"Сылнылык тӱня" рубрик, 2015 ий, Вӱдшор тылзын 3-шо кечыже

Йот элласе калыкым марий тӱвыра дене палдарынешт

Статьян авторжо Анастасия Эманова

Февраль-мартыште республикыште “Сеҥымаш салют” калык усталык фестиваль эртен. Тушто кажне район гыч усталык коллектив-влак мастарлыкыштым ончыктеныт. Параньга район Ондропсола гыч “Поро кас” мурышо да куштышо калык ансамбль тошто марий куштымаш, попурри дене концертым ончаш толшо-влакын кумылыштым савырен.

"Сеҥымаш салют" фестиваль годым, попурриОндропсолаште марий куштымаш да мурымаш деч посна ик мероприятият огеш эрте. Икшыве-влакат кушташ йӧратат, садлан тӱвыра пӧртна пелен эше “Поро эр” йоча ансамбль уло. Тудат “Сеҥымаш салют” фестивальыште выступатлен, - ойла ансамбльын художественный вуйлатышыже Э.В.Смирнов.

Эрик Васильевич — ты кундемынак шочшыжо. Тӱвыра аланыште 25 ий пашам ышта. Йошкар-Оласе музыкально-художественный школ-интернатыште тунемын. Школ деч вара культпросветучилищыш (кызыт Палантай лӱмеш тӱвыра да сымыктыш колледж) пурен. Баян, гармонь дене шокта. “Ожно кажне гаяк клуб пелен ансамбль лийын. “Поро кас” коллективнат шукертак шочын, а калык ансамбль лӱмым 1990 ий годсек нумалеш. Тений кеҥежым лӱмгечынам пайремлаш шонена. Сай концерт программым ямдылена, - манеш Э.Смирнов. — “Поро касым” Артем Яковлевич Данилов чумырен. Кызыт тудо сулен налме канышыште гынат, ансамбльышкына коштеш, пеш уста баянист. Коллективыштына 25 еҥ уло. Балетмейстер Сергей Изергиевич Семёнов сылне куштымаш-влакым шында. Районысо чыла мероприятийыште манме гаяк усталыкнам ончыктена. Республикысе да Российысе фестиваль-конкурслаште ятыр гана дипломант лийынна. Уфаште, Волгоградыште, Чебоксарыште эртыше фольклор пайремлаште выступатленна. 2012 ийыште мордва калыкым руш кугыжанышыш ушымылан 1000 ий темын. Ты кугу мероприятийыш Марий Эл гыч эстрадын шӱдыржӧ-влакым, “Марий Эл” кугыжаныш ансамбльым да мемнан ансамбльнам ӱжыныт. Саранскыште калыкым марий куштымаш-мурымаш дене куандаренна.

Але иканат йот элыште эртыше фестивальыште лийын огынал. Ончыкшым кеч ик гана тӱнямбал конкурсыш миен толнена. Йот элласе калык-влакым марий тӱвыра дене палымым ыштынена”.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: