"Улам мый Рве-зы-лык!" рубрик, 2015 ий, Сорла тылзын 14-ше кечыже

Археолог лияш куштылгырак

Статьян авторжо Анастасия Эманова

Тыге шона МарНИИЯЛИ-н изирак шанче пашаеҥже Александр Владимирович Акилбаев.

Шукерте огыл марий археологический экспедиций Угарман область Воскресенский районысо Русениха ял гыч пӧртылын. Тушто ученый-влак кок лончан городищым кӱнчымаште лийыныт.

акилбаев 1Ты археологий памятникым икмыше лончыжо Ананьинский культур, VII-V мемнан эра деч ончычсо курым жапысылан шотлалтеш, а кокымшо лончо – средневековый марийский. Экспедиций нерген А.Акилбаев теве мом ойла: “Тушто лу кече лийынна. Акрет годсо тӱрлӧ арверым муынна. Чертеж-влакым ыштенна. Экспедицийым иктешлаш эше эр — погымо материалым радамлыман, анализироватлыман, чертежым шымлыман. Тиде пеш неле да ятыр жапым налше паша”.

Медведево район Краснооктябрьский поселкын эргыже Александр Акилбаев археологын пашажлан университетыште кумылаҥын. МарГУ-со историй да филологий факультетым тунем пытарен. Икымше курсышто пырля тунемше йолташыже-влак дене пырля археологический практикым эртен, тудлан тиде паша моткоч келшен. “Ик палымем МарНИИЯЛИ-н Малый Сундырь (Аламнер) городищыште эртарыме экспедицийыш ушнаш ӱжын. Мый келшенам. А нылымше курсышто шанче институтышто пел ставкыште лаборантлан тыршаш тӱҥалынам. 2008 ийыште дипломым налмеке, пашам ышташ пуренам. Кок ий гыч Татарстан Республикысе науко академийысе археологий (тунам эше историй) институтыш аспирантурыш заочно тунемаш пуренам. Кызыт диссертацийым аралаш ямдылалтам”, - манеш самырык специалист.

Молан археолог, а туныктышо профессийым ойырен налын огыдал? йодмемлан Акилбаев тыге вашештыш: “Туныктышо лияш чап, но тиде профессий моткоч неле, чытышым шуко йодеш. Йоча-влак денат кылым муын моштыман. Адакшым закон почеш, кутырымаште экшык (дефект речи) уло гын, мый, мутлан, тутынен ойлем, паша верыш олмешем вес еҥым налын кертыт.

Археологын пашаже оҥай да тӱрлӧ. Кеҥежым полевой условийыште пашам ыштена, кӱнчымаште лийына. Тӱрлӧ акрет годсо арверым шымлена. Республикын кажне районыштыжо лийынам. Марий мландыште 1200 утла археологий памятник уло. Эн шукыжо Курыкмарий, Юрино, Килемар районлаште верланеныт”.

Археолог-влак историйым “кӱнчен луктыт”, пашашт гоч ожнысо илыш дене палдарат.

Александр Акилбаев шке пашажым йӧратен ышта. Шымлыме пашаж дене научно-практический конференцийлаште выступатла. Тудын ятыр статьяже шанче журналеш савыкталтын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: