"Мыланна латкудыт" рубрик, 2015 ий, Ӱярня тылзын 24-ше кечыже

Полшаш эре ямде улыт

Статьян авторжо Анастасия Эманова

Подростко-влакын проблемышт шагал огыл. Лаштыкыштына тидын дене эреак палдараш тыршена. Ик статьяштына тыге возанна ыле: “Подростко пагытыште йоча-влак шкаланышт огыт ӱшане, ончыкылык деч лӱдыт, тидлан кӧра шкеныштым ӱлыкӧ шындат, але, мӧҥгешла, кӱшкӧ. Тыгодым тургыжланымаш тӱҥалеш. Тидым шотыш налман, тунам веле икшывын койышыжым умылаш лиеш. Ты пагытыште ача-аван рольжо поснак кугу. Но йоча шукыж годым ача-авалан тургыжланымыж нерген ойлаш ок вашке, огыт умыло манын шона”. Тыгай годым психолог-влак полшен кертыт. Йошкар-Оласе калыклан социально-психологический полышым пуымо “Доверие” рӱдерыште специалист-влак пашам ыштат.

Шола гыч пурлашке: Е.Чугина, М.Ефимова, О.ЗавойскихКажне кечын гаяк тушко тӱрлӧ проблеме дене еҥ-влак толыт, утларакше подростко пагыт дене кылдалтше йодыш шотышто. Подросткын проблемыже-влакым психолог, рӱдерын директоржо Ольга Николаевна Завойских решатлаш полша. Тудак рӱдер нерген каласкала:

- “Доверие” рӱдерым 1996 ийыште официально почмо. Но шке пашажым 1991 ий гычак шуктен шога. Эн ончыч тудо “Брак и семья” психологический полышым пуышо службо лийын. Тушто психолог-энтузиаст-влак пашадарым налде ыштеныт. А 1995 ийыште рӱдерын икымше директоржо В.В.Никифорован инициативыжлан кӧра Марий Элыште телефон дене экстренный психологический службын линийжым почмо. Тунам чылаже 385 гына йыҥгыртеныт.

Кажне еҥын илышыштыже тыгай тат лиеш, кунам тудлан психологический полыш кӱлеш, вет чын решенийым муаш куштылгыжак огыл. “Ӱшан телефоныш” пытартыш жапыште йоча-влак утларак йыҥгырташ тӱҥалыныт. Икшывым тургыжландарыше йодыш шуко: иктаҥаш-влак коклаште нелылык, ача-ава да йоча-влак коклаште умылыдымаш, агрессий, тунеммаште нелылык, депрессий да, конешне, икымше йӧратымаш.

Ты службо черет деч посна полышым пуа, адакшым яра да анонимно йыҥгырташ лиеш.

Педагог-психолог М.Ефимова йоча-влак дене пашам ыштаДоверие” рӱдерна тӱрлӧ направлений дене пашам ышта: диагностико-коррекционный (психолог-влак ачам-авам да йочам консультироватлат), образовательный (тӱрлӧ темылан конференций, лекций, мутланымаш эртаралтыт), методический (методический программе-влакым ямдылымаш), психпрофилактический (СМИ дене кылым кучен, тӱрлӧ материалым ямдылымаш). Радиошто, телевиденийыште выступатлена, газет статьялаш материал-влакым ямдылаш полшена.

Ме оҥай проект-влакым эре возена, икана веле огыл кӱкшӧ акым налме. Мутлан, “Детство без жестокости и насилия”, “Телефон спасения” проектна-влак Почётный грамот дене палемдалтыныт, а “Я хочу быть медиатором” проект “Социальный форум” Российысе конкурсышто эн кӱкшын аклалтын.

Пашанам сайынрак виктараш манын, семинарым, тренингым, “йыргешке ӱстелым” эртарена, районлаш лектына. Шагал огыл наградына уло. Рӱдерын специалистше-влак пашаште сай лектышым ончыктымыштлан РМЭ-н калыкым социально аралыме да паша министерствыжын грамотшо да таумутшо дене палемдалтыныт.

Кызыт тыште 19 еҥ пашам ышта, нунын кокла гыч 9 специалист социально-педагогический да социально-психологический полышым пуа. Кажне ийын квалификацийнам нӧлташ тунемаш коштына. Мый, мутлан, ӱмаште тӱрлӧ курсышто лийынам: “Процессуально-интегративный подход к решению конфликтов в группе” республиканский мастер-классыште участвоватленам, “Стандарт работы специалиста в области восстановительного правосудия и медиация как услуга” Российысе семинарыште лийынам."Открытый взгляд-2014" фестиваль годым тренинг

Ӱмаште калыклан социально-педагогический да социально-психологический полышым пуымо, ешлан да йочалан социальный полышым пуымо шотышто Йошкар-Оласе рӱдер, Звениговысо ийготыш шудымо йоча-влакын социально-реабилитационный рӱдерышт, уш дене начарын вияҥше йоча-влаклан Савино интернат-пӧрт дене паша опыт дене вашла палдаренна.

Специалистна-влак тӱрлӧ конкурсыш кумылын ушнат. МОСИ-ште эртыше “Идалыкысе психолог – 2014” профессиональный мастарлык конкурсышто “Доверие” рӱдерын педагог-психологшо Марина Александровна Ефимова 1-ше верым налын.

Психологна-влак кажне ийын призывник-влак дене пашам ыштат. Сентябрь гыч ноябрь марте рӱдерын пашаеҥже-влак Марий кундемыш Украин гыч толшо граждан-влакым жаплан вераҥдыме пунктыш миен коштыныт, психологический полышым пуэныт. Сайын пашам шуктымылан, мыйым, мыйын алмаштышемым, кок педагог-психологым да ик психологым Республикысе Россий МЧС-ын тӱҥ управленийже Почётный грамот дене палемден.

Калыкым социально аралыме да паша шотышто министерстве да РФ Следственный комитетын Марий Элысе управленийже коклаште уголовный судопроизводство ийготыш шудымо йоча-влакын праваштым аралыме шотышто кылым ыштыме нерген соглашенийым пеҥгыдемдыме. Рӱдернан специалистше-влак, полиграфым кучылтын, ныл йочам психофизиологий могырым шымленыт.

Доверие” кажне ийын наркотик ваштареш “Бей в набат” акцийыш ушна. Ӱмаште Бауманский лицейын тунемшыже-влак дене “Формирование психологической устойчивости к психоактивным веществам” теме дене тренингым эртаренна, “Здоровый образ жизни – веление времени” научно-практический конференцийыште участвоватленна.

Рӱдерна “Открытый взгляд–2014” йоча экранный творчестве Россий фестивальын партнержо лийын. Ты кинофестиваль 21-23 ноябрьыште эртен. Тушто педагог-психологна-влак йоча-влак дене психологический тренингым эртареныт. Икшыве-шамычлан моткоч келшен.

Йочасадыш коштшо йоча-влак дене 30 минут наре пашам ыштена гын, школышто тунемше икшыве-шамыч дене – 40 минут, а кугыеҥ дене – 60-90 минут.

Ӱмаште рӱдерышкына 6731 еҥ полышым йодын толын. Кугыеҥ-влак кокла гыч утларак ӱдырамаш-влак психолог деке толыт да “ӱшан телефоныш” йыҥгыртат гын, подростко-влак кокла гыч — рвезе-шамыч.

Доверие” рӱдерна полышым пуаш эре ямде. Подростко-влак дене поснак кугу пашам шуктена. Содыки подростко пагыт — йочаланат, ача-аваланат неле жап. Нунын коклаште умылыдымаш ынже вияҥ манын, ача-ава йочаштын чон шижмашыштым умылышаш, утыждене тергышаш огытыл, ик ойыш шуаш тыршыман, вет подростко ыштыме пашаже, койыш-шоктышыж гоч эрыкшым, кугу улмыжым ончыктынеже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: