"Рубрик деч посна", 2015 ий, Идым тылзын 18-ше кечыже

«Пеледыш» йочасадыште — у тургым

Статьян авторжо Эльвира Терентьева

 

Сотнур селасе ик мотор верыште тӱрлӧ-тӱрлӧ тӱсан пеледыш коклаште «Пеледыш» лӱман йочасад верланен. Тышке Корамас, Курмызак, Памашэҥер, Куршбал, Нурмучаш Шайра, Руш Шайра, Полатсола, Шайрамбал, Ярамарий ялла гыч шӱдӧ утла йоча куанен коштеш. Пырля модаш, икте-весе дене палыме лияш да ваш-ваш келшен илаш кушто лиеш? Конешне, йочасадыште. Но тыште модаш гына огыл, эше шукылан туныктат: мураш, кушташ, почеламутым сылнын каласкалаш, эше школыш каяш ямдылат.

Вет йочасад — образованийын икымше тошкалтышыже. Теве сентябрь тӱҥалтышыште оҥай мероприятий-влак лийыч. Марий Эл Республикын туныктымо да шанче министерствыже икымше сентябрьыште школлаште да йочасадлаште «Мый талантан улам!» урокым да воспитательный мероприятий-влакым эртараш темлен. Меат, Сотнур йочасадын пашаеҥже-влак, тиддеч ӧрдыжеш ышна код. Кокымшо младший группо гыч тӱҥалын подготовительный группо марте ятыр мероприятийым эртарышна. Теве кыдалаш группышто «Салам, Растишка!» лӱман модыш лие. Воспитательница Светлана Васильевна Семёнова «Весела мераҥиге-влак» модышым эртарыш, тушто-влакым туштыш, тӱрлӧ куштымаш лие. Йоча-влакын куаныштлан мучаш уке!

Старший группышто «Йомак тӱняшке унала» мероприятий эртаралте. Йомак тӱняшке логалаш куштылго огыл, тӱрлӧ авыртыш вашлиялтеш, а йоча-влакым нимогай нелылык огеш лӱдыктӧ. Нуно, чыла сеҥен, «йомак тӱняшке» миен шуыт, Вувер кува денат вашлийыт (Вувер куван рольжым Ирина Михайловна Огурцова модын ончыктыш, пеш келыштарыш). Воспитательница Эльвира Геннадьевна Гурьяноват йоча-влакын кумылыштым савырен моштыш.

Подготовительный группышто «Вашке школыш каена» лӱман мероприятий лие. Самырык воспитательнице шке поро кумылжо дене йоча-влакын кумылыштым савырыш. Нунылан «Кляксографий» модыш пеш келшыш. Йоча-влак кок тӱшкалан шелалтыч. Надежда Олеговна Покровская кок кугу кагазеш чиям оптале. Йоча-влак, сок трубочкыш пуалын, нине чия дене пушеҥгым ыштышт, кудо командын пушеҥгыже кугурак лиеш — таҥасышт. Икшыве-шамыч пеш тыршышт, вет тиде модыш йоча-влаклан у лийын, садлан моткоч келшен.

А ик кечын 1441264640_0902-7пайрем умбакыже шуйныш. Ынде чыла йочам музыкальный залыш погышт. Кок клоун-влак: иктыже Клепа (Эльвира Геннадьевна), а весыже Финтифлюшка (Надежда Олеговна) йоча-влаклан йокрокланаш ышт пу. Нуно тӱрлӧ мыскарам ыштыльыч, модыктышт, «Весела стартым» эртарышт. Пытартышлан, чылан шогалын, тӱрлӧ сем почеш кушталтен пуышт. Икманаш, йоча-влаклан кок кечыжат моткоч келшыш. Мый ӱшанем, «Пеледыш» йосасадышкына изи ӱдыр-эрге-влак кажне кечын куанен кошташ тӱналыт .

Валентина Печникова,

воспитатель.

Фото-влакым йочасадын альбомжо гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: