"Сылнылык тӱня" рубрик, 2015 ий, Пеледыш тылзын 4-ше кечыже

Порылык ончыктымо акцийыш ушныза!

Статьян авторжо Анастасия Эманова

Марий актрисе Эльвира Лисицынам республикыштына шукын палат. Театрым йӧратыше-влак, критик-шамыч тудын творчествыжым кӱкшын аклат.

Теве теният тудо “Театральный Йошкар-Ола” фестивальыште “Курчак театрыште эн сай роль” номинацийыште палемдалтын. А 30 майыште Йошкар-Оласе Курчак театрыште “Колобок” спектакльын премьерже лиеш. Тушто Эльвира Семеновна иканаште кум рольым модеш.

Курчак театрын актрисыже Эльвира Лисицына- Ролем-влак тӱрлӧ улыт. Вет кажныжын койыш-шоктышыжо ойыртемалтше, шкешотан. Образ виян лийже манын, артист курчак дене “иктыш ушна”. “Колобок” спектакльыште Кован, Чывын да Рывыжын образыштым почын пуэм. Ик постановкышто икмыняр тӱрлӧ рольым модаш мыланем келша. Теве кова гай мутланет, тудын гай коштат, вара рывыжын чоялыкшым модын ончыктет. Тиде моткоч оҥай, — ойла артистке.

- Спектакльым Санкт-Петербург гыч толшо режиссёр шынден. Тудын дене кузе пашам ышташ?

- Моткоч талантан, уста режиссёр Николай Юрьевич Шувалов дене пашам ышташ кугу пиал. “Колобок” постановко — мемнан театрыштына тудын кокымшо пашаже. Николай Юрьевич — ушан, шке пашаштыже кугу профессионал. Тудо чылажымат раш умылтарен мошта. Артист-влак дене роль могай лийшаш нерген мутлана. Тудын дене пашам ышташ пеш куштылго ыле.

- 30 майыште спектакль полшымо дене порылыкым ончыктымо акций лиеш. Тудо могай шонымаш дене эрта?

- Чер кеч-кунамат – осал. А кунам йоча черле – эн кугу ойго. Кызыт республикыштына шукын лу тылзаш Марат Трифановлан полшаш тыршена. Тудо остеопетроз але вес семынже мрамор чер дене орлана. Лувемым кусарен шындыман, а тидлан кугу окса кӱлеш. Курчак театрна Трифановмыт ешлан полшаш шонымаш дене порылыкым ончыктымо акцийым эртара. “Колобок” спектакль гыч погымо чыла оксам Маратым эмлаш пуэна. Изи ньогалан илаш да илаш. Айста тудлан чылан полшена!

- Тений эше ик премьер лийын — “Кутко сӱан” спектакль. Марий курчак постановко шукертак ончыкталтын огыл. Могай шижмаш чондам авалтен?

- Чот куаненам, шулдыраҥшыла чучынам. Вет чынжымак ятыр ий марий спектакльым шынден огынал. Тиде спектакльыште мый уло кумылын модынам. Тушто шуко муро йоҥга. Артист-влак шкеак ятыр семӱзгар дене шоктенна. Йоча спектакль гоч марий калыкын тӱвыражым, сӱан йӱлажым ончыкташ тыршенна. Адакшым тиде постановко спектакль-уроклан шотлалтеш. Марла ойлена, тыгодымак чылан умылышт манын, южо шомакым руш йылмыш кусарена.

Мый оръеҥ кутко лийынам. Тиде роль дене “Театральный Йошкар-Ола” фестивальыште “Курчак театрыште эн сай роль” номинацийыште сеҥенам.

Марий спектакльым фестивальыште жюри кӱкшын аклен. Российысе театральный деятель ушемын театральный критике кабинетшым вуйлатыше Элеонора Германовна Макарова эсогыл “Кутко сӱаным” йот эллаштат ончыкташ лиеш манын ойлен. Юмо пӱра гын, вес элышкат лектына. Финляндийыште ончыктымо шуэш. Тушко 1992 ийыште “Юзо шиялтыш” спектакль дене миенна ыле. Чылалан моткоч келшен. Финн-угор калык тӱшкаш пурена, садлан тусо калык марий йылмым кеч изиш умыла, а южыжо эсогыл мутланен мошта, кумылан-влак марий йылмым тунемыт.

- Театр пашаеҥ-влак вашке отпускыш лектыт. Кузе жапдам эртараш шонеда?

- Путешествоватлаш, вес кундемым ужын кошташ йӧратем, кажне кеҥежым теҥыз воктене канаш тыршем, тиде мыланем кӧргӧ вийым пуа. Италийыште, Германийыште, Чехийыште, Турцийыште, Египетыште лийынам. Тений Болгарийыште канаш шонем. А августышто у вий дене пашаш пижман. Кугу проектым ямдылена. Чеховын “Три сестры” пьесыж почеш спектакльым шындена. Тудын режиссёржо – Санкт-Петербург гыч Александр Стависский. Постановкышто кугурак акам модаш тӱҥалам. Премьер сентябрьыште лийшаш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: