"Сылнылык тӱня" рубрик, 2015 ий, Ага тылзын 5-ше кечыже

“Илышыште ниможат арам огыл”, —

Статьян авторжо Анастасия Эманова

манеш Курчак театрын ик эн самырык да уста артистше Максим Иванов.

Мыланем М.Ивановын “Кутко сӱан” спектакльыште модмыжо моткоч келшен. Тушто тудо кокымшо планан рольым — Шудышырчыкым – модын, тыгак тӱмырым кырен.

"Кутко сӱан" спектакль гыч: М.Иванов пурлаштеРвезе Йошкар-Олаште шочын-кушкын. Ачаже – марий, аваже – чуваш. 9-ше №-ан школым тунем пытарымеке, И.Палантай лӱмеш тӱвыра да сымыктыш колледжыш каен. Артист койышан рвезе изирак класслаште тунеммыж годымак театрлан кумылаҥын. “Кокымшо классыште пырля тунемше йолташем-влак театр кружокыш возалтыныт. Мыланемат тиде оҥай лийын. Кружокыш кумылын коштынам, тушто чыла келшен, эсогыл йолем сусыргымо годымат кружокыш вашкенам. Ом пале, могай амаллан, но кружокым икмыняр жап гыч тӱчыныт. 7-ше ала 8-ше классыште тунеммем годым Йошкар-Олаште школ театр-влакын фестивальышкышт ушненна. Тунам ме нимогай верым налын огынал, но туныктышем-влак моштымем акленыт. Школышто утларакше кумытан отметкылан тунемынам. Туныктышо-влак тидлан вурсеныт, но сценыште модмем ужмеке, умыленыт: театр – мыйын ончыкылыкем. Вес ийын ты фестивальыште кумшо верым налынна. Мастарлыкнам Марий Эл Республикын калык артисткыже Галина Владимировна Ковалева ужын да 9-ше класс деч вара тӱвыра да сымыктыш колледжыш актер искусство специальностьлан вигак 2-шо курсыш тунемаш пураш ӱжын. Мый келшенам. А кумшо курсышто Николай Гогольын произведенийже почеш шындыме “Бедный Акакий” спектакльыште Шинельым модынам. Таче тиде пашам ик эн кугулан шотлем. Ты спектакльым тыгак Санкт-Петербургысо курчак театрыште ончыктенна, калык сайын аклен. Ме тушеч шулдыраҥше пӧртылынна, — ойла артист. — Илышыште ниможат арам огыл. Арам огыл мый кружокыш логалынам, школысо театр-влакын фестивальыштышт участоватленам да вара колледжыш тунемаш пуренам. Мыланна, самырык артист-влаклан, Станислав Павлович Снеговской гай палыме да пагалыме артист-влак дене пырля пашам ышташ – кугу пиал. Колледжыште тунеммем годым Курчак театрыште модаш тӱҥалам манын шонен омыл. Курчак театр – чынжымак юзо тӱня. Тыште йомакысе герой-влак ылыжыт. Пелашем мыйым йоча гай улат манеш. Юзо тӱнялан шке от ӱшане гын, кузе йочам ӱшандараш лиеш? Вет икшыве чыла шижеш. Йоча дене йоча лийман. Тудын шинчаончалтышыж дене тӱням ужын моштыман”.

Максим колледж деч вара Москосо театр институтлаш тунемаш пураш тӧчен. “Щепкин лӱмеш кӱшыл театральный училищыш тӱлыман верыш пуренам. Тунам мыланем комиссий ойлен: “Молодой человек, вы слишком наглый, но мы вас берем”. Кум тылзе Москошто иленам. Чонем мӧҥгӧ шупшын. Спектакльыште модмем шуын. Йошкар-Олаш мӧҥгеш толынам, - манеш артист. — Спектакльыште чылажат: курчак, декораций, сем — тӱҥ рольым модеш. Артист кажне рольым модмыж годым шкенжымат вес могырым ужеш, тидын дене мастарлыкшым вияҥда.

Кутко сӱан” спектакльыште Шудышырчык лийынам. Тиде постановкылан кыртмен ямдылалтынам. Ачам мый денем южгунам марла ойла, тыглай кӱчык предложений-влакым умылем, но кутырен садыгак ом мошто. Садлан пьесым лудмо годым логалше икымше нелылык – тиде акцент. Марий шомак-влакым умылаш манын, руш йылмыш кусареныт, но тиде полшен огыл. Тунам Шкетан драмтеатрын артисткыже Маргарита Медиковам ӱжыныт. Тудо текстым марла лудын, а мый почешыже чын ойлаш тыршенам. Тыге мо нерген ойлымем умылаш тӱҥалынам. Адакшым марий труппышто актёр-влак марла эре кутырат, тыште “языковой погружениет” лиеш. “Кутко сӱан” спектакльыште модмо годым тӱмырым перкалаш тунемынам. Тидлан Шкетан театрын артистше, тале семмастар Сергей Данилов туныктен.

Ты марий спектакльым утларак вияным ышташ сем полша. Тудым Сапаев лӱмеш опер да балет театрын дирижёржо, композитор Григорий Архипов возен. “Кутко сӱан” спектакль моткоч кӱлешан, поснак оласе калыклан. Вет ме марий кундемыште илена, садлан марла яндарын кутыраш огыл гын, кеч умылышаш улына”.

Кажне еҥын мечтаже уло. А актерын тиде –  тӱҥ рольым шукырак модаш. «Тачеш тыгай пашам эше уке, но кокымшо планан ролят чонемлан лишыл. Кажне спектакльлан куанен ямдылалтам. Йӧратыме пашам ыштен ом нойо, мӧҥгешла, вий лектеш, у шӱлыш авалта. Спектакль деч вара ончаш толшо-влакын шогалын совым кырымекышт, чоныштем куан тул ылыжеш, пашам ышташ утларак кумылаҥам. Конешне, мӧҥгыштӧ кумылым волтышо тӱрлӧ ситуаций лиеда, но тидым ме, актер-влак, театрыш огына кондо. Мемнан шкешотан йӱла уло: мӧҥгӧ гыч паша верыш толмеке, шӱргым, кидым шӱалтена, тыге нелылыкым ӧрдыжеш кодена, - манеш М.Иванов. — Каныш кечылаште спектакльым чӱчкыдын ончыктена але репетицийым эртарена. Софья пелашем мыйым умыла. Тудо шкежат творческий айдеме. Палантай лӱмеш тӱвыра да сымыктыш колледжыште калык семӱзгар пӧлкаште тунемын. Йошкар-Оласе 16-шо №-ан школышто музыкым туныкта. Кертмыж семын кажне спектакльышке коштеш, пашамлан акым пуа. Неле годым поро шомак дене лыпландарен мошта, полшен шога”.

Майыште Курчак театр йоча-влакым премьер дене куандара, “Колобок” спектакльым ончыкта. Режиссёржо – Санкт-Петербург гыч Николай Боровков. Тушто Максим кӧн рольжым модаш тӱҥалеш, эше пале огыл.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: