"Рубрик деч посна", 2016 ий, Шорыкйол тылзын 22-шо кечыже

“Театр дене черле улам”, — мане артистке Ольга Федотова

Статьян авторжо Эльвира Терентьева

Йоча да самырык-влаклан театр-рӱдерлан – 25 ий

iCeW77wbZgs

И.С.Палантай лӱмеш тӱвыра да сымыктыш колледжым 2004 ийыште “Актёр мастарлык” специальность дене тунем пытарыше кокла гыч нылытын – Татьяна Попова, Александр Кожевников, Артём Иркабаев да Ольга Федотова – Марий самырык театрыште артистлан пашам ышташ тӱҥалыныт. Ольган икымше рольжо З.Долгован пьесыж почеш шындыме “Шудо шешке” спектакльыште Оксина лийын. Августышто пашаш толшо ӱдырым ты роль дене шыжымак икымше гастрольышко Марий Турек ден Параньга районлашке колтеныт. А студент годым А.Андрияновын шындыме спектакльлаштыже роль-влак лийыныт. Тышеч иктыже — “Ах, водевиль-водевиль” спектакльыште — Фёкла ден Екатерина Сергеевна. Икымше йоча дене шинчымыж годым Курчак театрыштат модын ончен, а кызыт кокымшо аза дене шинча гынат, театрыште рольым темлат гын, кӧна. Тыге ме тудым шукерте огыл “И с нами голуби” спектакльыште Ольган рольыштыжо уста актрисе семын образым мастарын почын пуымыжым ужна. Мут – самырык актрисе да кок шочшан ава. Ольга Федотовалан.

Йоча годсо шонымаш

- Кугу таум каласыман икымше туныктышем Галина Прокопьевна Медведевалан. Ме мурым муренна, сценкым шынденна – ик концертат мемнан класс деч посна эртен огыл. Мо оҥайже: ме ешыште кум акак-шӱжарак улына, Галина Прокопьевна кумыньнамат тӱҥалтыш класслаште туныктен. Школыштына драмкружок лийын, тушто спектакль гыч ужаш-влакым Людмила Ивановна Медведева шынден. Эн ончыч школышто модын ончыктенна, вара – шочмо Шернур район Мустай клубышто. Марий тиште кечын книгалан пӧлеклалтше шкешотан сценкым ончыктымынам шарнен кодынам. Чолга туныктышо-влак варажым шкеныштын ӱдырамаш ансамбльыштым чумыреныт.

Изиракем годым ме, йоча-влак, погынен, шке билетым ямдылен, концертым ончыктенна. Вес ялышкат каен, мурен-куштенна, вара Мустай клуб пашаеҥ-влак дене пырля вес районлашке лектынна ыле.

9-ше классым тунем пытарымеке, колледжышке артистлан тунемаш пураш курыкмарий ӱдыр-рвезым веле погеныт, садлан 10-шо классыш кодынам ыле. Нунышт шагалын лийыныт, тунам Мустай школышкына Василий Пектеев, Галина Ямаева, Зинаида Долгова толыныт ыле. Ты жаплан артист лияш шонымашем шуленат йомын ыле, лач йолташ ӱдыремын “Айда, тунем” манын ӱшанлын ойлымыжо таратыш.

Мастарлык ачам деч куснен, шонем. Тудо шуко жап верысе озанлыкыште агрономлан пашам ыштен, но ик жапыште клубыштат тыршен. Тудденак пырля колледжыш пураш миенам ыле. Тушто мотор ӱдыр-влакым ужмеке, кокымшо турым эртымеке, “Ындыжым, Оля, айда мӧҥгыш каена, тыште эн моторжо-влак кодыныт, от логал” манын ӱжын наҥгайынеже ыле. Ачам омсам петырен лектын кайыш, но мый кумшо турысо экзаменым кучышым.

Еш кеч-кунамат шерге

Ойлышым: кум ӱдыр кушкынна, мый – кокымшыжо. Лира акам Йошкар-Олаште поварлан пашам ышта. Люда шӱжарем – Шернурышто суд пристав. Авам ден ачам пенсийыште улыт.

Сергей пелашем шочынжо Морко район Унчо гыч. Ондак Озаҥышке пашам ышташ коштын. Мыйым вашлиймеке, Йошкар-Олашке толын. Сергей ондак Руш драмтеатрыште, а кызыт Курчак театрыште монтировщиклан пашам ышта. Пелашемын шӱжарже дене пырля тунемынна, ик шочмо кечыж годым изаж дене палыме лийынна. Ме ынде латикымше ий икте-весым умылен илена, кок ӱдырым – Анастасия ден Владиславам – ончен куштена.

Кажне ийын ме, кум ӱдыр, шке ешна дене У ийым пайремлаш ялышке вашкена, вет ача-авана идалык мучко коктын гына улыт. Лач ты гана кугурак ӱдырнан черланымыжлан кӧра каен ышна керт. А такшым тиде йӱлашке пурен.

Мураш але кушташ огыл…

Мураш але кушташ гына огыл, мый театрысе чыла пашам йӧратем. Мураш, конешне, нелырак. Теве вес театрлаште музык дене занятий-влак лийыт. Спектакльыште мурыман рольым пуат гын, мемнан дене посна пашам ыштат. Кажне кечын гаяк мурыктат гын, сай ыле. А йӧратыме мурем студент годсек – “Пӱгыр ломбо”. Группыштына кум йӱк дене муренна.

Теве ик жап балетмейстер Александр Казаринов мыланна куштымаш пластикым туныктыш. Тунам чыланат тушко куанен коштна, куштымет да мурымет вел шукта. Кызыт ты куштымашым шарналтет да тавалтен ончетат, ужат: а йолжо шарна улмаш. Тунам капланат, чонланат сайын чучеш. Теве эше Владиславан шым тылзаш улмыж годымат пашашке ӱжыч да тунам, сценыш лекмек, моткоч кугу куаным шижым. Нойышо, но тунамак кумылаҥше улат. Сандене театр деч посна ом керт, туддене черланенам манам.

Чыла ролем оҥай

Изи йомак гыч тӱҥалын тӱрлӧ планан герой марте чыла роль оҥайын чучеш. “И с нами голуби” пьесым лудмеке, мылам эн ончыч Симан образше келшыш, тудын спектакль мучко кузе вашталтшашыжым сайын возен пуымо. Ольган образшым сценыште почын пуаш нелырак ыле: эре нюслен шинчаш ок лий, ала-кунам пеҥгыдынрак каласыман, ала-кунамже чытыман. Эше тыгайракак рольым ондакак чоҥенам ыле. Клара Аникинан студент-влак дене Вадим Ливановын пьесыж почеш шындыме “Раз, два, три…” спектакльыште 12-13 ияш йочам – Ирам – модынам. Туштат кум артист гына кӱлын, но вес проблемым тарватыме: неформал-влак ик кечын ӱмырыштым кӱрлаш кутырен келшат. Таче сай, но эрла эшеат сайрак лиеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: