"Ме марий улына" рубрик, 2016 ий, Шорыкйол тылзын 22-шо кечыже

Нефтеюганскыште чолга марий ӱдыр туныкта

Статьян авторжо Ирина Степанова

Елена Газина возен

Исакаева2Светлана Исакаева Пошкырт вел Дӧртыльӧ район Ивач ял гыч. Кызыт тора Нефтеюганск олаште ила. Моткоч весела кумылан, чулым ӱдыр.
“Эртыше ийын илышыштем шуко событий лие. Эн тӱҥжӧ – Башкир кугыжаныш университетын Пӱрӧ оласе филиалжым тунем пытарышым. Студент жапыштак Йӱдвел кундемыш илаш каяш шоненам. Шонымашем шукталте. Шошым вузышко Нефтеюганск гыч ик школын директоржо самырык чолга туныктышо-влакым кычалаш толын ыле. Деканат тудлан мыйым темлен. Тыге мый ты оласе эн кугулан шотлалтше 10-шо №-ан школыш руш йылмым да литературым туныкташ тольым. Пашамым чот йӧратем! Тудо кызытеш илышыштем тӱҥ верым налын шога. Мылам кок ставкылык шагатым ойырышт, эше 8-ше «Б» классым вуйлаташ ӱшанышт. Тӱҥалтыште ӧрмалгенамат ыле: вет мый ийготем дене тунемшем-влак деч шкежат чот кугужак омыл: колышташ тӱҥалыт мо мутем? Но нунын дене вигак кылым ыштен моштышна. Йоча-шамыч тунемаш тыршат, пеш активный улыт, уло кумылын школысо да оласе кӱкшытан конкурслашке лӱдде-вожылде ушнат. Тӱрлӧ диплом ден чап грамот-влак папкыштына ятырак улыт”, — ойла Светлана.
Ӱдыр шкежат декабрь тӱҥалтыште самырык-влак коклаште эртыше «СТИМУЛ. Сибирская жара» фестивальыш ушнышым. Фестиваль кок этап гыч шоген: отборочный тур да гала-концерт. Мый авторский муро дене сценыш лектынам да 2-шо верым налынам, дипломышто палемдыме: «За сохранение народных традиций». Муренам марла чиен, тувырым йодмем почеш Бирскысе туныктышем Алена Андреевна Илиева Мишкан районышто уста кидан ӱдырамаш дек лӱмынак миен нале да бандероль дене мылам колтыш. Марий пӧлкасе туныктышем-влак мылам кызытат полшен шогат, нунылан кугу таум каласем! Мый студент жапыштем институтын илышыштыже пеш активный лийынам, тиде койышем, витне, школ коллективыште ужын шуктеныт: директорын воспитатлыме паша шотышто алмаштышыжын «пурла» кидше улам.
У ият толын шуо. У ийыште шочмо Ивач ялыште илыше авам-ачам да шольо-шӱжарем-влаклан, родо-тукымемлан да чыла марий калыклан тазалыкым да тыныслыкым тыланем. Шонымашда шукталтше манын, лӱдде ончыко кайыза!
Елена Газина.
Еш альбом гыч налме фото.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: