тушманлан пуаш, маныт, сандене чеверын, сайын код, Люда, — мане да каяш тарваныш.
Поран изиш лыпланен, тунар огеш лӱшкӧ, лӱдде кудалаш лиеш. Вет мӧҥгыштӧ йӧратыме пелаш вуча. Адакшым таче миенак шуман. Вет пырля илымыштлан шуко огыл гынат, кум ий. Адакшым таче — Йӧратыше-влакын кечышт, а нуно лач ты кечын вашлийыныт. А эртыше арам огыл туге маналтеш, тудо теҥгечысеш кодын.
И.НИКОЛАЕВА.
Йошкар-Ола.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: