"Рубрик деч посна", 2015 ий, Шыжа тылзын 22-шо кечыже

“Илышым йӧратен илем”

Статьян авторжо Эльвира Терентьева

Черепанова Л

Тыге каласыш начар тазалыкан 33 ияш ӱдыр. Тений Л.Черепанова Российысе инвалид обществын Марий Элысе пӧлкажын эртарыме “Я – автор” конкурсышто шкем терген да “В слове “мы” сто тысяч “я” литературно-поэтический номинацийыште икымше верыш лектын. Тудо тыгай конкурсыш кокымшо гана ушнен, тидлан лӱмынак почеламутым возен.

Любовь Черепанова кызыт аваже, Надежда акаже да Михаил шольыжо дене пырля ила. 2012 ийыште самырык инвалид-влакын “Преображение” клубышт “Я просто живу любя” сборникым савыктен. Тушто Любанат возымо 8 почеламутшо пурен. Ӱдыр йӧратымаш, илыш нерген утларак шке шонымашыжым ронча, мом кузе умылымыж дене палдара.

Ӱдыр шочынак ДЦП черан да тудлан кошташ йӧнан огыл, сандене коляскыште шинчашыже логалеш. Тылеч посна шола шинчаже шайык. Но Люба ынде илышыште шукылан тунем шуын, шкем чолган кучаш тырша. Инвалид-влаклан йӧнештарыме благомобиль денат моло деч ончыч кудалыштын ончен. “Тидыже путырак йӧнан. БлагоМобильым ӱжыктышым да Йошкар-Оласе паркыш каналташ миен тольым. Таксишке волонтёр-влак полшымо дене шинчым, нунак коляскемым багажыш пыштышт. Икманаш, моткоч кӱлешан машина. Мемнан деке толын шумыжлан моткоч куаненам”, — каласыш Люба.

Школ деч вара Л.Черепанова Т.В.Иштрикова лӱмеш “Синяя птица” гимназийым заочно тунем лектын. Тунемме верыш тудо кварталлан ик гана коштын, туныктышо-влак деч заданийым налын да шуктен. А 15 ияшыж годым чонышкыжо почеламутым возымо шӱлыш толын. “Икымше почеламут корнылам йоча шинча дене возенам, тудо пырысиге нерген лийын”, — ойла самырык еҥ.

“Илышыштем сай примерлан тӱҥалтыш класслаште туныктышемым – Фаина Владимировнам – шотлем, — каласыш Люба. — Тудо мыйым поро лияш, еҥым колышташ туныктен. Тыгаяк поро да шуко кӱлешан ой-каҥашым пуышо еҥлан “Синяя птица” гимназийын директоржо Татьяна Вячеславовнам шотлем. Эше палыме художник Ольга Вячеславовна Пустоветовам палемдыде ом керт. Тудын каҥашыж почеш “Синяя птица” гимназийыш логалынам”.

Шукерте огыл Л.Черепанова “Вконтакте” социальный сайтыште “Я просто живу любя” тӱшкам почын. Тушко ондак возалтше почеламутлам пуртен. Поэзийым, сылнымутым йӧрата, чӱчкыдынак шке жапшым книгвлак дене эртара, кызыт автор Юлия Шилован романже-влакым икте почеш весым лудеш.

“Иктаж-кушто мемнан гай еҥ-влаклан мероприятий лиеш гын, мӧҥгыштӧ шинчен ом турко. Теве тений 26 июньышто Йошкар-Олаште Самырык-влакын кечыштлан пӧлеклалтше пайремыш ӱжыныт ыле. Тидлан мый лӱмынак “Жизнь” почеламутым возенам да Ленин лӱмеш площадьыште, эше вес верыштат тудым лудын пуэнам, — каласыш Любовь. — А спонсор лектеш гын, чыла почеламутем иктыш поген, сборникым савыктен луктам ыле. Тӱрлӧ вере коштыктышо да полшышо ик сай йолташем — волонтёр Александр Маслов. Тудланак кӧра 2011 ийыште мыят моло ӱдыр дене пырля “Показ мод” конкурсыш ушнен кертынам. Тау тудлан”.

Теве тыгай шонымаш дене ила Люба Черепанова. Моло ӱдыр семынак тургыжлана да ончыкылык илыш нерген шонкала. Ешыж дене пырля Медведево посёлкышко 2011 ийыште илаш кусненыт, но тушто лекташ да пураш йӧнанжак огыл. Але вара чоҥышо-влаклан тынарак йӧсӧ пандусым ышташ?

Эльвира Терентьева.

Снимкым еш альбом гыч налме.

Рамкыш: БлагоМобиль – оксам тӱлыде шупшыктышо такси. Туддене I группо инвалид-влак пайдаланен кертыт. Тыгай йӧным “Жизнь” фонд пуэн. Тудым ӱжыкташ телефон номер – 8- 937- 933-12-17.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: