"Илыш йогын" рубрик, 2016 ий, Пургыж тылзын 26-шо кечыже

Илыме пӧртым ятыр чоҥымо

Статьян авторжо Ирина Ямбаршева

Кодшо кечылаште Марий Эл Республикысе правительствыште 2015 ийыште кундемнан кузе вияҥмыжым иктешленыт да 2016 ийлан задаче-влакым палемденыт.
Экономике шотышто нелырак лийын гынат, мемнан республикыште шагал огыл промышленный да ялозанлык сатум ыштыме, илыме пӧртым чоҥымо, кокла пашадар кушкын.
Юл кундемысе федеральный округышто Марий Эл промышленный производство индекс дене икымше верыште кая, а Россий Федерацийысе субъект-влак коклаште – 8-ше верыште.
Промышленность утларакшым Марий нефтеперегонный заводлан, «Акашевский» чыве фабрикылан, Марий машиностроитель заводлан, Марийский ЦБК-лан, Красногорскысо автофургон комбинатлан да «Электродвигатель» заводлан, «Потенциал» ООО-лан, Волжскысо электромеханический заводлан, «Аргус-Волга» ООО-лан, «Сернурский сырзавод» ЗАО-лан, «Геникс» НПФ ООО-лан кӧра кушкын.
2015 ийыште ялозанлыкат вияҥын. Тудын ыштен налме продукций кугыт 49,3 миллиард теҥгеш шуын. 2014 ий дене таҥастарымаште 10,8 миллиард теҥгелан шукырак. Тидын шотышто Юл кундемысе федеральный округышто Марий Эл кокымшо верыш лектын, а Российыште – 7-ше верыш. Ялозанлык утларакшым шылым 26,3 процентлан утларак ужалымылан кӧра вияҥын. Тушечын чыве шылым – 38 процентлан утларак ужалыме, муным – 13,2 процентлан. Тидын шотышто «Акашевский» чыве фабрике ООО-м да «Шойбулакский» ПЗ ЗАО-м палемдыман.
Тыгак республикыштына 26,6 километр автомобиль корным пашаш колтымо, 99.7 км газпучым, 17,3 километр вӱдпучым шупшмо, Йошкар-Олаште Изи Какшан эҥер гоч кӱварым чоҥымо. Йошкар-Олаште Йоча жап тоштерым, Йоча-влаклан лудмо рӱдерым, Аттестаций да аккредитаций рӱдерым, 815 верлан куд йочасадым, ик сменыште 330 еҥым приниматлыше йоча поликлиникым чоҥымо. Тидеч посна Юрино районысо рӱдӧ эмлымверын корпусшым, лу районышто 20 ФАП-ым да кум районышто спорт объект-влакым пашаш колтымо.
2015 ийыште 439 тӱжем кв.метр илыме верым чоҥымо. Тидыже 2014 ий деч 5,6 процентлан шукырак. Аварийныйлан шотлалтше пӧртла гыч 1775 еҥым у пачерыш кусарыме, 25,8 тӱжем кв.метр шӱкшӧ пӧртым пужымо.
Марий Элыште 2015 ий декабрь мучашлан инфляцийын кугытшо 12,5 процентыш шуын (Российыште – 12,9 процент).
2015 ийыште республикыштына кокла пашадарын кугытшо 8,1 процентлан кушкын да 22 тӱжем теҥгеш шуын.
«Администраций вуйлатыше-влак, шке районда-влакым вияҥдаш тыршыза», — каласен республикым вуйлатыше Л.Маркелов. Тыгак тудо илыме верым утларак чоҥаш да акым кӱзыкташ огыл манын палемден, тыгодым илыме верын качествыжат сай лийшаш. Тений республикыште 445 тӱжем кв.метр деч шагал огыл илыме вер чоҥалтшаш.
«О Фонде содействия реформированию жилищно-коммунального хозяйства» закон почеш шуко пачеран 101 аварийный пӧрт гыч еҥ-влакым сай пачерыш кусарышаш улыт.
Ирина Золотарева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: