"Рубрик деч посна", 2015 ий, Ӱярня тылзын 20-шо кечыже

Нӧшмӧ (семена) таза лийже манын

Статьян авторжо Ирина Степанова


рассадаТиде ой-каҥаш тыланда поян саскам налаш полша.

Ондак мландым ямдылыза: рокым (налмым але шыжымак ямдылен кодымым) пилашӱк (опилке) дене варыза. Ик ведра мландылан ик литран банке пилашӱк кӱлеш. Тыге мланде шӱштыра да пушкыдо лиеш.
Южо еҥ рокым вес семын ямдыла: кок ужаш рокым, ик ужаш тургыжым (перегнойым), ик ужаш торфым да тынарак ошмам пырля вара. Ямдылыме мландым ик арнялан йӱштырак верыш шындаш гын, эше сайрак. Нӧшмым ӱдымӧ деч ончыч рокыш марганцовко вӱдым шавыман (10 литр вӱдлан 5 г марганцовко).
Ынде нӧшмым ямдылена.
- Помидор нӧшмым пел шагатлан марганец вӱдеш нӧртыза (1 литр вӱдлан 1 г марганцовко), вара шӱалтыза. Ночко лапчыкеш пӱтыралын, шокшо верыш пыштыза. 2-3 кече гыч тудо шыташ тӱналеш.
- Нӧшмым вӱдыжгӧ мландыш 1-2 см келгытыш ӱдыман. Вара полиэтилен пленко дене петырен шындыман. Шокшырак верыш кораҥдыман (батарей ӱмбак огыл, тыге нӧшмӧ шокшылан кӧра “колен” кертеш). Нерешташ тӱҥалмеке, пленкым кораҥдыман да яшлыкым окна ончык шындыман.
- Озым (росота) кенета писын кушкын ынже кай да ынже черлане манын, вӱдым шуко ида шаве. Мланде кошкаш тӱҥалмым ужыда гын, вӱдым йӱр семын шыжыктыза. 15-16 градус деч йӱшырак верыште озымым ида кучо.
- Ужар озым лекмеке, ик арня эрталта гын, кушкылышто 2-3 лышташ кояш тӱҥалеш. Тугеже кажне озымым посна стаканлашке шындаш жап. Тыге росота виянрак да пеҥгыдырак лиеш. Кок-кум кече шогыктымо вӱдым арняш ик-кок гана шавыза.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: