"Улам мый Рве-зы-лык!" рубрик, 2015 ий, Вӱдшор тылзын 20-шо кечыже

“Матрешко-влак” ончык лектыныт

Статьян авторжо Анастасия Эманова

Шукерте огыл Москошто “Гордость нации-2015” тӱнямбал фестиваль лийын. Марий Эл гыч ты конкурсышто Йошкар-Ола гыч “Матрёшка” модо театр лийын да 1-ше да 2-шо степенян диплом-влакым налын. Театрым Йошкар-Олаште шочын-кушшо марий ӱдыр Мария Сайранова вуйлата.

М.Сайранова пурлаштеМария кум образованиян: экономический, юридический да лингвистический. “Экономический науко кандидат улам. ПГТУ-м тунем пытарымеке, Уфасе кугыжаныш нефтяной технический университетыш аспирантурыш тунемаш пуренам, а кандидатлык пашам Озаҥыште араленам, — ойла М.Сайранова. — Юристын пашаже моткоч кӱлешан, правам палымаш нигунам уто лийын огыл. Йот йылме-влакым тунемаш йӧратем. Англичанла, французла мутланен моштем. Лондонысо йылме школышто кок арня тунемынам. Тыгай школ-влак Европысо чыла гаяк олаште уло”.

Мария изинек модо деке шӱман кушкын. Подиумышто кошташ йӧратен. “Марий Элын миссше” конкурсышто “Вице-мисс” титулым сулен. Модо театрым почаш эреак шонен. Ӱмаште ноябрьыште шонымашыже илышыш шыҥдаралтын. Театрыш кошташ кумылан-влак вигак лектыныт. “4-14 ияш йоча-влак коштыт. Арняште кум гана занятийым эртарена. Йоча-влак тӱнямбал художественный культурым, этикетым, дефилем, сценический искусство семын хореографийым тунемыт. Кажне кушкыжмын дефилем эртарена, изарнян кызытсе да классический куштымаш-влакым кушташ тунемына, а кугарнян тӱрлӧ темылан лекцийым лудына. Театрна таклан огыл “Матрёшка” маналтеш. Тудо ешым ончыкта. Мемнан дек коштшо йоча-влак шкеныштым ешыште улмышт гай шижышт манын тыршена. Пырля выставкылаш, театрлаш коштына, Роштом, Ӱярням, Пеледыш пайремым пайремлена”, — манеш Мария.

"Ола пайрем" коллекцийТеатр самырык гынат, тӱрлӧ конкурсышто дипломант лийын. “Ноябрьыште театрна почылтын веле, а тылзе гыч “На крыльях таланта” Российысе конкурсышто участвоватленна. Лауреат огыл гынат, 1-ше степенян дипломант лийынна. “Гордость нации” конкурсышто Курган, Керчь, Томск, Омск, Севастополь да моло ола гыч 11 модо театр участвоватлен. Жюри председатель кумдан палыме руш дизайнер Игорь Чапурин лийын. Конкурсышто кок коллекцийым ончыктенна: “Ола пайрем” коллекций — стилизованный марий костюм-влак да “Мы на ярмарке встретились” коллекций. Кажне модо театр пашаж дене ӧрыктарен”, — ойла М.Сайранова.

“Матрёшка” модо театрышке ӱдыр-влакат, рвезе-шамычат коштыт. Кумылан-влак кеч-могай жапыште, 69-8888 телефон дене йыҥгыртен, возалт кертыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: