"Рубрик деч посна", 2015 ий, Идым тылзын 18-ше кечыже

Виян лий, Наташа!

Статьян авторжо Эльвира Терентьева

Наталья Ошаева 106

Шочынак инвалид ӱдыр Наталья Ошаеван тӱрлымӧ пашажым телевизорышто ужынам ыле, сандене тудо мылам моткоч лишыл еҥла чучын. Кузе мыйым Наташа вашлиеш, мо нерген туддене кутыраш тӱҥалам манын, нигунарат тургыжланен омыл, пуйто шукертак палыме йолташ ӱдырем деке ошкыльым. Наташа дене кутыраш куштылго ыле. Моланжым варарак умылышым: тыглай марий ача-аван марий ӱдырышт. Туддене кок шагат наре мутланышна. Марий койышыжат вӱрыштак ила: Наташа унам чайым подылтыде ыш колто…Наталья Ошаева 128

Наталья илыме пӧртшӧ деч тораште огыл верланыше Йошкар-Оласе 16-шо №-ан школым дистанционно тунемын пытарен. Вара Марий политехнический техникумышто тӱрлызӧ-кружевница да ЭВМ оператор специальностьлам налын. Кызыт Ошаевмытын пачерышт мастар-влакын (Наташан да аважын) кидпашашт дене волгалтеш. Пачерыш изи прихожий гыч коридорыш логалат. Тушто Натальян тӱрлеман выставкыже уна-влакым куандара. Кухньыштым полан орлаҥге ден сӧрал пеледыш-влак путырак сылнештарат. Залыштат тӱран изи кӱпчык ден картине-влак шинчалан вигак пернат. Тӱрлӧ тӱсан шӱртым Наташа лу ияшыж годымак кидышкыже кучен. Сылне сымыктыш тӱняшке икымше ошкылым ышташ Наташалан аваже полшен. Вет Римма Александровна “Шонанпыл” йоча клубышто икшыве-влакым ятыр ий тӱрлаш туныктен.

Наталья Ошаева 112

Тӱр – ӱмырашлык пашам

2011 ийыште Йошкар-Олаште самырык инвалид-влакын “Преображение” клубышт пашам ышташ тӱҥалын. Ты жап гыч начар тазалыкан самырык ӱдыр-рвезе-влак жапын-жапын погынат, тӱрлӧ мероприятийым эртарат. Лачак тиде клубын полшымыж дене Наташа шке тӱр выставкыжым кок гана ончыктен. “Мылам тӱрлаш моткочак келша. Ӱмырем мучко тиде пашам шукташ тӱҥалам, шонем”, — каласыш Наталья.

- А эше мом ыштет?

- Йолташем-влак дене вашлиям, нунын дене шукыж годым Интернет гоч скайп дене кутырем.

- А йолташетше шуко?

- Чынжымак, шукын улыт…

- Пытартыш гана могай кугу мероприятийыш миенат?

- Июньышто “Преображение” клубышто анимациян мультфильмым онченна ыле.

- А мом тыланет тӱрлаш утларак келша?

- Пӱртӱсым, янлык-влакым.

- Эше мом тӱрлет?

- Портретым. Еҥ-влакым тӱр полшымо дене ончыкташ оҥайын чучеш.

- Тӱрлымӧ пашатым тугеже тыглай хобби семын огыл, а сымыктыш семынат аклаш лиешыс.

- Ала (вачыжым туртыктыш…)

- А Юмо шӱлышан пашам возен онченат мо?

- Ковамлан Казанский Юмынава юмоҥам тӱрлен пуэнам ыле.

- Палем: чыла пашат чонлан лишыл… Туге гынат могай пашатым але кудо картинетым кажне кечын ончалде от чыте?

- “Эрвел ӱдыр” ден “Парижысе Эйфелевый башне”кок пашамым. Икымшыжым тӱрлӧ тӱсан шӱртӧ дене тӱрленам, а весыжым бисер дене келыштаренам.Наталья Ошаева 141

- Чынжымак, сӧрал паша-влак. Куанаш таратат.

Наталья Ошаева 123

Шкежат ешан лийнеже

Ошаевмыт ешыште кум йоча кушкеш. Ксения шӱжарже Чебоксарысе И.Н.Ульянов лӱмеш кугыжаныш университетыште тунемеш. Роман шольыжо тений 9-ше классышке куснен. Лач нуно да йӧратыме ачаж ден аваже Наташалан эҥертыш улыт. Йолташ ӱдыржӧ-влакат толын каят. РФ-н Йошкар-Оласе Инвалид-влак обществышт гоч Настя Ширшова, Таня Казакова денепалыме лийме келша.

- Наташа, тый ончыкылык еш илыш нерген садак шонет.

- Мый ешан лиям, шонем. Тидлан ямдылалтам, чыла пашам шке гыч шукташ тунемам. Мутат уке, чылажым ышташ йӧн уке. Мый йолыш ик ганат шогалын омыл.

- Очыни, кажне еҥлан иктаж-кунам йӧсӧ лиеш. А тылат 24 ий илыме пагытыште мо эн нелыла чучын?

- Шкемым тыгайым, начар тазалыкан улмемым, умылаш.

- Йоча годымет шуко шортынат мо?

- Тыгай тат кызытат лиеда. А такшым мый оптимист улам.

- Книгам лудаш йӧратет?

- Лудам, но чӱчкыдын огыл.

- Кумиретше кӧ?

- Мурызо да артистка Наталья Орейро. Тудо мотор да поро гына огыл, а шке оптимист койышыж дене тале лияш туныкта, мурыжо-влакат виян улыт.

- Шочмо кечетлан могай эн сай да шарнымашеш кодшо пӧлек лийын?

- Тений 3 июньышто мылам фотокартычкем-влак гыч плакатым ыштен пӧлекленыт…

Вара тиде плакатым ончыкташ йодынам. Тудо пӧлемысе шинчаш коймо верыште кеча. Чынжымак, тушто Наташа мотор да палаш лийдыме. А воктеныже Миша лӱман рвезын саламлымашыже.

- Тугеже тидым тыйын рвезет пӧлеклен?

- Туге (шыргыжале вашеш).

Наталья Ошаева 116Наталья Ошаева 170

Наташан тӱрлен шинчыме ӱстембал ӱмбалне кок пачашан пӧртым тӱрлыман картине кеча. “Тугеже тыгай пӧртыштӧ илаш шонет?”- йодым туддеч. “Туге”, — вашештыш. Тиде ӱшан дене Наталья Ошаева деч кайышым. Тӱҥжӧ – шкенжын кугу ӱшанже лийже. Но мый туддеке угыч мияш товатлышым – ик кидпашам тунемаш кумылжо шочо. А вес кечын ӱдырын аважым вашлийым, тудо чон корштымыжым луктын каласыш. Ме Наташалан кӧра пӧртым чоҥена манын пеҥгыдемдымыжлан куанышым. Аважын каласкалымыжым вес номерыште лудса.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: