"Кузе илет, эрвел марий?" рубрик, 2015 ий, Пургыж тылзын 6-шо кечыже

Шаран Усола гыч чолга ӱдырамаш

Статьян авторжо Ирина Степанова

эрвел17Пошкырт кундемыште марий-влак тӱшкан Шаран районыштат илат: чылаже 14 марий ял верланен. Кажныштыже шуко чолга марий еҥ уло. Шке тӱвыранам, йӱланам арален кодаш манын, нуно шуко тыршат да чыла тидым йочан чонышкыжо шыҥдарат. Тушеч иктыже – Башкортостан Республикысе образованийын отличникше, кӱшыл категориян туныктышо Людмила Шамыкаева.
“Мый Еммет ялеш 10 икшыван ешеш шочын-кушкынам. Ешыштына кажныже мураш-кушташ, гармоньым шокташ йӧратен. Ялем пеш мотор вереш верланен: йырымваш — курык-влак, Сюнь эҥер йога, — ойла Л.Шамыкаева — Ынде Усола ялыште илем да 29 ий тысе тӱҥалтыш класслаш коштшо йоча-влакым туныктем. Тиде авамын шочмо ялже. Школна тӱҥалтыш гына, тудо Акпарс школын филиалже. Мемнан дене 9 йоча тунемеш. Тыгак куд икшыве тыштак верланыше садик группыш коштеш. Школыштына мый да ик воспитатель тыршена”., -ойла Людмила Мурзабаевна.
Ты ӱдырамаш шке шочмо кундемжым моткоч йӧрата. Марла мураш-кушташ гын поснак мастар. Тыгак тӱрлӧ пайремым уло кумылын вӱда. Икманаш, тачысе йылме дене каласаш гын, компанейский айдеме. Людмила Мурзабаевна школ деч вара 1985 ийыште Благовещенскысе педучилищым тунем лектын, вара — Бирск пединститутым. Тудо шке пашажым моткоч йӧрата, йоча-шамычлан уло вийжым, мастарлыкшым пуаш тырша. Нунын дене пырля тӱрлӧ мероприятийым эртара. Кажне мероприятийже йочан чоныштыжо могай гынат палым кодыжо, сайлан туныктыжо манын шона.
Тыгак ты ӱдырамаш Усола клубышто пел ставкылан художественный вуйлатышылан тырша. 24 ий наре «Ош пеледыш» ӱдырамаш-влак калык ансамбльым вуйлата. Тушко тӱрлӧ профессиян ӱдырамаш-шамыч мураш коштыт. Улыт пенсионер-шамычат. Коллективын репертуарже тӱрлӧ. Мурат калык, эстраде муро-влакымат. Гармонистышт Сергей Атнагузин шкеак мурым воза да ансамбльлан мураш пуа. Ӱдырамаш-влак гармонь, фонограмме почешат кумылын выступатлат. Ансамбль чӱчкыдын тӱрлӧ верыш лектын коштеш, фестиваль ден конкурслаш кумылын ушна. Теве шукерте огыл Бирскыште лийше финн-угор калык-влакын фестивальыштышт шке мастарлыкшым ончыктен. Ансамбльын костюмжо-влак мотор улыт. Тудым ӱдырамаш-влак Йошкар-Олаштат налыныт, шкеат ургат.
Южгунам шоналтет: кунам ты ӱдырамашын жапше чылалан сита. Вет тиддеч посна тудо “Чолга шӱдыр” йоча фольклор ансамбльым чумырен да вуйлата. Шуко мер пашам шукта. Акпарс ялсоветын ӱдырамаш ушемыштыже тырша, ты кундемысе туныктышо-влакын методруководительже, сайлымаш годым комиссийым вуйлата. Верысе «Шаранские просторы» газетын эн активный  корреспондентше.
Марий ӱдырамаш-влак лач тыгай улыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: