"Кугарнягудо" рубрик, 2016 ий, Пургыж тылзын 5-ше кечыже

Австриец финн-угор йылме-влакым шымла

Статьян авторжо Ирина Ямбаршева

австриецКристиан Пӧшлегер Марий кугыжаныш университет пелен диссертацийым воза. Австриец финн-угор йылме-влакым шымла. Марла умыла, но огеш мутлане.
Кристиан Пӧшлегер Вена олаште шочын-кушкын. Аваже – венгерке, ачаже – австриец. Кристиан аважын шочмо йылмыжым шымлаш шонен, но тидым ыштен кертын огыл. Будапештысе финно-угроведений институтыш тунемаш пурен. Тушто венгр йылме деч посна финн да шагал еҥан иктаж вес калыкын йылмыжым тунемаш кӱлын. Кристиан марий йылмым ойырен налын.
- Марий йылмым ик ий наре келгын тунемынам. Тидлан мыланем эстон профессор Пауль Кокла полшен. Тыге эстон профессор ден австриец студент марий йылмым шымленыт, — каласкала Кристиан.
Ик профессор тудлан удмурт йылмым тунемаш темлен. Кристиан тидын дене келшен. Икмыняр жап Ижевскыштат тунемын.
А Йошкар-Олаш грантлан кӧра толын. Тудым Финляндийысе ик университет пуэн.
- Диссертацийым возаш кум университет гыч: МарГУ, УдГУ да КазГИ — иктыжым ойырен налман ыле. Тыге грантын полшымыж дене Йошкар-Олашке толынам. Шкеже УдГУ-ш логалам манын шоненам, но МарГУ-ланат куаненам, — ойла тудо.
Кристиан сентябрь годсек Марий кундемыште ила. Тыште диссертацийым воза. Марий студент-влак дене марла мутлана, молышт дене – рушла.
Мӧҥгӧ чӱчкыдын кудалышт огеш сеҥе. У ийлан икмыняр кечылан миен толын. Садлан Марий кундем таче кечылан мӧҥгым алмаштен.
Кристиан марий пайрем-влакым шымла. Мутлан, 19 январьыште, Крешене пайрем годым, Марий тӱвыра рӱдерын пашаеҥже-влак дене пырля памашыш йӱштылаш миен толын.
Весела кумылан пӧръеҥ Марий кундемым йӧратен шынден. Мемнан пашаче улмынам моткоч акла.
Денис Очиев.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: