"Рубрик деч посна", 2015 ий, Идым тылзын 18-ше кечыже

Шун ате гыч — сӧраллык

Статьян авторжо Эльвира Терентьева

IMG_7197 KSF_6452 Гончар паша

Тений кеҥежым Крымыште эртыше “Таврида” образовательный форум моткоч шуко талантан ӱдыр-рвезым чумырен. Художник-влакын творчествыштым вияҥдымылан пӧлеклалтше сменышке Марий Эл Республик гыч лаччолга да уста ик еҥым – 27 ияш Полина Метельковам – колтеныт. Тушко мийымыжлан ик татланат чаманен огыл, таче тудо налме шинчымашыжым тыште пайдалын кучылтеш.

- Сменыштына Россий гыч ятыр художникын илышыж дене палыме лийынам. Мыйын шонымаште, творческий пашам шуктышо еҥ-влак шкем эре вияҥдышаш да ончыко кайышаш улыт, сандене нунылан икте-весыштын шуктымо сомылыштым умыленак шогыман, — каласкала Полина. — Такшым “Тавридаш” кайыме деч ончычат ятыр шонымаш лийын, а ындыжым кумылем нӧлтшӧ, сандене нуным илышыш шукташ тӱҥалынам.

Тений майыште Полина Метелькован икымше персональный кугу выставкыже эртаралтын ыле. Тудым ӱдыр “Мой дневник” манын лӱмден. Йошкар-Оласе художественный училище деч вара Санкт-Петербургысо художественно-промышленный академийыште тунемме жапыште тудо тӱрлӧ оласе выставкылаште шке пашажым ончыктен. Кодшо ийын “Край марийский” выставкышке радынаже логалын ыле. Тушто Полина ончышо-влаклан художник-график семын шкенжым палдарен.

Полина Национальный художественный галерейыште пашам ышта. Тений январьыште творческий студий-влакым тушто почмо. Кеҥеж деч вара тудо угыч октябрьыште почылтеш. Студий тений кум направлений дене пашам ыштышаш: живопись, сӱрет да фарфор дене роспись. Полина живопись ден фарфорышто росписьым ышташ туныкта. Тышке тунемаш толшо-влаклан нимогай материалым налаш ок кӱл. Лач тунеммылан гына оксам тӱлыман. Такшым сымыктыш тӱняште шкем терген ончаш да сӧраллыкым шочыкташ тыршыше еҥ-влак эре лийыныт. Кумылан-влакым галерейыште вашлияш ямде улыт. Угыч студий шке омсажым октябрьыште почеш.

Чынжымак, рӱдолаштына йоча-шамычлан ятыр кружок, студий пашам ыштат, а кугыеҥ-влаклан кумылыштым нӧлташ, кеч ик картиным шочыктен ончаш але сымыктыш тӱняште шкем кычалаш шонышылан тидыже, мутат уке, пӧлек да ончыко кайымашат манам.

Республикысе кугу опытан художник-влак самырык сӱретче-влаклан мастер-классым эртарышт манын шона. Ты сомылым Национальный художественный галерейыште эртараш келшен толеш. Тыгай кумылым теве Россий Федерацийын сулло художникше Измаил Ефимов ончыктен.

Чылан шонат: чолга ӱдыр-рвезе-шамычлан Москош але Питерыш кайыман да шкем тушто ончыктыман.“Таврида” форумыштат тидым ышташ куштылго ыле. Тушто лӱмлӧ художник-шамыч дене кутыренам, молодёжь дене палыме лийынам, ятыр сомыллан тунемынам, шинчымашем пойдаренам. Кызыт тӱрлӧ тоштерыште да моло вереат тыршыше еҥ-влак дене кылым кучем, икте-весе дене выставкым эртарыме шотыштат кутырен келшенна”, — ойлыш Полина.

Форумышко тӱрлӧ специальностян художник, скульптор да моло творческий еҥ миен. Нуно ятыр семинарыште лийыныт, мастер-классыш коштыныт. Тылеч посна Шем теҥызыште йӱштылыныт, яндар юж дене шӱленыт, пӱртӱсыштӧ каналтеныт. А тидыже творческий айдемылан моткочак кӱлешан.

Полина специальностьшо дене – художник-керамист. А “Таврида” форумышто линогравюрым ышташ кумылаҥын. Тыгак Шем теҥыз воктене возымо радына-влакым тӧрлатен, калык ончыко лукнеже. Туге гынат самырык ӱдырын чонжылан керамике утларак келша. Шун гыч ӱзгарым ыштыме пашам мӧҥгыштыжак шукта, лач мастер-классым галерейыште эртара. Тидлан пӧръеҥын гаяк кидвий кӱлеш, лавыргыме дечат лӱдман огыл. Полина тиддеч ок лӱд, изинекак тӱрлӧ фигурым ненча. Ондак пырысиге ден пинеге йӧратыме фигуржо-влак лийыныт гын, кызыт пеледыш вазым, айдемым да тулеч молымат шочыкта. Эсогыл икте-весе дене сӧраллык дене чонжым луштараш да паша-влакым калыклан ончыкташ “Вконтакте” социальный сетьыште “Керамика. Что нового?” тӱшкам почын. Икманаш, самырык ӱдырын моло деч ойыртемалташ, уста еҥ-влак деч тунемаш да молым тидлан туныкташ, эсогыл республикыште илыше калыклан куаным да пайдам кондаш йӧнжат, кумылжат улыт.

Эльвира Терентьева.

Фото-влакым ӱдырын альбомжо гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: