"Рубрик деч посна", 2015 ий, Идым тылзын 18-ше кечыже

Кумылзак пӧръеҥ-туныктышо

Статьян авторжо Эльвира Терентьева

Николай Александрович Чемеков1

Марий Купто школышто физике ден математикым Николай Александрович Чемеков 26 ий туныкта. 2008-2010 ийлаште старший вожатыйлан пашам ыштен. Ӱдыр-рвезе-влакым шкеж дек шӱмаҥден моштен, эсогыл йӧратен шынденыт манаш келша. Шарнем, Марий Купто йочасад почылтмеке,воспитательлан ик жап пӧръеҥ ыштыш. Йоча-влак туддеч тӱрлым йодыштыт, пырля кумылын модыт ыле. Вет южо ешыште икшыве-влаклан ачаштын тӱткышышт ок сите але пӧръеҥ воспитатель дене оҥайракын чучеш ала-мо. Ӱдыр-рвезе-влак Николай Александрович йыр мӱкшла пӧрдыт. Вожатыйлан пашам ыштыме годым яра жапшым эре тунемше-влаклан ойырен: нунын дене пырля школысо ятыр мероприятийым урок деч вара эртарен, районысо йоча фестивальлашке школысо командым ямдылен,кум кундемысе (Киров область, Марий Эл да Татарстан) йоча-влакым ушышо “Келшымаш тулотыш” коштыктен. Ӱдыр-рвезе-влак вожатый деке тӱрлӧ йодыш дене пуреныт да кызытат тудлан эҥертат.

«Вожатый сомылым шуктымо жап ушыштем эре ила да пашам ышташем полша, — ойла Николай Александрович. — Теве 2009 ийыште Звенигово районысо Илеть поселкышто верланыше палаточный городокышто пел тылзе лиймем йоча тӱням утыр веселам ышташ полшен. Тидыже регион-влак кокласе «Галстучная страна» лӱман IV фестиваль ыле. Тудым Марий Эл Республикысе вожатый-влакын «Эр вий» педагогический ушем ден Татарстан Республикысе «Союз наследников Татарстана» мер организаций моткоч оҥайын эртареныт ыле. Тушто тӱрлӧ семинарыш коштынам, вес кундемласе вожатый-влакын опытышт дене палыме лийынам».

Н.А.Чемеков вожатый пашалан у шӱлышым налын да шке мастарлыкем утыр шуарен гына шуктен, но 2010-2011 тунемме ийыште оптимизацийлан кӧра Марий Купто школышто вожатый должностьым кораҥденыт. Таче тудо слётышто погымо опытшым да усталыкшым класс вуйлатыше семын кучылтеш, 8-ше классыште тунемаш тӱҥалше ӱдыр-рвезе-влакым чолгалыклан, мер пашалан туныкта. Вес ийын тудын визымше выпускшо лиеш.

Икымше категориян туныктышо алгебрым, геометрийым да физикым туныктымо деч посна географийым, историйым, православий культурын негызшым да ИКН предметлам туныкта. Каласыман: жапше годым Н.А.Чемеков Н.К.Крупская лӱмеш Марий кугыжаныш пединститутын физика да математика факультетшым тунем пытарен. Ыштыме пашажым ӱдыр-рвезе-влакын сеҥымашышт гоч аклаш лиеш. Теве кодшо ийын районысо олимпиадыште ойыртемалтыныт: 7-ше классыште тунемше Вадим Апасов физике дене призан верыш лектын, 6-шо класс гыч Миральда Маякова математике дене эн шуко баллым поген.

Николай Александрович ден пелашыже 28 ий пырля илат. Зинаида Николаевна ятыр ий школышто тырша. 10 ий пионервожатыйлан ыштен, вара немыч, француз йылмылам туныктен. Ынде кудымшо ий школыштак верланыше йочасадыште воспитатель сомылым шукта. Тидлан ешартыш образованийым налын. “Пелашем ешыште сай суртоза, шкеак пӧртым чоҥен. Шукерте огыл столяр пашам шукташ изирак пӧлемым йӧнештарен, тушто яра жапше годым мӱкш омартам, шырчык омартам ышта, моло пашамат шукта.Ваш-ваш полшен илена, мӱкшым ончена”, — каласыш пелашыж нерген Зинаида Николаевна.

Туныктышо ешыште кок йоча кушкын шогалын, ынде ача-ава сурт деч изиш торленат шуктеныт. Саша эргышт Руэмыште верланыше республикысе шуко профилян лицей-интернатыште информаций ден технологий направлений дене тунем лектын, кызыт Поволжский кугыжаныш технический университетыште шинчымашым пога.

Аня ӱдырышт Йошкар-Оласе политехнический лицейыште социально-экономический класс деч вара МарГУ-шко тунемаш пурен. Кызыт руш йылме ден литератур туныктышо лияш ямдылалтеш.

Н.А.Чемеков — чыла пашам ончылгоч шонен ыштыше пӧръеҥ-туныктышо. 2014-2015 тунемме ийлан ятыр планым ыштен, тунемше-влаклан келге шинчымашым урокыштат, факультативыштат пуаш шона, йоча-влаклан олимпиадыште лийын кертшаш задаче-влакым решатлаш ончылгоч палемден.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: