"Улам мый Рве-зы-лык!" рубрик, 2015 ий, Идым тылзын 25-ше кечыже

Шонымашет шукталтше, Валерия

Статьян авторжо Анастасия Эманова

Йошкар-Олаште “Марий Элын ончыкылыкшо – самырык тукымын кидыште. Ме ончыкылык корным ойырена” форум эртыш. Тушто Татарстан гыч марий ӱдыр Валерия Васильева дене палыме лийым.

Валерия ВасильеваВалерия Балтаси район Улисьялыште шочын-кушкын. Ныл классым шочмо ялысе школыштыжо тунемын, вара – Ципья кыдалаш школышто. Ӱдыр изинек кушташ йӧратен, поснак — марий куштымашым. Концертлаште мастарлыкшым эреак ончыктен, шкетынат куштен, школысо ансамбль дене пырлят тавалтен. “Школым тунем пытарымеке, куштымым чарненам. Мастарлыкым эре нӧлтыман, а мый тунемаш утларак жапым ойыренам”, — манеш Валерия. В.Васильева 9-11-ше класслаште марий йылме да литератур дене олимпиадылаште шинчымашыжым терген, эреак, манаш лиеш, призовой верым налын. Шочмо йылмыж дене книгам лудаш йӧрата, шкежат возкала. “Мыланем чылажат оҥай. Ошкылмем годым пӱртӱсым, еҥ-влакым ончем да тӱрлӧ шонымаш шочеш. Шонымашем-влакым кагазыш возаш вашке тыршем. Тӱняште шуко калык ила. Йошкар-Олаштак йот элла гыч толшо еҥ-влакым ужаш лиеш, шукынжо студент улыт. Кызыт МарГУ-со историй да филологий факультетыште журналистлан тунемам. Кумшо курсын студенткыже улам. Ончыкшым тӱрлӧ калык, нунын тӱвырашт, шочмо верышт нерген газетлаш статья ден очерк-влакым возынем да тудым оҥай, келшыше фото-влак дене сӧрастарынем”, — ойла ӱдыр. Студентке Марий Самырык тукым слетышто лийын, МарГУ пелен самырык этножурналистын школышкыжо коштын, тӱрлӧ конференцийыш да форумыш эреак миеда. “Тенийсе “Финн-угор калык-влакын поянлыкышт” II тӱнямбал студенческий форум шарнымашеш кодын. Тушто шуко уым да пайдале информацийым пален налынам, Россий гыч веле огыл, Финляндий, Германий, Венгрий да Чехий гыч толшо студент-влак дене мутланенам. Тыгай мероприятийым кажне ийын эртарыман, шонем. Тыгай форум — калык-влак коклаште шкешотан келшымаш кӱвар. Вет кызыт тӱняште ласка огыл, ваш умылыдымаш шарлен. Садлан форум ден конференцийлаште тӱрлӧ калыкым погымаш моткоч сай да пайдале. Лач пырляште ик ойыш шуын кертына. Калык-влак коклаште умылымаш, икте-весылан полшымаш да чытымаш лийыт гын веле тыныс илыш озалана”, — шона Валерия.

Васильева журналист профессийым чыла могырымат палынеже. “Ямде лий” газетыште ик жап пашам ыштен, йоча-влаклан статья-влакым возкален, кызыт — МарГУ-со “Объектив ТВ” медиа-проектын операторжо. Университет, студент илыш дене кылдалтше сюжет-влакым войза.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: