"Улам мый Рве-зы-лык!" рубрик, 2015 ий, Вӱдшор тылзын 29-ше кечыже

Онар ден Яндиярым куштат

Статьян авторжо Анастасия Эманова

Владимир Аптулаев — Марий Эл радион вӱдышыжӧ. А 2014 ий гыч туштак йӱк режиссёрлан да музык редакторлан пашам ышта, тыгак сӱан да лӱмгече пайрем-влакым вӱдышӧ – тамада – семын тырша.

Володя ешыж денеПошкырт кундем Дӧртыльӧ районысо Чарлак ялыште шочын-кушшо рвезе марий культурым пагала. Пайрем-влакым марла вӱда. “Тамада лияш нигунам шонен омыл. 2013 ийыште ик лӱмгечым эртараш йодыч, кертат манын ӱшандарышт. Тиде пашалан кыртмен пижынам: пайрем программым ямдыленам, келшыше мурым ойыренам. А ӱмаште кеҥежым икымше гана сӱаныште тамада лийынам. Тушко мыйым МарГУ-н студенткыже ӱжын. Кызыт тиде пашам воранен манын кертам. Кажне пайремлан ойыртемалтше программе-сценарийым ямдылем. Кӱлеш аппаратур шкемын. Чаманен каласыман, марий сӱаным шукын ыштат манын ом керт, но лӱмгечым, марий касым марий йӱла, тӱвыра дене келшышын эртараш кумылан-влак улыт. Шочмо йылме дене мутланен, марий сем почеш куштен-мурен, марий мыскара дене пайремжат сылнын да веселан эрта манын палемдат”, - ойла В.Аптулаев.

Володя — уста радиовӱдышӧ да тамада веле огыл, тудо эше сай пелаш да ача. Эва (Володя тудым Эвика манеш) пелашыж дене 2006 ийыште палыме лийын. 2009 ийыште мужыраҥыныт. Кок эргышт кушкеш, коктынат вӱдшор тылзын шочыныт. “Яндияр 28 апрельыште кум ийым тема, а Онар 22 апрельыште шым тылзаш лие. Ешыштына марла мутланена, руш шомак мӧҥгыштӧ йӧршын ок шокто, манаш лиеш. Яндияр компьютер дене тӱрлӧ марий мультфильмым онча, а планшетыште йоча ушым шуарыше модыш-влак дене модеш да тыге рушлат кутыраш тунемеш. Рушла йоҥылыш ойлат гын, тӧрлена, чын мутланаш туныктена.

Молан йоча-влаклан марий лӱмым пуэнна, йодыда гын, тыге вашештем: “А молан еҥ пакча гыч олмам кӱрлын кочкаш, кунам шкендын садысе олма тамлырак? Лӱм шотыштат ме тыгак шонена: молан руш лӱмым пуаш (адакшым тыгай лӱмым шӱдӧ дене еҥ нумалеш), кунам шкенан йоҥгыдо, сай лӱм-влак улыт? Молан ме вуйым шкенан калыкна ончылно огыл, а вес калык ончылно савышаш улына? Марий лӱмым йоча-шамычлан пуаш пелашем ондак мутым луктын. Лӱмым ачалӱм дене келшышым ойыренна. Эргыланна Яндияр лӱмым пуаш Эвика Олык Ипайын «Яндиар» поэмыжым лудмо деч вара кумылаҥын. Мыланем тиде лӱмым ойлен, но мый ала-молан ондак келшен омыл. Жап эртымеке (ты лӱм нерген йӧршын монденам), Яндияр лӱмым пуаш ала маньым. Пелашем воштылалын, тыланет шукертак тидым темленам ыле, каласыш. Кокымшо эргына шочмеке, каҥашен, Онар лӱмым пуэнна. Адакшым Яндияр, Онар лӱман талешкына-влак лийыныт. Коктынат марий калыкым ончыко вӱдаш тыршеныт, тушманым чактарен шогеныт”, — манеш Володя.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: