"Улам мый Рве-зы-лык!" рубрик, 2016 ий, Пургыж тылзын 16-шо кечыже

Гитарым налаш манын, пел ий оксам поген

Статьян авторжо Анастасия Эманова

Иван Николаев – творческий шӱлышан еҥ. Тудо “Частная коллекция” ансамбльыште гитарым шокта да мура.

Ваня Морко район Токсар ялеш шочын. Шӱргыял кыдалаш школышто индешымше класс марте тунемын. Вара Параньга посёлкысо строительный да технологический техникумыш пурен. Тушто ныл ий “Строительство и эксплуатация зданий и сооружений” специальностьлан тунемын. F_bBrRXK_eU

Студент годым спортлан шӱмаҥын. Куштылго атлетике дене поснак чот заниматлен, а телым ече дене коштын да техникумын чапшым тӱрлӧ таҥасымаште арален. Спорт деч посна Ванян чонжым романтике шӱлыш авалтен — рвезе музыклан кумылаҥын. Шке гыч гитар дене шокташ тунемын. “Икымше курсым тунем пытарымеке, гитарым налынам. Тидлан пел ий стипендием погенам. Гитар дене утларакше марий семым шоктем. Изи годсек “Шуматкече” да “Лӱҥгалтыш” ансамбль-влакын, Станислав Шакировын келге шонымашан, лыжга мурыштым колышташ йӧратем”, - ойла Ваня.

Техникум деч вара И.Николаев кӱшыл образованийым налаш шона да 2013 ийыште ПГТУ-ш строительный факультетыш (кызыт тудо строительство да архитектур институт маналтеш) промышленный да гражданский строительство специальностьлан заочно тунемаш пура. Тений шыжым диплом пашажым аралышаш.

Ваня Морко поселкысо магистральный газопроводын линейно-производственный управленийыштыже (ЛПУМГ) плотниклан пашам ышта, тыгодым управлений пеленсе “Частная коллекция” ансамбльыш коштеш. “Ансамбль 1998 ийыште шочын. Эн ончыч “Ностальгия” маналтын, вара “Мурсескем” лийын, а кызыт — “Частная коллекция”. Ансамбльым Андрей Чернов вуйлата. Чылажге вич еҥ: Андрей Чернов, Алексей Вальман, Сергей Ворошилов, Надежда Кузнецова — коштына. Ик участникынат музыкальный образованийже уке. Ансамбльыште шукерте огыл выступатлаш тӱҥалынам. Ӱмаште сентябрьыште “Живой звук” конкурсышто мастарлыкшым ончыктенна. Тудо Нижний Новгород ола воктенсе “Газпром” организацийын “Ласточка” каныме верыштыже эртен. Конкурсышто участникын дипломжо дене палемдалтынна. Тыгай кугу конкурсышто икымше гана лийынна, шукыж годым организацийыште эртыше конкурслаште але пайрем годым мурена. Тений Морко поселкышто 9 Майыште выступатлаш шонена”, - манеш Ваня.

Ура шӱм-чонан рвезе гитаржым налеш да импровизацийым ышташ йӧрата. Еш пайрем годым Ваня гитар почеш эреак муралта, родо-влакшым куандара. А йолташ-влак дене вашлийме, йоча пагытым шарналтыме годым гитар сем деч посна огешат лий.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: