"Рубрик деч посна", 2016 ий, Пургыж тылзын 9-ше кечыже

«Кеҥеж йӱдыштӧ» Ольгам латкудымшо ий модеш

Статьян авторжо Татьяна Иванова

«Кеҥеж йӱдыштӧ» Ольгам латкудымшо ий модеш

Шинчамым кумем да тыгай сӱрет коеш: сылне пӱртӱс лоҥгаште, курык сер воктене изи ӱдыр шога. Пуйто кайык сылнын муралта, пуйто мардеж писе, чолга, пуйто кече, кумылжо шокшо да чонжо волгыдо! image

Курык марий кундемын шочшыжо Марина Почтенева мылам тыге чучеш. 5 февральыште 18 шагатлан М.Шкетан лӱмеш Марий театрыште “Шергӓкӓн тӓнгемвлӓлӓн” бенефисше лиеш. Мо дене кылдалтын? Артистке дене тыге каласыш: «Ӱмаште, 5 ноябрьыште, бенефисым шочмо-кушмо верыште: Шӹндырйӓлыште да Виловат селаште, эртарышым. Шоналтышым: И.Палантай лӱмеш колледжыште театр пӧлкаште тунем толмылан 20 ий, Санкт-Петербургысо театр академийым пытарымылан лу ий эртен. Тений Шкетан лӱмеш театр сценыште усталык касым эртараш ала-могай вий кумылым лукто. Шарналтышым: 2006 ийыште икымше бенефисем лийын ыле, «Сӱан кечын» спектакльыште Нюрам модынам. Сӱретче Иван Ямберде семын цифрым, числам шергалын шинчаш гын, тиде ала-могай тамгам ончыкта», — мане Марина Георгиевна.

Бенефис кок ужаш гыч шога: икымшыже олык марла, кокымшыжо — курык марла. Икымше ужашыште спектакльла гыч сценке-влак лийыт, а вара эстраде артист-влак концертым ончыктат.

Маринан пелашыже — Сергей Данилов, Морко кундемын шочшыжо, Марий Элын сулло артистше, ик сценыште пырля модыт, икте-весым йӧратен илымыштлан — 14 ий. Кок эргым куштат: Кириллан 13 ий гын, Егорлан эше ныл ий веле. «Сергей Москосо Щепкин лӱмеш театр институтым тунем пытарен, южо артист семын тушто ешаҥын огыл, ме театрыште палыме лийынна. Сергей — пеш уста, пашаче пӧръеҥ, сем ӱзгарым — шӱвырым, тӱмырым ыштымыжым ончем да ӧрам! Ачам ойла ыле: «Марина, тиде марийым тылат Юмо пуэн. Тудым йомдарет гын, шужен колет». Мый палем: тудо эҥертышем, ешыште оза да, можыч, тӱняштыжат тӱжемлан икте гына!» — ойла Марина.

А мыйже йодым: «Коктынат артист улыда, пашаштат, мӧҥгыштат пырля, икте-весе деч шер ок тем?» — Марина тыге вашештыш: «Тыгай шонымаш ик ганат лийын огыл, мӧҥгешла, ик шӱлыш дене илена, адакшым кечыжат пеш писын эрта. Коктынат кум вере пашам ыштена, тыгай мемнан артист-влакын илыш — пашадар изилан кӧра веле огыл, чон йодмо пашамат кумылын шуктена. Бауман лицейыште йоча-влакым сценысе искусствылан туныктем. Шочмо еда Марий Эл радиошто курык марла программым вӱдем. А тӱҥ паша — театр. Тыште илыш куат да йӧратыме сомыл улыт», — палдарыш Марина Почтенева.

Театр корныш тудо тыге логалын: англичан ден немыч йылмылам сайын паленат, переводчиклан тунемаш пураш шонен, МарГУ-шко толын, ик балл ситен огылат, кумылжо чот волен, а мӧҥгӧ каяш вожылын. Ала-можо тӱвыра колледж велкыла савыралын. Курык марий группым погымо нерген уверым ужынат, «Ну уж тышкыже мый пурен кертам» шоналтен. Вет Марина изинек мураш, кушташ йӧратен, драмкружокыш коштын, гитарым шоктен моштен. Сиреневый лосиным чийыше, а вачыште — гитар, теве тыгай тудо пурен экзаменыш. Жюрин чыла йодмыжым сайын шуктен.

«Тунам группым Василий Александрович Пектеев поген. Тудо ойлыш: «Пуйто сумкам йомдаренат, тыгай этюдым ончыкто». Шоналтен колтышым, сумкам, чынак йомын, кузе ынде мӧҥгӧ каем, шорташ тӱҥальым. Молан тыгай этюдым пуышым, манын, чуч чарен кертын», — шарналта Марина Почтенева. Василий Александрович Пектеев тудын пӱрымашыштыже ача гай лийын, колледжыште да вузышто тунемаш корным почын. А муро аланышке Марина Почтенева Анатолий Куклинын мурыжо-влак дене лектын.

Марина Почтеневалан йоча пагытше гыч теве мо ушешыже кодын: шочмо Янгысола ялже, ферме, эреак ончылно улшо «Сила» совхоз, урем дене эртыше сӱан… да кочаже Матвей Герасимович. Тудак Маринан кумирже – тале, лӱддымӧ, коммунист да пашам йӧратыше, чатка пӧръеҥ. Вуйыштыжо — эреак шляпа, капыштыже — чапле пинчак да оҥ тич — орден да медаль-влак.

Кочаж семын чыным гына ойлымо койыш да йӧратыме атрибутшо — шляпа — актрисын илышыштыже кугу верым налыт. Шляпам упшалаш йӧрата. Марина Георгиевна машинам шкеак виктара, ешыж дене ечыгорныш лектеш, пӱртӱсыштӧ канаш йӧрата. Яра жапше пытартыш жапыште чылтак уке, тыгай тудын паша радамже. Изиш шукырак каналтем гын, ноем веле, манеш. Тудын модмо рольжо-влак характеран, лирике сынан да драматический улыт. Н. Арбанын «Кеҥеж йӱд» пьесыж почеш шындыме спектакльыште латкуд ий Ольган рольжым модеш.

Марина Почтенева икмыняр киношто сниматлалтын. Мыскараче койышыж денат кумылым савыра. Икманаш, озыркан мардеж гай писе, илышым да театрым йӧратыше артистке ончаш толшын шинчашкыже вигак перна да кажнын чонышко вийым ешара.

Татьяна Пчёлкина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: