"Кузе илет, эрвел марий?" рубрик, 2015 ий, Ага тылзын 12-шо кечыже

Полина Итальева тӱжемлан икте гына

Статьян авторжо Ирина Степанова

Итальева 12Музикан семеш кушкын
Музиканым кучен шичше ачаже Иван Николаевич Минилбаев ныл ияш изи ӱдыржым воктекыже мураш шогалтымыж годым ончыкыжым икшывыже кумдан палыме, марий калыкшылан кугешнаш йӧршӧ айдеме лиеш манын шоненат огыл дыр.
1950-60-шо ийлаште туныктышо-влакым ик школ гыч весышке чӱчкыдын кусаркаленыт. Сай вуйлатышылан шотлалтше Иван Николаевич Минилбаевланат партийын да образований пӧлкан йодмышт почеш Калтаса, Краснокам, Янаул районласе школлам ятыр гана вашталташыже перна. Тыгодым ешланат у верышке тарваныман. Ватыже Серафима Кузьминична пелашыжым умылен, шкежат туныктышылан ыштен, но озавате да икшыван авалан куштылгыжак лийын огыл. У верыште ача кажне гана у сурт-оралтым шынден.
Музиканым сайын шоктышо да мураш йӧратыше ача-ава вич ӱдырым куштеныт. Нуно чыланат мураш, концертлаште шке мастарлыкыштым ончыкташ йӧратеныт. Кугурак-влак, Ирина да Лида, илыш корныштым ава-ачан пашашт дене кылденыт. Нуным ончен, аттестатым кидыш налше Полинат туныктышо еш династийым шуяш полша, Ушмен кыдалаш школышто продленный группын воспитательжылан пашам ышташ тӱҥалеш. Вигак изи мурызо-влаклан кружокым почеш да ансамбльым пога. Талантан икшыве-влак дене занятийым эртараш самырык ӱдырлан келшен.
Но тыгодымак умылен: шкенжын талантше, почылт шудеак, тапталтде йомын кертеш.
1979 ийыште ик кеҥеж кечын Полинам ала-могай вий корныш тарванаш ӱжеш. Аваж ден ачажын кокымшо акажын сӱанышкыже кайымышт дене пайдаланен, ӱдыр документ-влакым сумкашке пышта да кугу корныш лектеш. Шукертсек шонен пыштыме шонымашыжым шукта – Свердловск оласе культпросветучилищыш тунемаш пура.
«А молан тушко, вет тиде жапыште Йошкар-Олаштат тыгаяк тунемме заведений лийын?» манын йодмемлан Полина Ивановна вашештыш:
- Индеш ияшем годым ачай мыланем Уральский руш калык хорын кугу пластинкыжым пӧлеклыш. Тушеч могай муро йоҥген, чылажат «мыйын репертуарыштем» лийын. Тиде хорын мурымыжо мылам шкешотан пример лийын. Нунын гай мураш тунеммем шуын, да йоча шонымаштемат шкемым эреак тиде хорышто мурызо семын ужынам.
Полина Итальевнан биографийже гыч тиде факт, чынжымак, илышыште кӱшычын посна корным волгалтарен шогышо ала-могай вий улмо нерген шонымашым пеҥгыдемда!
Экзаменыште приемный комиссийын председательже ты палыме коллективын художественный вуйлатышыже Владимир Горячих лийын. «Ах ты, степь широкая» руш калык мурым мурышо Полиналан тудо мучаш марте мурен пытараш ок пу, чарен, таум каласен. «Тыште тунемаш тӱҥалат!» манын увертара.
Марий ӱдыр шинчымашым пога, тыршен тунемеш. Талантан студенткым Свердловск филармонийыш мураш ӱжыт. Тыгай пиал кажнылан ок логал!
Направлений почеш дипломан специалист Ленинград областьыш кая. Ик совхоз-техникумысо тӱвыра пӧрт директорлан шогалтат. Икмыняр ий тушто илымек, ешан да икшыван Полина Ивановна 1991 ийыште шочмо кундемышкыже пӧртылеш. Тудлан Ушмен тӱвыра пӧртым вуйлаташ ӱшанат. Шкежат марла мураш, тӱрлӧ концертыште выступатлаш тӱҥалеш. Тиде жап гыч, лӱдде манаш лиеш, марий культурышто у шӱдыр чӱкталтеш, у лӱм шочеш!
Тудо шке вийжым да моштымыжым ятыр конкурсышто терга, кажне гана гаяк сеҥышыш лектеш. Тудым кажне марий ял куанен вуча, концертым ончаш клубыш калык тич погына. 1999 ийыште Башкортостан Республикын да 2004 ийыште Марий Элын сулло артистше званий-влак дене палемдалтеш.

Кум эрган, вич уныкан ава да кова
Полина Итальева кум эргым йол ӱмбак шогалтен. Кугуракше — Константин — илышыжым музык дене кылден. Икымше класс гычак Москваште А.В.Свешников лӱмеш хоровой училищыште тунемын. Вара В.С.Попов лӱмеш хоровой искусство академийыште шинчымашым поген, аспирантурым пытарен. Кызыт шке камерный коллективше уло.
Максим изиж годсек кидмастар кушкын, Уфасе художественно-промышленный колледжыште шинчымашым поген. Варажым Москваште финансово-юридический академийыште тунемын, кызыт шкенжын «Столичные перевозки» лӱман предприятийже уло.
Андрей тӱнямбал предприятийыште вахте йӧн дене тырша, кызыт, мутлан, паша дене — Чехийыште. Ешыж дене Башкирийыштак Николо-Березовка поселкышто ила.
Полина Ивановнан концертлаштыже акаж ден шӱжарже-влакат мураш йӧратат. Мурызын аваже Серафима Кузьминична 82 ияш, тудо Елена ӱдыржӧ дене Москошто ила. Уныка-влакым йол ӱмбак шогалташ полшен.
Пытартыш кок ий Полина Итальева Краснокам районысо Арлан ялысе тӱвыра пӧртын «Кӱдыроҥгыр» мурышо коллективше дене художественный вуйлатыше семын пашам ышта.

Елена Газина.
Нефтекамск ола.
Фотом еш
альбом гыч налме

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: