"Ме марий улына" рубрик, 2016 ий, Шорыкйол тылзын 22-шо кечыже

Кочаже — писатель, шкеже — балерине

Статьян авторжо Ирина Степанова

Елена Газина возен.

Тимирова ДинаБалерине Дина Тимирова — Нефтекамск олаште шочын-кушшо ӱдыр — писатель да поэт Илья Караевын уныкаже. Ӱдыр сцене гыч шке кид-йолжо, кап-кыл пластикыж дене сылнылык тӱням ончыктен мошта.
Дина — Москосо Анна Алексидзен вуйлатыме Руш балет театрын тӱҥ балериныже. Самырык ӱдырын жапше пеш шыгыр. Мутлан, сентябрь гыч тӱҥалын Российын икмыняр кугу олаштыже, вара Мексикыште лийыныт, икманаш, труппын паша планже кок ий ончык возымо.
Коча ден кова уныкашт дене кугешнат. Динан изи годсо жапше нерген Кӱлбеза куваваже тыге шарналта: «Тунам изи ӱдырна ешыж дене мемнан дене эше ила ыле. Дина кум-ныл ияшак, мемнам йыр шынден, концертым ончыкташ йӧратен. Йол парняш шогалын, эре чоҥештылын куштен. Тӧрза воктек миен, батарейым кучен, уремыш ончен, куштен шога ыле. Мемнан дек чӱчкыдын толын коштшо ик родына тунам эре «Дина, шогымаштет шып от шого, куштызак лият дыр» манеш ыле. Родо кокан мутшо чын лие».
Динан коштмо йочасадышке самырык воспитатель толеш, йоча-шамычым вигак мураш-кушташ кумылаҥда, тӱрлӧ конкурсыш ямдыла. Группышто ик татар рвезын йӱкшӧ яндар лийын, тудын воктен Дина подтанцовко семын куштен. Садикысе моктымым шарналтен, 1-ше классыш кайыше ӱдыржым аваже «Виктория» эстрадно-спортивный куштышо ансамбльыш наҥгая. Ик жап гыч коллектив вуйлатыше Виктор Мухин, йоча тӱшка гыч Динан сай кап-кыл пластикыжым ужын, куштымаште неле сольный партий-влакым ӱшана. Ӱдырын тыршымыжым шотыш налын, Виктор Егорович тудын ава-ачажым ӱжыктен, икшывыштым Уфасе балет училищыш тунемаш лӱдде колташ темла.
- Тунам мый 11 ияш лийынам. Еш, ава деч тораште, школ-интернатыште илаш да тунемаш пеш неле лийын, сагындарен, чон мӧҥгӧ шупшын. Шортын шинчаш огыл манын, шукырак кушташ тыршенам. Педагогна-влак мыланна тунамак ойленыт: балетыште кӱкшытыш шуаш шуко тыршыман, ик движенийымак шӱдӧ-тӱжем пачаш ыштыман! Тунеммым кудалтен кайышат ыльыч. Нефтекамск гыч ме коктын лийынна, кок ийлан ончыч пытарыше ӱдыр кызыт «Тодесыште» кушта, — каласкала Дина.
2010 ийыште Дина Тимирова Рудольф Нуриев лӱмеш Башкир хореографический колледжым йошкар диплом дене тунем пытара да “балетын артистше” специальность дене направлений почеш Екатеринбург оласе академический опер да балет театрышке пашаш кая. Самырык артисткын талантшым тыштат палемдат: ончыч кардобалетышке шогалтат, вара корифейский партийым (кок еҥ) ӱшанаш тӱҥалыт («Дон Кихотышто» — Амурчикын партийжым, «Лебединый озерыште» — Изи йӱксыным, «Щелкунчикыште» — Марин партийжым, «Спящая красавица» постановкышто — Золушкан).
Кугу опытан да талантан коллегыже-влак коклаште Дина шкежат моштымыжым тапта, профессионально кушкеш, театровед-влак тудын пашажым чӱчкыдын палемдат. Но жап эртымек, ӱдырлан ик верыште шогымыж гай чучаш тӱҥалеш. А самырык чонын тӱням ужмыжо шуэш. 2014 ийыште тудо Москошко толеш да кумдан чапланыше труппыш лӱдде-вожылде ушна. Марий ӱдырын пашаш уло кумылын пижмыжым ужын, театрын художественный вуйлатышыже Анна Алексидзе шкежак тудым сольный партийлаш шогалта. Кызыт Дина «Золушка» да «Щелкунчик» балетлаште тӱҥ партий-влакым кушта.
Балет артистын усталык ӱмыржӧ кужу огыл. Тидым шотыш налын, Дина ончыкыжым илышыште йол ӱмбак пеҥгыдын шогышашлык профессийым налаш кумылаҥын.
У ийым талантан землячкына Германийыште вашлиеш, театр коллективше дене шукерте огыл тушко гастрольыш каен. Вес ий март марте нуно Европысо эше икмыняр элысе калыкым руш балет школын искусствыжо, сеҥымашыж дене палдарат. Эрвелмарий ӱдыр «Щелкунчикыште» Машенькам (тӱҥ партий) да «Лебединое озеро» спектакльыште Изи йӱксын, неаполитанский оръеҥын (невестан) партийышт-влакым кушта. Яра жапыштыже немыч да англичан йылме-влакым тунемеш, книгам лудеш.
Елена Газина.
Нефтекамск ола.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: