"Сылнылык тӱня" рубрик, 2015 ий, Вӱдшор тылзын 3-шо кечыже

Ончыко, эре ончыко!

Статьян авторжо Анастасия Эманова

Тыгай девиз дене ила Лариса Ильина. Тудо калыклан Марий Эл радиошто йоҥгышо “Ну молан гын” мурыж дене палыме.

Мурызо Лариса ИльинаЛ.Ильина Морко район Усола Вончӱмбал ялеш шочын-кушкын. Кызыт ешыж дене Волжский районысо Нӱлмарий (Кленовая Гора) посёлкышто ила. А пашам Провой кундемысе Красногорский книгагудышто ышта.

Уста еҥ Морко районысо Эҥерсола школышто тунемын. Школ деч вара Красногорский 14-ше №-ан профессиональный технический училищыш обойщик-радиомонтажниклан тунемаш пурен. “Илыш тӱрлӧ шӧрынан манын, таклан огыл ойлат. Нимомат ончылгоч палаш ок лий. Таче тыште улат, эрла – тора велыште. Училищым тунем пытарымеке, Ростов областьыш пашам ышташ кудалынам. Волгодонскышто троллейбус управленийыште кондукторлан тыршенам. Идалык гыч шочмо ялышкем пӧртылынам, Нӱлмарий качылан марлан лектынам. Но пелашем илыш дене ондакак чеверласен. Эргым изиак ачаж деч посна кодын. Икшывым шкет нӧлташ йӧсӧ. Туге гынат нелылык ончылно вуйым сакен омыл. Звениговысо 7-ше №-ан лицейыште поварлан тунем лектынам да посёлкысо 8-ше №-ан йочасадын кочмыверыштыже индеш ий пашам ыштенам. Кызыт кокымшо ий книгагудышто йоча секторлан вуйын шогем. Библиотекыште тӱрлӧ пайремлан пӧлеклалтше мероприятийым чӱчкыдын эртарена. Изирак класслаште тунемше йоча-влак кумылын коштыт”, - манеш Л.Ильина.

Илышыште шуко ужшо ӱдырамаш еҥлан шке тургыжланымашыжым ойлаш тунемын огыл. А вет чоным луштарыман! Тыге тудо сылнымут деке кумылаҥын. Шке шижмашыжым почеламут корнылаш возен, ласкалыкым муын. “Ну молан гын” икымше почеламутшо 2011 ийыште шочын. Тудлан семым келыштараш шонен пыштен. Тиде йодмаш дене Провой кундем гыч мурызо Геннадий Васильев деке толын. “Тудын дене фонограммым возенна. Почеламутем кӱлеш семын тӧрлаташ Тошнур ялын поэтше Алан Эчук полшен. Тыге “Ну молан гын” мурем калык ончылно икымше гана 15 апрельыште Тошнур клубышто муренам. Тылеч вара Геннадий Васильев мыйым пырля яллашке концерт дене коштыкташ тӱҥале. Вара тиде мурем дене Йошкар-Оласе Ленин лӱмеш тӱвыра полатыште Марий Эл радион эртарыме концертыштыже выступатленам”, - ойла мурызо.

Лариса Ильинан эргыже Красногорский посёлкысо 2-шо №-ан кыдалаш школыш 8-ше классыш коштеш. Тудо аважым эреак куандараш тырша. Тӱҥалтыш класслаште тунеммыж годым кагаз гыч йӱксым ыштен пӧлекла ыле, эсогыл тӱрлашат толашен.

Кызыт мурызо Геннадий Васильев дене пырля у мурым возаш шона. Дуэт муро кунам ямде лиймыжым раш ыш каласе, лишыл жапыште нуно калыклан у хитым пӧлеклат манын ӱшанена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: