"Ой, йӧратымаш..." рубрик, 2016 ий, Пургыж тылзын 26-шо кечыже

Аклен шым мошто

Статьян авторжо Татьяна Айтова

15 сентябрь

Пелашем дене кок ий утла пырля илена. Шижам, романтик шӱлыш эркын йомеш, кырча-марча проблеме-влак тургыжландараш тӱҥалыныт. Мариемын пашадарже моткоч изи, а мый школышто туныктышылан ыштем. Туштат окса кугужак огыл. Влад – тӱвыра пӧртыштӧ баянист. Ондак семӱзгарым мастарын шоктымыжо, весела кумылжо чонем ырыктеныт. Гитарым шоктымыжым ондак йолташ ӱдырем-влакат шулен колыштыт ыле. Южыжо мыланем кӧраненат дыр. Тудлан марлан лекмем годым ончыкылык илышна мыланем волгыдо да пиалан лийшашла чучын. А кызыт пашадаржат моткоч изи, репетицийжат, концертшат шуко жапым налыт. Чылажат шерем темен.

5 октябрь

Окса нимоланат огеш сите. Владым школыш пашаш пураш йодым. Директор келшыш. Ынде пелашем кеч изиш шукырак оксам налаш тӱҥалеш.

31 октябрь

Теҥгече пелашем пашадарым нале. Пӧръеҥлан тиде окса мо? Намыс! Ача-аважын суртыштышт илен ярненам. Пырля тунемме йолташем-влак шукертак пачерым, машинам налыныт. Южышт кеҥеж еда теҥыз воктек канаш коштыт. А ме пуйто локтымо улына. Кок пашаште тыршем гынат, окса садак уке. Влад нимом огеш ыште. Ончыкыжым кузе илаш тӱҥалына?

7 ноябрь

Теҥгече Влад дене кевыт гыч кок кугу неле сумкам пыкше гына нумал кондышна. Йӧра эше пошкудо Аня полшыш. Тудлан коло вич ий веле темын, чапле иномарке автомашина дене кудалыштеш. А мыйын пелашем шӱкшӧ «Жигулиланат» оксам поген огеш ситаре. Кастене тудым сайынак вурсышым. Кӱшыл шинчымашан улат, пашам ыштет. Кеч иктаж-могай машинам налам ыле. Йӧрдымӧ! Шӱй ӱмбалнем шинчет маньым. Тылеч вара пелашем дене кум кече ышна кутыро.

21 декабрь

Таче Влад сай кумылан толын пурыш да вигак уремыш ӱжын лукто. Подъезд воктене тошто ужар «Жигули» шоген. Тудым пелашем ик палымыж деч налын улмаш. Ме кевытыш кудална. Пел корнышто машина шаланыш. Пелашем машина йыр кок шагат утла пӧрдӧ. Тыге ме шеҥгелне улшо машина-влаклан корным петырышна. Пӧръеҥ-влак туманлаш, сигналитлаш тӱҥальыч. Мылам пеш чот намыс ыле. Сырымем дене машина гыч лектым да мӧҥгӧ ошкыльым. Пелашем корно покшелнак шоген кодо. Влад кастене гына пӧртыльӧ. Сырымем дене кочкашат шым шолто. Вакшышым диванеш шарен пуышым.

12 январь

Йӧратымем таксистлан пашаш пурыш. Окса изиш ешаралте. Ынде мый тудым ны эрдене, ны кастене ом уж. Влад школыштак пашам ышта гын, сайрак ыле. Тыге мый таксистын пелашыже лийым. Еҥлан ойлашат намыс.

30 январь

Пелашем пытартыш жапыште моткоч вашталте, торжа, шыде лие. Йӱдым пашам ыштымыжлан кӧра, шонем. Кечывалым пашам ышташ огеш лий мо? Тудо йӱдым окса шукырак лектеш манын руале да лектын кайыш. Кас мучко шортым. Ончычсо вашумылымашна, йӧратымашна куш йомо?

8 февраль

Пелашем дене тыматлырак, порырак лияш тыршем. Тудым школыш пӧртылаш йодым. Влад чотак шыдешкыш. Тылат нимо огеш келше, эре окса огеш сите манын туманлыш. А мый вет тудын верч колянем.

20 февраль

Коктын чылт йот еҥ лийынна: ны ласкан мутланымыже, ны ӧндалмыже — чыла ала-кушко йомын. Икте-весым шукертак огына умыло. Еш илышна кажне кечын начарештеш. А теҥгече кастене Влад нимом ойлыде вургемжым погаш тӱҥале. Тетла тый денет илымем огеш шу, мый вес ӱдырамашым йӧратем мане. Логарыш кочо комыля тольо. Ӱшанымыла ыш чуч. Кузе тыге? Вет эше ик ий ончыч тудо мыйым кидыште нумалаш ямде ыле. «Юля мыйым умыла, пагала, аклен мошта. А тыйын титаклымет шерем темен. Тетла тый денет ик кечымат илымем ок шу», — мане пелашем. Вургемжым погыш да лектын кайыш. Мый шкетын шинчен кодым.

25 февраль

Влад ойырлаш темла. А мый тудым кызытат йӧратем. Еш илышнам шкак локтыльым. Эх, чылажымат мӧҥгеш пӧртылташ лийже ыле.

Вера.

Йошкар-Ола.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: