"Улам мый Рве-зы-лык!" рубрик, 2015 ий, Пургыж тылзын 26-шо кечыже

Статьян авторжо Денис Очиев

Сценыштат, уремыштат шокта

И.Палантай лӱмеш тӱвыра да сымыктыш колледж талантан студент-влаклан поян. Кӧ мура, кӧ кушта, кӧ семӱзгар дене шокта, но ик тунемшым студент-влаклан эреак пример семын палемдат. Эльфис Гараев ты колледжыште 4 курсышто тунемеш. Рвезе “Балайке” специальностьышто шинчымашым пога гынат, шуко семӱзгар дене талын шокта.

Эльфис Параньга посёлкыште шочын-кушкын. Ачаж ден аваже могай профессийым ойырымо шотышто эргылан нимом ойлен огытыл. Рвезе шкеак ты корным ойырен налын. Йоча жапыште военный лиймыже шуын. Но кугурак класслаште шонымашыже вашталтын.

- Шымше классыште тунемме годым шаланыше гитаре кидышкем логалын. Мый тудым ачален ончышым. Вара шокташ тунемынам. Лач тунамак умыленам: семӱзгар-влак дене пашам ышташ келша. Тиде гитаре мыйым музык корныш луктын, — ойла Э.Гараев.

Туге гынат ик амаллан кӧра рвезе илышым музык дене кылдаш эше шонен огыл ыле. 9-ше класс деч вара Эльфис Параньгасе ПТУ-ш тунемаш пурен. Но ты профессий тудлан келшен огыл, садлан шонымашыжым шукташ манын, И.Палантай лӱмеш тӱвыра да сымыктыш колледжыш тунемаш толын. Икмыняр жап гыч армийыш наҥгаеныт. Службо Североморск олаште эртен. Эльфис “Морзен азбукыжым” вашке тунем шуктен, садлан радиотелеграфист лийын. Армий деч вара колледжышкак тунемаш пурен.

Эльфис калык семӱзгар-влак дене шокташ йӧрата. Садлан колледжыш пурымо деч ончыч, могай специальностьым ойырымо шотышто кужун шонен. Кызытат ойлен огеш керт, молан балалайкым ойырен налын. Вет тудо фортепиано, шӱвыр, флейте да тӱмыр дене шоктен мошта.

- Шкет шокташ сай, но калык семӱзгар-влакым ик оркестрыш погаш гын, могай чапле сем лектеш. Оркестрыште тӱмырым перкалем, — ойла тудо. Гитар дене шокташ шукын йӧратат, но молыжо шукыж годым ӧрдыжеш кодеш. Конешне, тидым кажныже ыштен огеш керт, вет семым шижаш кӱлеш. А самырык-влак пуйто калык семӱзгар нерген монденыт гай.

Чыла семӱзгар кокла гыч тӱмыр Эльфислан эн лишыл. Тудын ойлымыж почеш, тӱмыр йӱк дене чонжо ылыжеш. Эше колледж деч ончычак рвезе ты семӱзгарлан шуко жапым ойырен. Урок деч вара, яра жапыште тунемын. Тӱрлӧ мероприятийлаште тӱмырым кырен. Колледжыште талын шоктышо рвезым ты семӱзгар дене специалист да преподаватель В.Фанарев ужын. Кызытат Эльфисым тудак туныкта. Рвезе шуко жапым шке гыч тунеммылан ойыра, интернетлан эҥерта.

Эльфис тӱрлӧ конкурслаште чӱчкыдын участвоватла. Мутлан, шукерте огыл шӱвырзӧ Иван Каменщиков да мурызо Марина Садова дене пырля Германийысе Ольденбург олаште “Изи эл-влакын евровиденийыштышт” выступатлен. Жюри нуным палемден.

- Тушто немыч, француз, португалец да молат выступатленыт. Ме элнан чапшым араленна. Российыште шуко калык ила гынат, ты конкурсышто лач марий муро йоҥген, — ойла Э.Гараев.

Кызыт Эльфис “Марий Эл” куштышо кугыжаныш ансамбльыште пашам ышта. Тӱрлӧ семӱзгар дене шокта. Тудым тушко ӱмаште ӱжыныт. Самырык еҥ ондак профессионал семын тыршен огыл гынат, коллективыште тудым вашке аклаш тӱналыныт. Ансамбль дене пырля тӱрлӧ элышке миен коштын. Тушто верысе музыкант-влак дене палыме лийын. Нунын деч иктаж ум тунемаш тырша.

Эльфис – пашам ыштыше студент. Садлан жап моткоч шагал.

- Паша шуко, садлан мӧнгышкат шуэнрак миен толам. Тушто изиш каныме гай чучеш. Каныш годымат колледжыште семӱзгар дене шоктем, — ойла рвезе.

Кеҥежым Йошкар-Оласе Сеҥымаш бульварыште Эльфисым чӱчкыдын ужына докан. Тушто тудо арняште икмыняр гана тӱмыр установко дене шокташ тырша. Уремысе музыкантын талын шоктымыжым калык куанен онча да колыштеш. Тыгак рвезым сӱанлашке але иктаж мероприятийлашке йӱк режиссёр семын чӱчкыдын ӱжыт.

- Музык – мыйын хоббием да йӧратыме пашам. Садлан мастарлыкем вияндаш тыршем, — каласыш Э.Гараев.

гараев

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: