"Рубрик деч посна", 2015 ий, Идым тылзын 18-ше кечыже

Кугу награде ончыко ӱжеш

Статьян авторжо Эльвира Терентьева

Игорь Вручение Игорю Медаль Игоря

Молодёжный правительствын шукерте огыл эртыше форумжо годым тиде самырык марий рвезылан – Игорь Царегородцевлан (снимкыште) — “За заслуги перед Марий Эл” орденын медальжым кучыктышт.

Тыгай медальым чылаштлан огыт пу. Игорь — Марий Эл Республикын “Олимпийский резерв училище” учрежденийжын студентше. Тренер лияш ямдылалтеш. 19 ияш рвезылан тыгай кугу награде вий-куатым пуа.

Игорьлан спортын тӱрлӧ видше келша. Звенигово районысо Чакмарий школышто тунеммыж годым футбол да волейбол дене модын. Вара Транспортно-энергетический техникумыш тунемаш пурен. Тушто теннис дене модмаште районышто икымше верым налын. Но бокс дене заниматлаш утыр кумылжо шочын. Тыге кокымшо курс деч вара технкумым коден, Олимпийский резерв училищыш логалын. “Бокс дене икымше тылзе тренировкыш коштмо деч вара вигак кучедалмашке колтеныт. Тунам икымше бойышто соперникем сеҥенам да кокымшо верым налынам. Конешне, сеҥалтмашат лийын. Кызыт шукырак тренироватлалтам, сандене лектышыжат уло”, — ойла самырык еҥ.

Кызыт училищыште туддене кок тренер — Максим Михайлович Мосунов ден Дмитрий Геннадьевич Лукоянов – тренироватлалтеш. Бокс дене икымше тренерже — Андрей Витальевич Николаев. Лачак нунын надырыштлан кӧра таче Игорь Царегородцев ятыр вере сеҥымашке шуэш.

Игорь республикынан веле огыл, тыгак Российын чапшым аралаш шона. Рвезе бокс дене улыжат кок ий заниматла. Но Российын бокс дене первенствыштыже кундемнам арален да шке категорийыштыже кумшо верым налын. Игорь шке гаяк нелытан 19-22 ийготан рвезе-влак дене таҥасен. Российыште выступатлыме деч ончычак бокс дене спорт мастерыш кандидатын нормыжым шуктен. А ты таҥасымаште икымше але кокымшо верым налеш гын, спорт кандидат лийын кертеш ыле. Ончыкыжым тидым шукташ тыршаш тӱҥалеш. Ты арня мучаште Игорь Ставропольышто профсоюз-влакын эртышаш центральный соревнованийышкышт кая. Тушто Европышко логалаш йӧн почылт кертеш. Но категорий вестӱрлӧ лиеш, тушто 19-40 ияш-влак иктеш таҥасат.

Эльвира Терентьева.

Фотом рвезын альбомжо гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: