"Улам мый Рве-зы-лык!" рубрик, 2015 ий, Ӱярня тылзын 13-шо кечыже

Калыкшын йӱлажым пагалымаш куштымашыж да кидпашаж гыч коеш

Статьян авторжо Анастасия Эманова

Мухайёхон Абдуллаевам ӱмаште Марий Эл Республикысе национальный культур шотышто самырык-влакын фестивальыштышт ужынам. Чолга ӱдыр узбек национальный куштымашым мастарын куштен ончыктен.

Малика Абдуллаева Марий Эл Республикысе национальный культур шотышто самырык-влакын фестивальыштыштМухайёхон лӱмым ойлаш нелырак, садлан шукынжо тудым Малика маныт. Узбек ӱдыр Таджикистанысе Гафуров олаште шочын. 2003 ийыште Абдуллаевмыт еш Марий Элыш, Килемар посёлкыш, илаш куснен, тунам Малика школыш веле каен улмаш. “Марий кундемыш кочана эн ончыч илаш толын ыле. Тудо Йошкар-Оласе текстиль заводышто инженерлан пашам ыштен. Вара кочамлан Килемар районышто ятыр сай мланде уло манын ойленыт. Тудо тушко каен. Эн ончыч Трёхречье ялыште пашам ыштен. А вара 2000 ийыште Килемар посёлкышто пекарньым почын. Кызыт тудым ачам вуйлата, а авам тушто бухгалтерлан ышта, - ойла М.Абдуллаева. — Ешна кугу. Кок изам уло. Иктыже ПГТУ-што нылымше курсышто тунемеш, весыже – Озаҥысе ик университетыште кокымшо курсышто. Суртышто шочмо йылме дене кутырена, чыла манме гаяк йӱлам шукташ тыршена. Кугыеҥ-влак дене “те” манын кутырена, мый изам-влак денат тыге мутланем. Тидыже пагалымашым ончыкта. Конешне, кызытсе саманыште южо йӱла ок шукталт, но сӱан традиций вашталтын огыл. Мутлан, сӱаныште ӱдыр кажне уна ончылно вуйжым савышаш. Йӱла почеш, каче ден ӱдыр кум гана тул йыр коштын савырнышаш улыт. Ожно качын йолташыже-влак сӱан годым ӱдырын суртыштыжо мом-гынат шолыштшаш улыт ыле, кызыт лӱмын ямдылыме пӧлекым шыпак луктыт. Икманаш, узбек калыкын тӱвыраже да йӱлаже оҥай да шкешотан”.

Малика МарГУ-со калык-влак кокласе кыл факультетыште англичан, француз да немыч йылме-влакым тунемеш. Тылеч посна мер пашаште тырша. “10-шо класс гычак “Молодая гвардия Единой России” молодежный организацийын членже улам. Ты организаций лидер семын кушкаш полша. Организацийын регионысо отделенийже шуко пашам шуктен шога. Ме ятыр мероприятийым эртарена: мутлан, концертым, тӱрлӧ темылан “йыргешке ӱстелым” да йодыштмашым. Ӱдыр-рвезе-влак осал корныш ынышт шогал, поро пашалан кумылаҥышт манын тыршена. Йошкар-Олаште студент, школышто тунемше-влак дене чӱчкыдын вашлиймашым эртарена. Ик тыгай вашлиймаште ӱдыр-рвезе-влак, гитарым шоктен, шке шонымо мурыштым муреныт, почеламутым лудыныт. Ӱмаште тыгак Йошкар-Оласе “Детство” рӱдерыш миен коштынна. Тушто йоча-влак мемнам шокшын, шинча йӱлен вашлийыныт. Нуным тӱрлӧ модыш дене модыктымо. Жапым пеш пайдалын да веселан эртарыме. Ме огыл, нуно мыланна куаным пӧлекленыт.

Молодая гвардия Единой России” организацийын регионысо пӧлкаже Йошкар-Олаште верланен, ончыкшым районлаште тудын штабше-влакым почаш шонымаш уло. Тидлан кыртмен тыршаш тӱҥалына.

Мый тыгак Марий Элыште илыше калык-влакын молодежный ассамблейыштышт шогем. Тушто узбек самырык тукымын представительже улам”, - манеш ӱдыр.

Малика шке калыкшым моткоч пагала. Тӱрлӧ мероприятийыште узбек национальный куштымашым кушта. “Школышто 7-ше класыште тунемме годым аэробике дене заниматленам. Тидыже куштымашлан кумылаҥден, очыни. Кызыт Ленин лӱмеш тӱвыра полат пеленсе “Simd” кавказ куштымаш-влак студийыш коштам. Тушто Виктория Воронцован вуйлатымыж почеш лезгинкым куштена”, - ойла тудо.

М.Абдуллаева яра жапыште книгам лудеш. Психологий дене кылдалтше литературым йӧрата. Кызыт Л.Н.Толстойын “Война и мир” роман-эпопейжым угыч лудаш шона. Малика тыгак куштылго атлетике дене заниматла. “Спорт ӱнарым ешара. Таҥасымашлаште вием ом терге, лач шке семынем куржталыштам. Тыгак изинек кидпашалан кумылан кушкынам. Пидаш, тӱрлаш, бисер дене тӱрлым ышташ келша. Пашаштем национальный орнаментым кучылтам. Чон-кумыл паша лыпланаш полша, кид-лывыргылыкым вияҥда. Ятыр кидпашам пӧлек шотеш кучыктем. Изамлан йӧратыме футбол командыжын эмблемыжым пидынам ыле. Пеш куанен”, - манеш Малика.

Малика чылажымат мучаш марте шукташ тырша. Кугезе коча-коважын йӱлаштым, тӱвыраштым арала да пагала.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: