"Рубрик деч посна", 2015 ий, Идым тылзын 25-ше кечыже

Марий еш ила Шем теҥыз воктене

Статьян авторжо Эльвира Терентьева

Николаевы

Марий еш-влак тӱрлӧ кундемыште улыт. Тидлан пример семын Новороссийск олаште 13 ий илыше Николаевмыт ешым кондем.

Вате-марийын тиде герой-олашке логалмыштат моткоч оҥай. Тиде 2000 ийыште лийын. МарГУ-н историй да филологий факультетшым тунем пытарыше Андрейым Новороссийск оласе ик частьышке служитлаш колтеныт. А келшыме ӱдыржӧ тунам 11-ше классым тунем пытарен. Лачак ты олаште Наташан родо-тукым акаже илен, сандене йӧратымашым кӱрлаш огыл да йӧратыме рвезыж дене йыгыре лияш шонен, вигак тушко кудалын.

Тыге ик ий службо писын эртен каен. Морко район Эҥерсола ялын эргыже Андрей ден Звенигово район Суслоҥгер гыч Наташа шочмо кундемышкышт пӧртылын огытыл, ешым тыштак чоҥаш шонен пыштеныт. Ынде тиде марий ешыште кум икшыве кушкеш. Кок нарашта ӱдыр улмо годым ача-ава эргын кӱлешлыкшым шижын. Вет Николаевмыт пӧръеҥ вий кӱлмым чотак палат. Теве Новороссийск деч тораштак огыл верланыше Раевская станицыште кокымшо пӧртым чоҥеныт. Икымшыжым нуно Наташан шольыж дене пырля нӧлтеныт улмаш, сандене тудым ужаленыт, оксам пайленыт. Кокымшо пӧртышкышт кок ий ончыч илаш пуреныт. Лач изи Артёмын ош тӱням ужмыж деч ончыч. Ынде тиде ешыште куан нимучашдыме. Ача тудланат полышкалыше лиеш манын, моткоч йывыртен.

Николаевы1

Наташа тӱрлӧ вере – кевытыште, йочасадыште – пашам ыштен. А кызыт йоча дене шинча да тыгодымак кӱшыл шинчымашым налеш. Современный гуманитарный академийыште юрист специальностьлан тунемеш. “Илыш деч вараш кодмо ок кӱл, тыгай образований кызыт моткоч кӱлешан”, — ойла Наташа. Тудо сессий жаплан идалыклан кок гана Марий Элышке кудалыштеш. Ача-аваж да родо-тукымжо деке вашка. Идалыкат пеле ончыч ачаже илыш дене чеверласыш, сандене ынде кажне гана толмыж годым тудын шӱгарышкыже пеледышым пышта я, кочкышым пурлын, пелештен кая… Эсогыл кодшо гана кужу корным шкежак машина дене кудал эртен.

Андрей кажне кечын Новроссийскыш кудалыштеш. Ятыр ий цементым кондымо да калыклан ужалыме верыште тырша. “Паша вийым, чытымашым да чолгалык ден чоялыкымат йодеш. Теве Володя изам илаш толмеке, грузовой машиным налынна, ынде ты пашам шукташ шкенан транспортна уло – изиш куштылгырак лийын”, — каласкала Андрей.

Такшым тыште Николаевмытын родо-тукымышт шагал огыл. Андрейын изаже, ачаже, Наташан шольыжо Новороссийск олаште илат да пашам ыштат. Андрейын изаже тений шке пӧртышкыжӧ илаш пурен. А тӱҥжӧ – Николаевмыт ваш келшен да полшен илат.

“Кок пачашан пӧртыштӧ шкем пиаланла шижына” манеш кум шочшан еш. Даша кодшо кечылаште 11 ийым темен, но капше дене аважым эртенат каен, вашке ачажымат поктен шуэш. Даша баскетбол секцийыш коштеш. Софьялан 8 ий темын. Тудо кушташ моткочак йӧрата, сандене ынде икмыняр ий художественный гимнастике дене заниматла. Эртыше тунемме ийын тудо Новороссийск кундемысе гимнастке-влак коклаште шке ийготан тӱшкаштыже икымше верым сеҥен налын. А кок ияш Артём кызыт акаже-влак деч чылалан тунемеш.

Николаевмыт

Андрей ден Наташан вашла ужын, икте-весыштым йӧратен шындымыштлан ятыр пагыт эртен гынат, шергашлалтме татышт кок ий ончыч гына лийын. Изирак сӱан дене Андрей Наташам марлан налын. Тидыже йӧратымаш шулен йомын огыл манмым пеҥгыдемда. Нуно икте-весыштым 13 ий ончычсылак пагалат да йӧратат.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: