"Улам мый Рве-зы-лык!" рубрик, 2015 ий, Вӱдшор тылзын 20-шо кечыже

Марий ӱдыр чылт Пампалче!

Статьян авторжо Анастасия Эманова

25 апрельыште Ижевскыште “Финн-Угрий студенчествын миссше” конкурс эрта. Тушто шке калыкшын, кундемжын чапшым шым ӱдыр аралаш тӱҥалеш. Конкурсышто марий калыкын шкешотан улмыжым Мария Ильина ончыкта.

ry4nJIWGFIwМария – уста куштызо. Тудо “Цармис” куштымаш театрын солисткыже, ик жап “Марий Эл” кугыжаныш ансамбльыштат куштен. Кужу ӱпан, вичкыж кыдалан, сылне йӱкан чевер ӱдыр чылт Пампалче.

Кужэҥер районысо Шорсолаште шочын-кушшо М.Ильина МарГУ-со Калык культур да тӱвыра кокласе кыл институтышто хореографлан пытартыш курсышто тунемеш. Тылеч ончыч ты специальность денак Палантай лӱмеш тӱвыра да сымыктыш колледжым тунем пытарен. Шукерте огыл “Марий Эл” ГТРК-ште вӱдышылан пашам ышта. “Паша ятыр жапым налеш гынат, “Цармис” куштымаш театрыш кошташ эреак тыршем. Кушташ моткоч йӧратем, садлан тиде паша ок нойыктаре, мӧҥгешла, куаным да кӧргӧ вийым ешара”, - ойла куштызо.

Мария 2011 ийыште “МарГУ-н студентке миссше” лийын. “Финн-Угрий студенчествын миссше” конкурслан кыртмен ямдылалтам. Пашаштат, Марий кугыжаныш университетыштат полшен шогат. Творческий номерем марий куштымаш лиеш. Келшыше национальный костюм-влакым ургена, конешне, нуно стилизованный лийыт. Тиде конкурс ӱдырын койыш-шоктышыжым, мастарлыкшым, уш-акылжым ончыкта. Дефиле, визитке, творческий номер полшымо дене калыкна нерген каласкалаш тӱҥалына”, — манеш студентке.

Маша чолгалыкшым чыла аланыштат ончыкташ тырша: кушта, мура, вӱдышылан пашам ышта, тыгак тудо — РМЭ-се Самырык тукым правительстве пеленсе тӱвырам да туризмым вияҥдыме шотышто пашаче группын членже да “Марийская круговая” фестиваль проектын авторжо.

А 25 апрель марте Мариялан Интернет гоч шкенан йӱкнам пуэн кертына. Вконтакте соцсетьыште “Мисс студенчества Финно-Угрии-2015” группыш пурен, “МИСС МЕДИА” опросышто йӱкым пуаш лиеш.

М.Ильинан альбомжо гыч налме фото.

Людмила Карпова, МарГУ-н студенткыже:

- “Финн-Угрий студенчествын миссше” моторлык конкурс веле огыл. Тушто ӱдыр-влак калыкыштын йӱлашт, тӱвырашт дене вашла палдарат. Адакшым ты конкурс университет-влак коклаште кылым пеҥгыдемдаш полша. Мыят икымше курсышто тунеммем годым тиде конкурсышто участвоватленам. Тунам мый “Стиль мисс” ден “Ончаш толшо-влакын симпатийыштым сулышо мисс” лийынам. Мариям шукертсек палем. Пеш уста, чолга, виян ӱдыр. Очыни, полышкалыше семын мыят Удмуртийыш пырля каем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: