"Кузе илет, эрвел марий?" рубрик, 2015 ий, Ӱярня тылзын 20-шо кечыже

Лира ден Лера

Статьян авторжо Ирина Степанова

лирааПошкырт вел Балтач районышто илат йыгыр пелаш Лера ден Лира. Коктынат туныктышо улыт, ик школыштак пашам ыштат. Акак-шӱжарак Саитовамыт 1980 ий февральыште Пошкырт кундем Балтач район У Теперыш ялеш шочыныт. Верысе школ деч вара 1997 ийыште Йошкар-Олашке толыныт да МарГУ-со историй ден филологий факультетыш тунемаш пуреныт. Нине ӱдыр-шамычым пеш шарнем: икгай улмыштлан кӧра кудыжо кӧ улмым пален огынал, садлан когыньыштымат Лера-Лира манын ойлена ыле (кызыт Лераже ӱпшым ошыш чиялтен да вес тӱрлынрак коеш).
Шахмат, теннис денат модеш
2002 ийыште, кидеш дипломым кучен, коктынат шочмо кундемышкышт пӧртылыныт. Лира Навиевна Балтач районысо Зилязекуль кыдалаш школышто 2 ий руш йылме ден литературым туныктен, вара тысе Мата ялысе пелекыдалаш школышто марий йылме да литератур предметым вӱден. Вара ик жап школым коден каен, кум ий наре Андрей эргыж дене декретыште шинчен. 2008-2010 илаште Йыванай ялысе йочасадыште воспитательлан ыштен.
«2011 ий гыч кызытсе пагыт марте Шавъяде ялысе кыдалаш школышто пашам ыштем. Тыште мый руш йылме да литератур, марий йылме да литературым туныктем. Ынде нылымше ий школысо йылмым туныктышо-влакын методушемыштым вуйлатем. Школысо ГИА да ЕГЭ комиссийлаште пашам шуктен шогем», — ойла Лира Навиевна Давлетбаева. Кызыт тудо икымше категориян туныктышо лияш аттестацийым эрта.
Пидеш, почеламутым возкала
Валерия Навиевнат туныктышыланак тырша. Ондак Балтач районысо Мата пелекыдалаш школышто марий йылме ден литературым туныктен, вара Зилязекуль, Ӱлыл Сикияз, У Теперыш школлаште ыштен.
2011 ийыште У Теперыш школ реорганизацийыш логалеш: Валериялан йöратыме пашам кудалтен, Свердловск область Нижний Тагил олаш пашам кычал каяш перна. Тушто кок ий ужалышылан да кугурак кассирлан тырша. 2014 ий апрель гыч Шавъяде кыдалаш школыш толеш, директорын туныктымо да воспитатлыме паша шотышто алмаштышыже. Тыгак руш йылме да литература, историй да обществоведений предмет-влакым вӱда. Яра жапыште пидеш, почеламутым воза, спорт дене заниматла.
Яра жапыште тысе туныктышо-влак тÿрлö куштымо конкурсыш ушнат. 2014 ийыште школ коллектив районысо «Кушталте, йолташ» конкурсышто 3-шо верым налын. Коллектив районысо тÿрлö ялыште выступатла.
Теве тыгайрак улыт Лера ден Лира — йӧратыме туныктышо-влак.
Ирина Ябердина.
Фотом еш альбом гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: