"Сылнылык тӱня" рубрик, 2015 ий, Идым тылзын 18-ше кечыже

“Неле пӱрымашан герой-влакым модын, шукылан тунемаш лиеш”

Статьян авторжо Анастасия Эманова

- шона Д.Гребнев.

Йошкар-Оласе Курчак театрыш шукерте огыл самырык артист-влак пашаш толыныт. Нунын коклаште иктыже – Данила Гребнев. Рвезе театрыште кокымшо тылзе веле ышта гынат, икмыняр спектакльыште модын шуктен. А “В гостях у Оле Лукойе” постановкышто тудлан тӱҥ рольым модаш ӱшаненыт.

Изи артист

Курчак театрын артистше Данила ГребневДанила Звенигово олаште шочын, но изиж годымак аваж дене Йошкар-Олаш илаш кусненыт. Рвезе 30-шо №-ан школыш коштын. Моткоч чолга тунемше лийын. Школысо спектакльлаште эреак модын. “Рвезе-влак коклаште мыяк веле сценыште модаш вожылын чай. Садланак, очыни, рольым эре пуэныт. Эн ончыч кӱлеш да модынам, а вара ты пашам йӧратен шынденам. Тӱрлӧ койыш-шоктышан герой-влакым модаш моткоч оҥай. Школышто икана писатель Александр Грибоедовын творчествыжлан пӧлеклалтше мероприятий лийын. Тушто ме, тунемше-влак, “Горе от ума” произведений негызеш шонкалымашан спектакльым шынденна, комедийым умбакыже шуенна. Постановкышто мый тӱҥ рольым модынам. Шарнем: пуйто ала-могай пайрем. Чылан ӱстелтӧрыштӧ шинчат, мый – покшелне. Ала кӧ йодеш: “Кто же вы?”, а мый “Чацкий!” манын пеҥгыдын ойлем. Тунам умыленам: актер паша мыйынлык”, - ойла Д.Гребнев.

Чолга студент

Данила, школым тунем пытарымеке, И.С.Палантай лӱмеш тӱвыра да сымыктыш колледжыш актер искусство специальностьлан тунемаш каен. Уста рвезе студент годымат ойыртемалтын. Тӱрлӧ постановкышто ик эн тӱҥ роль-влакым чӱчкыдын модын. А нылымше курсышто тудым да эше икмыняр студентым Курчак театрын художественный вуйлатышыже Алексей Ямаев театрыш пашаш ӱжын. Данила тений дипломым налын да августышто юзо курчак тӱняш толын. “Театрыште самырык артист-влаклан кукловождений урокым эртарат. Курчак дене пашам ышташ тынар чот неле манын шонен омыл. Нуным пел шагат дене южгунам кучыман, кид моткоч ноя. Но тиде оҥай паша. Театрыште пуйто кокымшо гана шочынам. Курчак дене угыч кошташ, мутланаш, возаш тунемам”, — манеш артист.

Данилан мастарлыкшым театрын артистше-влак аклен шуктеныт. РМЭ-н калык артистше Эльвира Лисицына тудын нерген теве мом ойла: “Талантан рвезе. Роль-влакым сайын модеш. Геройжо верч шкежат тургыжлана, куана. Тӱҥжӧ: йоча-влак дене йоча семын койын мошта”.

Д.Гребнев изинек творчествылан кумылан кушкын. Музыкым йӧрата. Шкежат семым воза. Фортепьяно дене шоктен мошта. “10 классыште фортепьяно дене шокташ тунемаш Йошкар-Оласе ик музык школыш лӱмын индивидуальный занятийыш коштынам. Колледжыште семӱзгар предмет лийын. Тушто мемнам Нина Алексеевна Яналова туныктен. Лачак колледжыште фортепьяным сайын шокташ тунемынам. Мӧҥгыштӧ синтезаторем уло. Мастарлыкем вияҥдаш тыршем, — ойла рвезе. — Йӧратымаш нерген почеламут-влакым возкалем. Икымше музем руш йылме ден литературым туныктышо лийын. Тудак мыйым поэзийлан кумылаҥден. Почеламут корныла гоч моторлыкым ужаш туныктен. Икымше почеламутем 10 классыште тунеммем годым возенам. Тунам Йӧратыше-влакын кечышт годым ик ӱдырлан шке шонымо мурсаскам пӧлекленам. Шӱлыкан почеламутым возаш йӧратем, садлан шукыж годым трагедий дене мучашлалтеш. Тургыжланымаш, кӧргӧ конфликт нерген возаш келша. Пытартыш жапыште прозылан кумылаҥынам. Кызыт изирак ойлымашем-влак веле улыт, но ончыкшым повестьым але романым возынем”.

Юзо курчак тӱня

Данила “В гостях у Оле Лукойе” концерт-спектакльыште Оле Лукойым модеш. Тиде концертым артист-влак Йошкар-Оласе да районысо йочасадлаште ончыктат. Оле Лукойе йоча-влаклан тӱрлӧ йомакым каласкала, а ты жапыште тудын шеҥгелне йомак “ылыжеш”, артист-влак тӱрлӧ рольым модыт. “Театрыште “Теремок” спектакльыште Маскам модам. Пеш оҥай роль. Курчак театрыште мыланем чылажат келша. Тыште икмыняр жаплан йоча пагытыш пӧртылат, йоча семын веселитлет, куанет, модат. Тиде тыгак лийшаш. Ты театрыште ончыкталтше чыла спектакль, ик могырым — йоча-влаклан, а вес могырым – кугыеҥ-влаклан. Вет кажне спектакль молан-гынат туныкта. Мутлан, “Теремок” спектакльым ончен, ача-ава-влак умылат: кажне айдемын шке пӧртшӧ лийшаш, тушто пагалымашым, ласкалыкым арален моштыман.

Сентябрь мучаште “Машенька и Медведь” спектакльым ончыктена. Ты постановкышто мый актер Максим Ивановлан полшем. Тудо Маскам модеш, а курчак моткоч неле да сложный, садлан икмыняр кид кӱлеш. Спектакль драматический. Кугыеҥ-влак шортыт, шонем”, — манеш актер.

Чарлим моднеже

Кажне актерын модаш шонымо рольжо уло. Данила румын писатель Михаил Себастьянын “Безымянная звезда” пьесыж негызеш шындыме спектакльыште туныктышым да американ писатель Дэниел Кизын “Цветы для Элджернона” ойлымашыж почеш шындыме постановкышто Чарлим моднеже. “Мыланем неле ситуацийыш логалше геройым модаш оҥай. “Цветы дла Элджернона” произведенийыште тӱҥ герой Чарли – уш дене почеш кодшо пӧръеҥ. Но тудлан угыч тунемаш, таза еҥ семын илаш йӧн пуалтеш. Тиде образ пеш виян”, — ойла Д.Гребнев.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: