"Рубрик деч посна", 2015 ий, Пеледыш тылзын 5-ше кечыже

Фитнес капым да чоным кандара

Статьян авторжо Анастасия Эманова

Тыге шона Курыкмарий район Кулаковы селаште шочын-кушшо Ольга Стапеева. Оля эре ончылно лияш тырша, илыш девизшат арам огыл тыгай: “Эре ончыко!”

Ольга СтапееваО.Стапеева Чебоксарыште И.Я.Яковлев лӱмеш кугыжаныш педагогический университетыште тунемеш, направленийже – химий ден биологий. Тыгодым юрист профессийым налеш. Коеш, Оля кумылын тунемеш, шуко уым палаш тырша. “Мылам ачам эре сай каҥашыж дене полша. Тудо школышто черченийым, рисованийым, трудым да физкультурым туныкта. Ачам, чын корным ойыраш манын, престижный огыл, а чонлан келшыше профессийлан тунемаш кӱлмӧ нерген ойлен. Тыге педуниверситетыш тунемаш пуренам. Кызыт кумшо курсым тунем пытарем. Мыйын шонымаште, химий ден биологийым палыме илышыште кӱлеш лиеш. Кызытсе у технологий вияҥме саманыште химий, мутлан, ик эн тӱҥ верым айла. Нанотехнологий тидын шотышто эн сай пример, — ойла студентке. — Тылеч посна Чуваше кугыжаныш университетысе юридический факультетыште кокымшо курсышто тунемам. Законым да правам палаш, ты шотышто умылымашым келгемдаш кӱлеш шонем. Тунемаш йӧратем. Кугурак класслаште тунемме годым тӱрлӧ олимпиадыште, конкурсышто участвоватленам. Школым шӧртньӧ медаль дене тунем пытаренам”.

Оля спортым изинек йӧрата. Тидыже тудын вӱрыштыжӧ докан. “Спортым йӧратымаш ачам деч куснен. Тудо куржталмаш дене спорт мастерыш кандидат. Таза илыш-йӱлам куча. Эре тудын гай тале лияш тыршем. Ачам мыланем эн сай пример. Пытартыш жапыште фитнес дене заниматлем. Моткоч келша. Тӱрлӧ упражненийым ыштыме годым могыр веле огыл, чонат кана”, — манеш Ольга.

О.Стапеева шке велкыже кеч-кӧмат савырен кертеш. Шыман кутыра, ачаже, ончыкылык профессийже, спорт нерген шинча йӱлен ойла.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: