"Рубрик деч посна", 2016 ий, Шорыкйол тылзын 22-шо кечыже

Тӱҥ рольым ӱшанат

Статьян авторжо Эльвира Терентьева

 

Йоча да самырык-влаклан театр-рӱдерыште 21 ий тыршыше чолга артист Евгений Ибраев — гармоньчо, весела да пашаче койышан еҥ. Элыштына 1999 ийыште озаланыше окса чӱдылык Евгенийым тӱвыра паша деч кораҥден, Марий машиностроитель заводыш наҥгаен улмаш. Но ик идалыклан гына, чонжо театрыш шупшын. Шкенжын шотлымыж почеш, кызыт марте тудо 86 рольым модын, тышеч 32-шо – икымше планан.

“Ешыштына лу йоча кушкынна, ме чыланат гармонь дене шоктен моштена: пӧръеҥжат, ӱдырамашыжат. Ачамат, кочамат гармонь дене мастарын шоктеныт, сандене мыланнаже тунемде кодаш шотлан толын огыл. Мӧҥгыштем кызыт кумшо гармонем, тудым кок ий ончыч веле налынам. Пайрем еда мо кумылым савырен кертеш? Гармонь!”- шыргыжалын ойла Евгений Павлович.

Армий деч вара Ленин лӱмеш тӱвыра полат пеленысе “Кумыл” ансамбль кумылжым IMG_1108савырен. Вара Василий Бушков йолташыж дене тунамсе культпросветучилищыш тунемаш каеныт. Тунем пытарымеке, У Торъял районысо Ошканер клубым кум ий вуйлатен. Тушто еш илыш шотлан толын огылат, 1994 ийыште рӱдолашке толын да Марий самырык театрыш пурен.

Е.Ибраевын ик эн йӧратыме пашаже — “Пӧртыл, ӱдырем” (Г.Гордеев) спектакльыште Митя-художникын образше. Почеламут корныла дене каласкалыше рольым чоҥымо годым пытыше Лапкапамаш ялжым (Шернур район) ушышто кучен. “Окса мешак” (М.Рыбаков) спектакльыште мыскара койышан геройым – Пӧчам – куанен модын. Классический произведенийым рушла модаш Евгений ӧрын огеш шоно, вет шуко шочшан еш гыч кум йочаже, тыгодым тудат, Шернур посёлкысо школ-интернатыште шинчымашым поген да марий йылмым тунемде кушкын. “Вишнёвый сад” (А.Чехов) спектакльыште идеалист да романтик Гаевым устан модеш. Теве “На дне” (М.Горький) спектакльыште кум рольым модын, мо оҥайже: эн ончыч 40 ияш Актёрын рольжым пуэныт, варарак — Кривой Зоб рольым, а кызыт 28 ияш вор Васька-Пепелым келыштара.

“Театрыште чыла гаяк пашам режиссёр Олег Иркабаев полшымо дене шочыктена. А теве ГИТИС-ыште заочно тунемме годым (тудын филиалжым Марий Элыште почыныт ыле) моло режиссёр дене пашам ыштымаш чонышто поро кышам коден. Эдуард Успенский мыланем эре тӱҥ рольым ӱшанен. Тыгак Алексей Марковын пьесым да илышым вес семын ужмыжо куандарен. Тудын тыматле койышыжак мом шога!? Михаил Скандаров дене пашам ышташ оҥай ыле”, — ойла Евгений Павлович.

З.Долгован йылмыжым просталан шотлышо артист драматургын “Шудо шешке” пьесыж почеш шындыме спектакльыште тӱҥ рольым – Ольошым – мастарын чоҥа, а “Немыч вате” спектакльыште Мишукым почын пуа. Философий шӱлышан пьесе-влакым возышо Г.Гордеевын “Чавайн” драмыштыже тӱҥ геройым – Сергей Чавайным – келгын почын пуэн моштымыжо творчествыштыже веле огыл, театрын  историйыштыжат шкешотан пале семын палемдалт кодеш.

DSC_1641DSC_0161

Эльвира Терентьева.

Фото-влакым театр-рӱдерын архивше гыч налме.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: