"Рубрик деч посна", 2015 ий, Сорла тылзын 28-ше кечыже

Спорт – чон-кумыл пашаже

Статьян авторжо Анастасия Эманова

Алексей Иванов спорт деке изинек шӱман кушкын. Тӱрлӧ таҥасымаште вийжым ончыктен. Ала профессионал спортсмен лияш шонен гынат, пӱрымаш вес веке савырен. Туге гынат Алексей спортым шуэн огыл, пашаштыже эсогыл ик эн тале спортсменлан шотлалтеш.

иванов 1А.Иванов 1990 ийыште Советский посёлкышто шочын. 2004 ийыште ешыж дене Йошкар-Олаш илаш кусненыт. 9-ше классым тунем пытарымеке, радиомеханический техникумыш промышленный оборудованийым монтаж да технический эксплуатаций специальностьлан тунемаш пурен. “Техникум деч вара Санкт-Петербургысо военный инженерно-технический университетыш каяш шоненам. Тӱрлӧ амаллан кӧра шонымашем шукталтын огыл. Адакшым армийыш повестке толшаш ыле. Ятыр жап вучымеке, ик кечын армийыш наҥгаят але укем умылаш шке военкоматыш каенам. Тушто мыйым ончальыч, чыла сай маньыч, да вич кече гыч лишыл еҥем-влак мыйым армийыш ужатышт. Пел ий Тамбовышто служитленам, а вес пел ийжым – Самара олаште. Армий деч вара вигак пашам кычалаш тӱҥалынам. Ынде нылымше ий Марий машиностроительный заводышто токарьлан ыштем”, - ойла Алексей.

Марий рвезе пашалан кожмак, тыгак спортым йӧрата. Ялыште илымышт годым моло изи йоча-влак дене пырля мечым чумен модын, а школышто куштылго атлетике дене заниматлен, талын куржталыштын. «Спорт мыланем — чон-кумыл паша. Изирак класслаште тунемме годым куржталмаште призовой верым чӱчкыдын налынам. А кум ий ончыч ече спорт деке кумылаҥынам. Заводнан пашаеҥже-влак спортым пагалат. Тӱрлӧ таҥасымашым эртарена. Ече дене куржмаште икымше гана таҥасымем годым кокымшо верым налынам ыле”, — манеш Иванов.

Иванов Женя шольыж дене сай йолташ улыт. Канат, мӧҥгысӧ пашам пырля ыштат, таза илыш-йӱлам кучат. “Пӱртӱс лоҥгаште канаш йӧратена. Еш дене емыж-саскам погаш чодыраш чӱчкыдын кошташ тыршена. Тений шольым дене шуко модым да поҥгым погенна. Путешествоватлаш йӧратена. Российысе шуко олаште лийынна, Финляндийым ужмо. Шукерте огыл Абхазий гыч канен толынна. Колым кучаш, коньки дене кошташ, сноуборд дене мунчалташ йӧратена. Тений телым Озаҥ оласе горнолыжный базыш миенна, шер теммешке мунчалтышна”, — ойла Алексей.

Тений кеҥежым ММЗ-ын кумшо турслетшо эртен. Тушто Иванов ик эн чолга участник лийын. Тӱрлӧ конкурсышто писылыкшым ончыктен, тидым грамот-влак пеҥгыдемдат.

Самырык рвезе ончыкшым байдаркым налнеже да тудын дене республикысе эҥерлашке лекнеже.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: