"Улам мый Рве-зы-лык!" рубрик, 2015 ий, Сӱрем тылзын 31-ше кечыже

Журналист профессий чонжылан келша

Статьян авторжо Анастасия Эманова

Шукерте огыл Провой кундемысе Чакмарий школышто Марий самырык тукымын VII слётшо эртен. Слет годым ныл лужа пашам ыштен. “Этножурналист” лужаште Морко район Кораксола ялеш шочын-кушшо ӱдыр Надежда Тимофеева лийын.

Н.Тимофеева А.Гайдулян дене Надя МарГУ-со историй да филологий факультетыште журналистлан тунемеш. Кумшо курсыш куснен. “Шӱргыял кыдалаш школыш (кызыт тӱҥ школ) коштынам. Журналист лияш нигунам шонен омыл, лач 11 классыште ты шонымаш шочын. Тунам эше сылнымут деке кумылан улам ыле, почеламутым возкаленам. Садланак журналистике специальностьым ойыренам”, - ойла ӱдыр.

Надя – чолга студентке. Университетыште эртаралтше конференцийыш кумылын ушна. Российысе да республикысе тӱрлӧ форумышто лийын. “Ӱмаште да тений, мутлан, МарГУ пелен самырык этножурналистын школжо эртен. Тушто шкаланем шуко пайдале информацийым налынам, тыгак марла лывыргын мутланаш да возаш тунемынам. Ынде кокымшо ий самырык-влакын “iВолга” форумыштышт “Арслан” интернет-журналын корреспондентше лийынам. Тений тудо 17 гыч 27 июнь марте Самара областьысе Мастрюковский ер воктене эртен. Тушто шуко палыме еҥ дене, мутлан, “Универ” да “СашаТаня” сериаллаште модшо актер Андрей Гайдулян дене, вашлийынна.

iВолга” гыч пӧртылмеке, вигак, манаш лиеш, Марий самырык тукым слётыш каенам. Тушко икымше гана миенам. Тӱрлӧ кундем гыч толшо марий ӱдыр-рвезе-влак дене палыме лийынам, нунын тӱвырашт, йӱлашт нерген пален налаш тыршенам.

Слет деч вара тӱвыра да тунемме “КРАВЕЦ” форумышто лийынам. Тудо Курыкмарий районысо Эман кыдалаш школышто эртен. Кум кече жапыште участник-влак сымыктыш да журналистике направлений дене лекцийым колыштыныт, “йыргешке ӱстел” йыр тӱрлӧ темылан каҥашеныт, республикынан палыме писательже, журналистше, культур пашаеҥже-влак дене вашлийыныт”, - манеш Надя.

Н.Тимофеева — МарГУ-со “Объектив ТВ” медиа-проектын корреспондентше. Университет, студент илыш дене кылдалтше сюжет-влакым ямдыла. Тушто тудо икымше курс гычак тырша.

Журналистын пашаже куштылгыжак огыл. Эн тӱҥжӧ – нимом шылтыде, чын информацийым калык дек намиен шукташ. Журналист лияш шонем. Тиде профессий чонемлан лишыл. Кажне кечын тӱрлӧ еҥ дене палыме лияш, вес кундемыш, олаш миен кошташ келша”, - ойла студентке-журналист.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: