"Рубрик деч посна", 2015 ий, Шыжа тылзын 16-шо кечыже

НЕМЫЧ ВАТЕ ЛИЯШ ШОНЕН

Статьян авторжо Эльвира Терентьева

Йоча да самырНемыч вате З.Долговаык-влаклан театр-рӱдерыште “Немыч вате” спектакльым ончымо годым ушышто ятыр шонымаш пӧрдын. Автор пьесыште тӱҥ персонажым, очыни, шкаланже модаш шонен возен манын, Фрау Бергерын рольжым ик-кок случайыште келыштарен ончышым, путырак келшен толшыла чучо. Тидын нерген «Фрау Бергер” пьесым возышо драматург, Марий Элын калык артисткыже Зинаида Долгова  деч йодым. Чынак улмаш: тиде образым шкаланже келыштарен. “Молан тугеже тиде р“.ольым чоҥен огыдал?”, — йодышем лие. “Но ынде самырыкше омыл да… Мыйын партнёрем-влак (Олег Кузьминых, Ваня Смирнов, икманаш, пырля тунемме йолташ-влак) модыт гын, мыят модам ыле”, — вашештыш тудо.

“Фрау Бергер” пьесе 2008 ийыште возалтын. Йошкар-Олаште “Фрау Мюллер” ресторан шочмеке, тудым эртен кайышыла, драматург “О, сай лӱм, йоҥгышо” манын шоналтен, тышеч “Фрау” шомакшым налын. А вара Норвегий гыч биатлонистке Тура Бергерын фамилийже ушешыже шыҥдаралтын. Тиде — норвежец ден немыч-влакын фамилийышт. Тыге пьесылан “Фрау Бергер” лӱм шочын, вара гына комедий возалтын.

“Полдыранат ош пеледышан”, “Пысман корем”, “Ӱдыр сий”, “Шудо-шешке”, “Висвис пушан олыкем”, а ынде “Немыч вате”. А Зинаида Васильевнан возымо пьесыже иктаж коло визытыш погына.

- Спектакль уста режиссёр Олег Иркабаевын образым почын пуаш полшымыжо да артист-влакын кокланже ик-кок мутым ешарен келыштарымыштлан кӧра путырак оҥайын лектын, — каласыш Зинаида Долгова. — Мутлан, Гендосым модшо Андрей Васильевын ойлымаштыже “Вот вам в рот” возенам гын, тудо “Вот вам рот в рот” манын келыштарен. Олаште илем гынат, шкемым ялысылан шотлем, сандене мланде темылан чонем коржеш. Шочмо Маршан кундемыштемак озанлык лунчыргымылан кӧра чодыра кушкеш, снеге шочеш. Мый ом пале, мланде деч посна кузе илыман? Ялозанлык пашаеҥ-влаклан гына огыл, чылалан мланде кӱлеш. Пакчаште шогылтде, марий еҥ, марий вате огеш чыте.Немыч вате2

З.Долгова артистке семын М.Шкетан лӱмеш Марий национальный драме театрыште кушкын. Кызыт марий драматургийнам пойдаренак шога да кажне ийын у пьесе-влакым калык ончыко луктеш. Режиссёр семынат вияҥеш. Ӱмаште “Корнывож пеледыш” (Д.Кораблева) пашажым ужна, кызыт А.Пушкинын “Царь Салтан” йомакым йоча-влаклан ончыкташ ямдыла. Шонымашыже шуко, эсогыл шкеж манмыла, тоя дене кошташ тӱҥалме жапыштат могай пьесым возышаш нерген палдарыш.

Анфиса Эманова, “Ямде лий” газетын ответственный секретарьже:

- Тачысе кечылан келшен толшо содержаниян пьесе: паша деч посна кодмым, ял пытымым, арака й ӱмаш проблемым тарватыме. Чынак, ме йолагайыш савырненна, озанлык-влак лунчыргымылан мланде паша эркын мондалт толеш. А кунам ӧрдыжъеҥ, вес кундем гыч толын, шочмо вершӧрыштына яра кийыше мландым тӱзатынеже, ме кӧранена, чаракым ышташ тӧчена. Пьесысе герой-влак ялысе калыкын йылмыж дене мутланат, тиде келшыш. Артист-влак сайын модыт, но театр эше сценыш лекшаш йолчиемым уэмда гын, сайрак ыле.

Эльвира Терентьева.

Е.Никифоровын фотожо-влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: