"Улам мый Рве-зы-лык!" рубрик, 2015 ий, Ага тылзын 22-шо кечыже

Тӱрлӧ йылме дене кутырена, но садыгак вашла умылена

Статьян авторжо Анастасия Эманова

14-16 майыште Йошкар-Олаште “Финн-угор калык-влакын поянлыкышт” II тӱнямбал студенческий форум эртен. Тушко Российысе тӱрлӧ ола да ныл йот эл – Финляндий, Венгрий, Германий, Чехий – гыч 235 студент, аспирант, ученый толыныт. Форумым РФ образований да науко ден РМЭ тӱвыра, печать да национальность паша шотышто министерстве-влакын полшымышт дене финн-угор университетласе студент да аспирант-влакын ассоциацийышт эртарен.

"Финн-угор калык-влакын поянлыкышт" студенческий форум годымИкымше кечын Курчак театрыште пленарный заседаний лийын. Тушто МарГУ-со Калык культур да тӱвыра кокласе кыл институтын директоржо, доцент, историй науко кандидат Р.И.Чузаев, МарГУ-н студенткыже Л.Карпова ден Удмурт кугыжаныш университетын студенткыже А.Кораблина докладым ыштеныт. Люда Карпова ойыртемалтын: тудо материалым марла ямдылен, чылан умылышт манын, презентацийым ыштен. “Студенческие инициативы в системе финно-угорских научно-образовательных и культурных связей” докладше гоч “Марла чын возем”, “Мый марла ойлем” да моло акций дене палдарен.

Вес кундем гыч толшо-влак команмелнам тамленыт, марла куштеныт, поснак кандырам кумылын “пуненыт”. “Цармис” театрын куштызыжо-влак марий калыкын шкешотан улмыжым ончыктеныт. Вара участник-влак тӱрлӧ калык модыш дене модыныт. Уна-влакат шкешт нерген мурымаш-куштымаш гоч палдареныт. Мутлан, финн-влак шочмо йылмышт дене мурым муреныт, Сыктывкар гыч участник-влак коми калык модыш дене модыктеныт.

А кастене чылан, Набережныйыш рӱжге лектын, Йошкар-Олан моторлыкшым онченыт.

15 майыште эрдене секцийлаште паша тӱҥалын. Чылаже шым секций лийын: “Языкознание, теория и практика перевода”, “Литературоведение”, “Этнография, фольклористика, традиции”, “Археология, история”, “Декоративно-прикладное искусство финно-угорских народов”, “Образовательные и социокультурные технологии” да “Финно-угорские молодежные инициативы и студенческое самоуправление финно-угорских университетов”.

МарГУ-н студенткыже А.Макарова “Кугарня” газетыште неологизм-влакым кычалын да “Словообразовательные модели образования и тематика неологизмов” теме дене докладым ыштен. Пример шотеш пунчал, тӱвыра, рӱдер, ончер, сымыктыш, вуйвер мут-влакым ончыктен. Нунын значенийыштым умылтарен да Волжский кундемыште нине мутым палымым шымлен. Тусо еҥ-влак сымыктыш мутым колыныт, но значенийжым шагалын палат.

Теме-влак оҥай лийыныт, коеш: участник-влак форумлан кыртмен ямдылалтыныт. Секцийын пашаже мучашлалтме деч вара мастер-класс-влак лийыныт.

РФ-н сулло артистше, МарГУ-н профессоржо С.Асмаевын вуйлатыме «Цармис» куштышо театрын участникше-влак финн-угор куштымаш-влакым куштен ончыктеныт. Декоративно-прикладной творчестве шотышто мастер-классыште арама воштыр дене кӱмыжым ыштеныт. А Н.П.Огарев лӱмеш Мордва кугыжаныш университетын преподавательже В.Ковалева тӱрлаш, ӱштым пидаш туныктен.

МарГУ-н профессоржо, искусствоведений доктор О.М.Герасимов шиялтыш дене шоктымо шотышто мастер-классым эртарен.

А кастене Э.Сапаев лӱмеш опер да балет театрыште форумым торжественно тӱчыныт, участник-влакым диплом дене палемденыт.

Форумын пытартыш кечынже участник-влак Т.Евсеев лӱмеш Национальный тоштерыште да Национальный художественный галерейыште лийыныт, выставке-влакым ончен коштыныт. Кажне калыкын — шке тӱвыраже, йӱлаже, поянлыкше, нуным арален да аклен моштыман. Финн-угор студенческий форум тидым пеҥгыдемден. Тек тӱрлӧ йылме дене мутланат, но шке кундемым йӧратымаш, ваш пагалымаш да калык-влак коклаште кылым пеҥгыдемдымаш икояным ыштат. Тыгай погынымаш вес ийынат Йошкар-Олаште лиеш. Тыге МарГУ-н ректоржо М.Швецов увертарен.

Любовь Михайлова:Любовь Михайлова

- Мый Татарстан Республик Агрыз район Пелемеш селаште шочынам. Ижевскыште Удмурт кугыжаныш университетысе Социальный коммуникаций институтышто нылымше курсышто тунемам. Тӱрлӧ конференцийыште участвоватлаш эреак тыршем. Тыгай форумышто икымше гана лийынам. Йошкар-Олашке икымше гана толынам. Пеш сылне, ужар ола. Форумыш “Формирование интереса к массовой физической культуре через физкультурно-оздоровительные проекты на примере “Мари лыжня” темылан докладым ямдыленам. Ачам Эдуард Иванович — марий шӱлышан пӧръеҥ. Спортым йӧрата. Лачак тудо кундемыштына “Мари лыжня” проектым илышыш шыҥдарен, марий калыкым ечыгорныш шогалаш кумылаҥден. Кажне ийын участник-влак шукемыт, эн ончыч Кна вел гыч гына марий-влак участвоватленыт гын, тений Башкирий, Удмуртий, Марий Эл гыч толыныт. 3-5 ияш йоча-влакат ече дене кумылын мунчалтат. Мый спортсмен омыл гынат, ече дене кошташ йӧратем. “Мари лыжня” — таҥасымаш веле огыл, тыгай мероприятий марий-влакым ушаш полша.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: