"Улам мый Рве-зы-лык!" рубрик, 2015 ий, Сорла тылзын 7-ше кечыже

Спорт кеч-могай пашаштыже сеҥымашыш шуаш полша

Статьян авторжо Анастасия Эманова

Школышто туныктышо-влак ойлат ыле: “Элын ончыкылыкшо — самырык тукымын кидыштыже”. Лачак ушан-шотан, уста еҥ-влак калыкнам, кугыжанышнам вияным ыштат. Тыгай еҥым куштымаште эн ончыч ача-аван надырышт кугу. Икшывын изиж годымак талантшым ужын шуктымеке, тудым вияҥдаш полшыман.

Морко район Кораксола ял гыч вате-марий Семеновмыт Александр эргыштын ече спорт дек шӱман улмыжым пален налыныт да олимпийский резерв училищыш тунемаш колтеныт.

семеновСаша Семенов 1-ше класс гыч 8-ше класс марте Морко посёлкысо 2-шо №-ан школышто тунемын. Изирак класслаште спорт дене заниматлаш тӱҥалын. Ече дене коштын, куржталыштын, футбол дене модын. Районысо тӱрлӧ таҥасымаште чучкыдын ончылно лийын. Тидым ятыр дипломжо да медальже пеҥгыдемдат. Рвезе тыгак Морко калык театрыште модын. Шке жапыштыже аважат ты театрын артистше лийын.

8-ше класс деч вара Йошкар-Оласе олимпийский резерв училищыш толеш. Ече дене республикысе таҥасымаште ятыр гана икымше верым сеҥен налеш. Училищыште идалык тунеммеке, 21-ше №-ан школ пелен кадет классыш кусна. 11 классыште тунеммем годым теле полиатлон дене чемпионат лийын. Тушто спорт мастерыш кандидат нормативым теменам. Тыгак “Марий Элысе ечыгорно” таҥасымаште чемпион лийынам”, — ойла Саша.

Йошкар-Ола деч вара илыш корно Семеновым Москош конда. Марий рвезе кӱшыл образованийым пуышо учрежденийыш – Россий МЧС-н пожар ваштареш кучедалше службыжын кугыжаныш академийышкыже – тунемаш пурен кертеш. “Тушко логалаш неле ыле. Но спортышто сеҥымаш, поснак мастерыш кандидат улмем полшеныт. Академийыште келге шинчымашым пуэныт. Ме тактикым да моло спецпредметым тунемынна. Тӱрлӧ кундемыш, олаш миен коштынна. Ӱмаште июньышто Хакасий Республикыште лийынна. Тушто вӱд ташлен, ятыр пӧртым мушкын наҥгаен, шагал огыл сурт-оралтым пытарен. Ме калыклан уремым эрыкташ, озанлыкым шотыш кондаш полшенна. Россий МЧС-ын приказше почеш “Участнику ликвидации последствий чрезвычайных ситуаций” медаль дене наградитленыт”, — манеш Семенов.

Академийым Саша тений лейтенант званий дене пытарен. Шке кундемын патриотшо Марий Элыш пӧртылын, Волжск оласе 9-ше №-ан пожарный частьыште пашам ышташ тӱҥалын. Тугак спорт дене кылым куча. Вет спорт кап-кылым шуара, тыгак кӧргӧ вийым ешара.

Ачаж ден аваже Саша эргышт дене кугешнат. “Изинек чолга кушкын. Кеч-могай пашаштат, я тунеммаште, я спортышто ончылно лияш тыршен. Икана математике дене чырыкыште кумытан лектын ыле. Сашан кумылжо тодылалтын, але вара тиде предметым сайын тунемын ом керт манын ойлен, отметкыжым тӧрлаташ цельым шынден да шонымашкыже шуын. А академийыште кӱшыл математикым нылытанлан сдатлен кертын.

Ече дене кошташ моткоч йӧрата. Школ гыч мӧҥгӧ толеш, пашам ышташ полша да ечыгорныш лектеш ыле. Перныл коштын огыл. Андрей шольыж дене сай йолташ улыт. Тудымат ече спортлан кумылаҥден, машинамат виктараш туныктен. Пашамат эре пырля ыштат”, — куанен ойла аваже Татьяна Николаевна.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: