"Кузе илет, ялем?" рубрик, 2015 ий, Идым тылзын 21-ше кечыже

Кузе илет, ялем?

Статьян авторжо Анастасия Эманова

Кеҥежым модым, шыжым поҥгым погат

Кодшо арнян ме Морко районысо Зеленогорский поселкыш командировко дене мийышна. Советский районысо Роҥго селам эртымек, чодыра гоч лӱҥгалт-лӱҥгалт чодыра корно дене кудална. Кажне гана ик йодыш лектеш: “ Тиде корныжым кунам ачалат гын? Адакшым, кӧлан кӱлеш?”.

Ынде мыняр ий дене, могай ий, курым дене, кылде-колдо корно дене Йошкар-Ола гыч автобус, “Газель”, тыглай машина да чодырам шупшыктышо кугу машина-влак тышеч Морко районышко кудалыт. Корнын пӱрымашыже тыгай! Чыташ! Айдемын семынак!

Кызытсе сай илышыште тиде кужыт корным ала-кунамак тӧрлыман ыле!

Теве лач ты корнымбалнак ме чодырашке ошкылшо вате-марийым вашлийна. Тиде Лиза ден Руслан поҥгым погаш ошкылыт ыле. Рӱзалт толмо деч вара каналташат сай амал ыле. Палыме лийна. “Ӱшӱттӱр ял гыч улына. Мый кеҥеж гоч чодыраште “илем” манаш лиеш. Модым, емыжым погем, теве ынде поҥгылан ошкылына. Ялыште мӧҥгыштак шинчет гын, мом ыштет – шудым ямдылет, пакчагӧргым шындет, телылан ямдылатат.”

Елизавета Поторочина Моркысо ик заводышто электромеханиклан пашам ыштен. Ачаже черланымек, ялышке илаш толын. Пелаш деч посна кок йочам куштен, иктыже Сургутышто, весыже Йошкар-Олаште ила, пашам ыштат. Ялыште Лиза Руслан Иванов дене ваш ушен, пиалыштым чоҥат. Тудынат пелашыже уке, икта окпале, кушто тудо, увер деч посна йомын. Кычалыныт, мунын огытыл. Тыге тулык йӱксӧ мужыр вашлийын, икте-весылан эҥертен илат. Ялыштак Русланын эргыж ден шешкыже, уныкаже улыт. Чыланат ойгым сеҥен, шочмо ялыште куатым налыт.

Тылзылан ик гана кӱтӱ логалеш

Весшӱргыш миен шумо деч ончыч, пасушто кӱтӱм ужна. Корнытӱрыштӧ Лида акай да Колюш изай Герасимовмыт дене палыме лийна. Мыланна шокшо чайым йӱктышт кампеткым пукшышт. “Кугу яллан кӱтӱшкӧ улыжат 29 ушкал лектеш. Шукын ужалат, кызыт вольыкым шагалын ончат”, — манеш Лида акай. Тудо пашалан писе ӱдырамаш. Сурт сомылкам эре ворандарен шога. Вольыкым кучаш кумылжо йомын огыл. Сӧснам, лудым, чывым ашна. Ушкал уло гын, ялыште илымыла чучеш”. — манеш тудо.

Татьяна Иванова.

Иван Речкинын фотожо-влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: