"Рубрик деч посна", 2015 ий, Сӱрем тылзын 31-ше кечыже

Паша неле, но оҥай

Статьян авторжо Анастасия Эманова

Ирина Козырева тений дипломым налын да вигак, манаш лиеш, рейсыш лектын. Поездыште проводницылан ышта. Паша неле, но оҥай, адакшым кеҥежым оксам ыштен налаш сай йӧным пуа.

_45Hr9eOVoYИрина Йошкар-Олаште шочын. Изинек пашалан кожмак кушкын, сайын тунемаш тыршен. МарГУ-со историй да филологий факультетым йошкар диплом дене пытарен. Кумшо кеҥеж проводницылан ышта.

- Проводнице курсым кажне ийын эртем, тиддеч посна пашаш огыт нал. Курс кок-кум тылзе шуйна. Тушто проводницын пашажым, вагонын устройствыжым тунемынна, тыгак лӱдыкшыдымылык шотышто занятий лийын.

- Проводницын пашаштыже нелылык уло мо?

- Пассажир-влак тӱрлӧ койыш-шоктышан улыт. Нунын дене кутырен мошташ кӱлеш, но южыж дене ик ойыш шуаш неле. Вес эл гыч толшо-влакат лиедат, садлан англичан йылмым палыман. Адакшым неле чемоданым нумалаш логалеш.

- Поезд дене кушко кудалыштат?

- Кызыт пашам ыштыме поездын маршрутшо “Москва-Мурманск-Анапа”, “Москва-Санкт-Петербург-Анапа”, “Москва-Новгород”. А 2012 ийыште пашам ыштыме годым Москосо Киевский вокзал гыч Кишиневыш кудалыштынам.

- Поездын шогалме эн шуко жап мыняр шуйна?

- Кок шагат. Тиде жапыште проводник-влак вагон воктене дежуритлат, а пассажир-шамыч шыдешкен коштыт.

- Могай оҥай ситуаций лийын?

- О, кажне кечын манме гаяк оҥай ситуаций лиеш. Мутлан, икана ик проводник пассажирым Оленегорск олаште олмеш Апатитыш йоҥылыш волтен коден. Тудо неле сумка дене вокзалыш кайыш. Поезд шке верже гыч тарваныш веле, саде пассажирет вокзал гыч “Тидыже Апатитыс, а мыланем Оленегорскыш кӱлеш!” кычкырен лектеш. Перрон дене куржеш, поезд кудалеш, проводник тошкалтышым волтыш. Пассажир тӧршталтен кӱзыш. Мыланна весела ыле, но тиде пеш лӱдыкшӧ – поезд йымак пурен каяш лиеш.

- Проводник-влак поездыште кузе илат?

- Мемнан посна малыме купе уло. Черет дене дежуритлена. Шке кӱшеш кочкына, иктат мемнам огеш пукшо. Туге гынат проводник пашан сай могыржат уло: тӱрлӧ еҥ дене палыме лият, шуко олам ужат.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: